Иу азы размæ февралы райдианы Украинæйы æфсад бæрæг тыхджындæр райдыдтой сармадзантæ æмæ æндæр егъаукалиброн æхсæнгæрзтæй Донбассы территоритæ æхсын. Фæстæдæр куыд рабæрæг ис, афтæмæй сæ фæнд уыд размæ абырсын æмæ скуынæг кæнын уырыссаг æвзагыл дзурджыты. Уыимæ ма иумæ сæ пъланы уыд Хъырымы æрдæгсакъадахмæ бабырсын дæр. Ацы сау хъуыддæгтæ сфæнд кæныны сын «зондамонæг» уыдысты хурныгуылæйнаг бæстæты æмæ НАТО-йы къухдариуæггæнджытæ, кæцытæ сæ бирæ азты дæргъы ифтонг кодтой æхсæнгарзæй æмæ финанстæй. Кæй зæгъын æй хъæуы, Уæрæсейы спецслужбæтæ базыдтой ацы хинæйдзаг фæндтæ æмæ цæмæй къаддæр зиæнттæ æрцыдаид, уый тыххæй Путины бахъуыд сæрмагонд æфсæддон операци райдайыны сæр.
Украинæйы æрцæугæ цауты фæстиуæгæн ирдæй разынд хурныгуылæйнаг бæстæты, уæлдайдæр та англосаксойнæгты, «хъæстæдзинад». «Хурмæ ракалдысты» се ‘нæуынондзинад, фæлитойдзинад æмæ сæ марг зæрдæты сконд. Уæрæсейы ныхмæ цъаммардзинæдтæ аразыны хъуыддаджы уæлдай «æнувыд» разындысты Польшæ, Прибалтикæйы бæстæтæ æмæ ма æндæр «паддзахадгæндтæ».
Уæдæ ма цы раргом кодта сæрмагонд æфсæддон операци
Бирæ азты дæргъы хурныгуылæйнаг бæстæтæ сæхи хуыдтой размæцыд, демократон, ома, махмæ дзыллон информацийы фæрæзтæ сты хæдбар æмæ дзурынц æрмæстдæр рæстдзинад. Фæлæ æрмæст иу азы æрцæугæ хабæрттыл куы афæлгæсæм, уæд фидарæй зæгъæн ис, хурныгуылæйнаг дзыллон информацийы фæрæзтæ бынтондæр хæдбар не сты – уыдон æгас дунейыл тауынц æрмæстдæр мæнгдзинад, кæй æп-пæлынц фыдгæнджытæй æмæ фашисттæй, объективон сæ схонæн нæй. 2014 азæй фæстæмæ украинæйаг нацисттæ Донбассы цæрджыты кæй куынæг кодтой, бирæ фыдракæндтæ сын кæй кодтой. Нацизм кæй рапарахат кодтой, уый нæ уыдтой. Фæлæ сæрмагонд æфсæддон операцийы рæстæджы та æмхуызонæй «райхъал» сты æмæ абоны онг «къæпп-къæпп» кæнынц алæрдыгæй Уæрæсемæ. Æниу сæ цы бадомæн ис – сты НАТО-йы пропагандæгæнджытæ æмæ сæ кæцырдæм сардауынц, уырдæм знæт куыйтау «ныййарц» вæййынц.
Сæрмагонд æфсæддон операци ма раргом кодта Уæрæсейы æхсæнады хъæндзинæдтæ дæр. Фыццаджы уал, се ‘цæг цæсгом равдыстой æрæджыйы «патриоттæ», кæцытæ фыццаг гæрахы фæстæ тæппуд тæрхъустау лидзæг фесты фæсарæнтæм. Æмæ ма уымæй уæлдай уым дæр нæ лæууынц сæ иуæй-иутæ – цъыф калынц сæ райгуырæн бæстæйыл, се ‘мбæстæгтыл.
Хæстон архæйдтытæ ма «хурмæ ракалдтой» Уæрæсейы Хъахъхъæнынады министрады рæдыдтытæ дæр, кæцытæ уагъд æрцыдысты раздæры азты. Нырыккон дуджы хæстон архæйдтытæн раст анализ арæзт нæ цыд, хæстонты домæнтæн дзуапп чи дæтта, ахæм æхсæнгæрзтæй цух æййæфтой, стæй ма бирæ æфсæддон дæлхæйттæ нæ уыдысты цæттæ сæ службæйон хæстæ æмбæлон æмвæзадыл æххæст кæнынмæ. Фæлæ ныридæгæн æппæт проблемæтæ оперативонæй иуварс цæуынц.
Куыд бандæвта сæрмагонд æфсæддон операци Украинæйыл?
Фыццаджыдæр раргом ис, Украинæйы къухдариуæгад æгасæй кæй сты НАТО-йы дæлбар æмæ сæхи зондæй иу къахдзæф саразын дæр сæ бон кæй нæу, уый. Сæ хæстонтæ фронты кæй цагъды кæнынц, уый фæдыл мобилизаци кæнынц æппæт хæстхъом гоймæгты. Мæлын кæй нæ фæнды, марионеткæ хицауады тыххæй, уыдон алы амæлттæй сæхи æмбæхсынц мобилизацийæ. Стæй ма хæсты быдырæй дæр тынг арæх лидзынц сæ хæстонтæ æмæ уымæ гæсгæ сарæх сты салдæтты амарыны цаутæ. Уымæй уæлдай ма сæ зæрдæ кæмæ фехсайы, ома, Уæрæсейы æвварсхæцæг у, зæгъгæ, уыцы хæстонты æмæ бынæттон цæрджыты амарынц. Украинæйаг фашисттæ ма хæсты быдыры цалдæр хатты спайда кодтой химикон буарадтæй дæр, æппынæдзух æхсынц атомон электростанцитæ, техногенон катастрофæйæ нæ тæрсынц. Донбассы цæрджытыл та бынтондæр нæ ауæрдынц – тугдзых сырдтау сæ фыдмард кæнынц. Æмæ æппæт адæттæ хурныгуылæйнаг прессæ нæ уыны.
Цы фæивта дунейы иу азы дæргъы?
Сæрмагонд æфсæддон операцийы фыццаг бонты рабæрæг ис, ОБСЕ-йы кусджытæ кæй уыдысты украинæйаг æфсæддонты шпионтæ – Донбассы территорийæ сын тымбыл кодтой информаци, арæзтой сын æфсæддон картæтæ, ифтонг сæ кодтой координаттæ. Уымæ гæсгæ ОБСЕ-йы райдыдтой НАТО-йы дæлхай хонын æмæ йыл æгас дунейы ничиуал æууæнды.
2014 азты цы бадзырдтæ сарæзтой, «Минские соглашения» зæгъгæ, уыдон дæр уыдысты сайд Герман æмæ Францы ‘рдыгæй. Германы раздæры канцлер Ангела Меркель комкоммæ басаст, зæгъгæ, уыцы бадзырдтæ уыдысты рæстæг «айвазыны» нысанæн, цæмæй Украинæйы æфсад Донбассы састы бынаты ма баззадаид æмæ сын дарддæр рæстæг уыдаид йæ хæстхъомдзинад сфидар кæнынæн. Аст азы дæргъы украинæйаг æфсæддонты сусæгæй цæттæ кодтой Уæрæсеимæ схæцынмæ æмæ æргомæй та гæды ныхæстæ кодтой.
Хæстон архæйдтыты фæстиуæгæн ма рабæрæг ис АИШ-ы биологон лабораториты нысан дæр – уыдон бирæ азты дæргъы стыр зиæнттæ хастой Уæрæсейæн æмæ ма ‘ввахс регионтæн дæр. Уымæй уæлдай ма раргом ис, Евроцæдисы бæстæтæм АИШ-ы æцæг ахаст. Террористон акты фæстиуæгæн пырх æрцыдысты «Северный поток-1» æмæ «Северный поток-2» æмæ ныр Европæйы бæстæтæ уæрæсейаг аслам æрдзон газы бæсты æлхæнынц зынаргъ америкæйаг газ. Уæрæсейæн санкцитæ расидынæй АИШ уыйбæрц ницы фесæфта, фæлæ Европæйы бæстæтæ бонæй-бонмæ стыр зиæнттæ æййафынц, сæ экономикæтæ лæмæгъ кæнынц. АИШ сæ барæй мæгуырдзинадмæ кæй тæры, уый бирæтæ æмбарынц Евроцæдисы, фæлæ сæ бон ницы у – абоны бон фактон æгъдауæй сты Вашингтоны лакейтæ.
Хурныгуылæйнаг бæстæтæ санкцитæ расидыны фæстиуæгæн æнхъæл уыдысты, ома, Уæрæсейы экономикæ нæ бафæраздзæнис уыйбæрц зиæнттæн. Фæлæ фæрæдыдысты – 14 мин санкцийы фæстæ ма Уæрæсе ноджы дæрæн кæны НАТО-йы æфсады Украинæйы территорийыл. Æмæ ныр дарддæр цы саразой, уый нал зонынц – Украинæ тагъд рæстæджы састы бынаты кæй баззайдзæнис, уый æмбарын райдыдтой, æмæ фидæны та Уæрæсеимæ ахастытæ саразын хъæудзæнис æнæмæнг. Фæлæ цы хуызы? Цæсгом сын кæй нæй, уый æгас дуне базыдта, фæлæ ма Уæрæсейы къухдариуæгады цы сразæнгард кæндзæнис семæ исты бадзырд бафыссынæй?
Сæрмагонд æфсæддон операци ма равдыста, кæй нæй сæрибар базарад, уый. Хурныгуылæйнаг бæстæтæ экономикæйы фадыджы архайынц тыхы фæрцы æмæ цæуынц æрмæстдæр пайдайы фæстæ – æхца ссис сæ иунæг «хуыцау». Цыдæриддæр бадзырдты бын бафыстой ныры онг, уыдонæн – сæ тыхы вæййынц, АИШ-ы цалынмæ фæнда, æрмæст уæдмæ.
ДЖИОТЫ Алыксандр
Comments are closed, but trackbacks and pingbacks are open.