Нæ республикæйы Культурæйы министр Зæгъойты Радайы фæхуындмæ гæсгæ Цхинвалмæ дыууæ боны æмгъуыдмæ гастролты æрцыдис Ханпаши Нурадиловы номыл Цæцæны Республикæйы паддзахадон драмон театры труппæ, театры аивадон къухдариуæггæнæг-директор æмæ режиссер Хава Ахмадовайы сæргълæудæй.
Цæцæйнаг театры артисттæ ирон сценæмæкæсджытæн равдыстой дыууæ спектаклы. Фыццаг бон адæмы рæгъмæ рахастой Цæцæны Республикæйы адæмон фыссæг, драматург Мусса Ахмадовы пьесæмæ гæсгæ æвæрд эпикон спектакль «Выше гор», зæгъгæ, ахæм номимæ. Йæ æвæрæг-режиссер у Цæцæны республикæйы адæмон артисткæ Ахмадова Хава. Спектаклмæ æрбацыдис тынг бирæ адæм, залы иу сæрибар бынат дæр нал баззад. Ацы спектаклы режиссеры æрмæст традицитæ æмæ æгъдæуттæ равдисын нæ фæндыд, фæлæ ма цалдæр æнусты дæргъы цæцæйнаг адæмы цардуаг, сæ менталитет куыд рæзт, стæй сæ уæззау царды уавæртæ, знаджы æрбабырстытæн фидар куыд лæууыдысты æмæ уыимæ иумæ та тыхджын кæй кодтой удыхъæдæй. Спектаклы, сæйраджыдæр, æвдыст цæуы знаджы ныхмæ схæцынмæ-иу чи ферæджы кодта, ахæм хæстоны къæдзæхæй æппарыны рагон фыдæгъдау куыд аивтой, афтæ ма тугисыны, ныббарын æмæ уарзондзинады тыххæй. Цæцæйнаг лæг йæ ныхасæн аргъ кæй хъуамæ кæна, цыфæнды тыхмиты æмæ фыдæвзарæнты раз дæр хъаруджын æмæ хъæбатырæй кæй хъуамæ лæууа, кæд æмæ де знаг раст адæймаг у, уæд уымæ дæр æмбаргæ ахаст дарын кæй хъæуы.
Спектакль «Выше гор»-æн аргъ кодтой Уæрæсейы Федерацийы бирæ горæтты æмæ-иу ыл кæддæриддæр сценæмæкæсджытæ æмбæлдысты зæрдиагæй æмæ стыр цымыдисимæ. Спектаклæн лæвæрд æрцыд Цæцæны Республикæйы Паддзахадон преми, афтæ ма ссис дунеон фестиваль «Сцена без границ»-ы уæлахиздзау «Хуыздæр спектакль»-ы номинацийы.
Дыккаг бон та, 28-æм ноябры нæ театры сценæйыл цæцæйнаг труппæ равдыстой спектакль «В горы за тобой», кæцыйы сæйраг ролтæй сæ иуы сæххæст кодта Уæрæсейы Федерацийы сгуыхт артисткæ Ольга Кабо.
Цæцæйнаг театры аивадон къухдариуæггæнæг йæхæдæг куыд банысан кодта, уымæ гæсгæ ацы спектакль у интернационалон проект. Арынц дзы Стыр Фыдыбæстæйон хæсты чи фæмард, уыдоны рухс нæмттæ. Сæвæрдтой йæ Стыр Уæлахизыл 75 азы сæххæсты цытæн. Йæ сюжет у цымыдисон, æппæтæн дæр у æмбæрстгонд æмæ зæрдæйæн æввахс. Уæззау æмæ хæстон фæндæгтыл рацæугæйæ, бирæ адæмы хæттытæ дæр куыд баиу сты æмæ иумæйаг знаджы ныхмæ, фашизмы ныхмæ куыд тох кодтой, стæй сабырадмæ куыд тырныдтой, фыдæхдзинадыл кæй фæуæлахиз сты æмæ адæймагдзинад та сæйраджыдæр кæй у, уыдæттæ ирдæй равдисын бантысы артисттæн.
Нæ уацх.
