12-æм июны Хуссар Ирыстоны цытджын æгъдауæй банысан кæнынц Уæрæсейы бон. Уыцы бон уагъд æрцæуынц бирæ культурон мадзæлттæ æмæ сæ ирон æмæ уырыссаг адæмтæ иумæйагæй хайад райсынц.
Нæ республикæйы Культурæйы министрады пресс-службæйы нын куыд фехъусын кодтой, афтæмæй Уæрæсейы боны цытæн Цхинвалмæ концертон программæимæ фæуазæг уыдзæн Мæскуыйы кафты паддзахадон академион ансамбль «Гжель». Ансамбль «Гжель» сырæзт 1988 азы зындгонд хореограф Владимир Захаровы архайды руаджы. Ацы ансамблæн ис хъæздыг æмæ цымыдисон концертон репертуар æмæ зындгонд у, куыд Уæрæсейы Федерацийы, афтæ фæсарæнты дæр.
Бæрæгбонон концерт уыдзæнис Хетæгкаты Къостайы номыл Хуссар Ирыстоны паддзахадон драмон театры. Хуссар Ирыстоны ацы концерт, сæйраджыдæр, реализацигонд цæуы нæ республикæ æмæ Уæрæсейы Федерацийы культурæты министрадты бадзырдмæ гæсгæ, Росконцерты æххуыссæй, программæ «Обменные культурные мероприятия России и Южной Осетии»-йы фæлгæтты.
