Ацы бонты гуырдзиаг-ирон арӕнтӕм хӕстӕг территорийыл уагъд ӕрцыд Инциденттæ ма ‘руадзын æмæ сæм хъусдард здахыны фæдыл механизмты фæлгæтты форматы радон фембӕлд. Уыдон 2008 азӕй фӕстӕмӕ уагъд цæуынц Хуссар Ирыстон, Гуырдзыстон æмæ Уæрæсейы, афтæ ма Евроцæдисы æмæ ЕÆÆО-йы мисситы хъусдарджыты хайадистæй.
Фембæлдтытæ уагъд цæуынц æнæ информацион фæрæзты минæвæртты хайадистæй. Ацы фембæлды боны фæткы дзырд цыд, фӕстаг фембӕлдӕй фӕстӕмӕ арӕнтыл æрцæугæ бархалӕн цаутыл ӕмӕ Знауыры районы Уистæйы хъӕуы цы ӕнӕзакъонон гуырдзиаг полициӕгты пост ӕвӕрд ис, уый сисын ӕмӕ ӕндӕр гуманитарон нысаниуӕджы фарстытыл.
Хуссар Ирыстон дарддæр архайдзæн æнæзакъонон пост сисыныл
Механизмты фембӕлдӕн хатдзæгтæ аразгæйæ, Хуссар Ирыстонæй делегацийы сæргълæууæг, постконфликтон фарстытæ бæстонкæнынады фæдыл РХИ-йы Президенты æххæстбарджын минæвары хæдивæг Коцты Егор афтæ радзырдта, зӕгъгӕ, Хуссар Ирыстоны минӕвӕрттӕ Уистæйы хъæуы ӕнӕзакъонӕй цы гуырдзиаг полициӕгты пост ис, уый аиуварс кӕныны фарст рӕгъмӕ хӕссынц форматы алы фембӕлды рӕстӕджы дӕр. Ӕмӕ алы хатт дӕр гуырдзиаг фарсӕн ӕмбарын кӕнынц, ӕппындӕр ницахӕм мидис хӕссӕг политикон уынаффӕйы тыххӕй цы къахдзæф арæзт ӕрцыд, уый бынӕттон цӕрджытӕн у тасхӕссӕг. Уыдон, зӕгъгӕ, сты нӕ республикӕйы ӕмбӕстӕгтӕ ӕмӕ тыхсынц, ӕппынӕдзух гуырдзиаг хотыхджын полициӕгты лӕмбынӕг хъусдарды бын кӕй сты, уымӕй.
«Гуырдзиаг ӕнӕзакъонон пост уыцы бынатӕй аиуварс кӕныны фарст вазыгджын у, Хуссар Ирыстон механизмты фембӕлды ӕмӕ Женевӕйы дискусситы рӕстӕджы хъусын кӕны, цӕмӕй фарст бӕстон ӕрцӕуа. Ӕмӕ цас рӕстӕгыл уа, уыййас тагъддӕр гӕнӕн уыдзӕн ӕрбӕстон кӕнын ӕндӕр проблемӕтӕ дӕр, кӕцытӕ баст сты уыцы районы уавӕр дестабилизаци кӕнынимӕ», – банысан кодта Егор.
Хъыгагӕн, гуырдзиаг фарс нӕ хӕцы ацы хъуыдыйы фарс. Знауыры районы Уистæйы хъӕуы уыцы уавӕр куы сӕвзӕрд, уӕдӕй фӕстӕмӕ хуссарирыстойнаг фарс бирӕ хӕттыты бавдыста проблемӕ ӕрбӕстон кӕныны варианттӕ. Фӕлӕ уӕддӕр сӕйраг у, Республикӕ Хуссар Ирыстоны территорийӕ гуырдзиаг полициӕгты пост сисын ӕмӕ аиуварс кӕнын. Ууыл архайдта ӕмӕ архайдзӕн дарддӕр дӕр хуссарирыстойнаг фарс.
Фæкъаддæр сты паддзахадон арæнты
фæткхалджытæ
Коцты Егор куыд банысан кодта, уымӕ гӕсгӕ фӕстаг рӕстӕджы арӕнтыл уавӕр у сабыр. Суанг 13 декабрӕй фӕстӕмӕ бирӕбӕрцӕй фӕкъаддӕр сты арӕнтӕ халыны ӕмӕ ӕндӕр цаутӕ. Дӕнцӕгӕн ӕрхаста, ӕнӕпилотон тӕхӕн аппараттимӕ баст инцидентты нымӕц кӕй фӕкъаддӕр, хынцыд нал ӕрцыд арӕнтӕм ӕввахс гуырдзиаг полициӕгты уӕвынад. Йӕ ныхӕстӕм гӕсгӕ уый бахынцыдтой куыд хуссарирыстойнаг, афтӕ гуырдзиаг фарс дӕр.
Делегацийы сӕргълӕууӕджы ныфс ис, ацы тенденци дарддӕр кӕй кӕндзӕн. Фӕлӕ уый баст у механизмты хайадисджытыл, фылдӕрбӕрцӕй гуырдзиаг минӕвӕрттыл. Уыдон фылдӕр хъусдард хъуамӕ здахой Гуырдзыстоны территорийыл цӕрджытӕн ӕмбӕлон информаци дӕттынмӕ – паддзахадон арӕнтӕ кӕуылты цӕуынц, арӕнты фӕтк халыны тыххӕй ахст ӕмӕ ивар кӕй цӕудзысты, суанг уголовон хъуыддаг бакӕныны онг.
Коцты Егоры ныхӕстӕм гӕсгӕ арӕнтӕ ӕмӕ ӕндӕр фӕткхалӕн цаутӕ кӕй фӕкъаддӕр сты, уый баст у уыимӕ, ӕмӕ гуырдзиаг ӕмбӕстӕгтӕ кӕй бамбӕрстой, радон бархалӕн цауы тыххӕй ахст кӕй ӕрцӕудзысты ӕмӕ бӕрндзинад кӕй хӕсдзысты.
Механизмты фембӕлды хайадисджытӕ куыд бауынаффӕ кодтой, уымӕ гӕсгӕ радон фембӕлд уагъд ӕрцӕудзӕн 20 марты.
КЪӔБУЛТЫ Маринæ
