Гаглойты Алан нæ республикæйы Президенты бынаты кусы афæдз. Цы сарæзта, цы йын бантыст, уый тыххæй нын сæ хъуыдытæ раргом кодтой:
Саулохты Георги Хъазбеджы фырт – республикæйы бирæпрофилон медицинон центры тынон (лучевой) диагностикæйы хайады сæргълæууæг, РХИ-йы Шахматты федерацийы президент, æвзонг нывгæнджыты сфæлдыстадон къорд «Цхинвал – 5»-ы къухдариуæггæнæг:
– Æз райгонд дæн Гаглойты Аланæй, уымæн æмæ йе ‘ххуысæй Хуссар Ирыстоны æвзонг нывгæнджытæн цасдæр рæстæджы фæстæ фыццаг хатт фадат фæцис се сфæлдыстад республикæйæн æддейæ – Санкт-Петербурджы равдисынæн. Йæ хъæппæрисæй Хуссар Ирыстоны сфæлдыстадимæ базонгæ сты Эрмитажы, Уырыссаг музейы, Санкт-Петербурджы интеллигенцийы минæвæрттæ. Уыцы хъуыддаг тынг хорз у æрмæст нывгæнджытæн нæ, фæлæ нæ республикæйæн йæхицæн дæр. Хуссар Ирыстоны дуне зонынц хæстон архæйдтытæй. Махæн та ис нæхи истори, тынг хъæздыг культурæ æмæ хъуамæ архайæм уыцы æргъадтимæ дунейы базонгæ кæныныл.
Битарты Зойæ Александры чызг – Тыбылты Алыксандры номыл ХИПУ-йы профессор, Уанеты Захары номыл Хуссар Ирыстоны зонад-иртасæн институты ахуыргонд нымæрдар:
Гаглойты Алан бирæ нæ кусы президенты бынаты, фæлæ йын бирæ бантыст саразын. Арæх нæм вæййынц форумтæ дæр æмæ фембæлдтытæ дæр. Афтæ мæм кæсы, æмæ архайы, цæмæй фæлтæрддзинад райса æндæр республикæты разамонджытæй, æмæ уый хорз хъуыддаг у. Æз куыд хъуыды кæнын, афтæмæй йын бантысдзæн хорз хъуыддæгтæ саразын, уымæн æмæ йæ фæнды тынг бирæ саразын.
Йæ раныхæсты дæр фыццаг иронау кæй радзуры, уый фæстæ та уырыссаг æвзагмæ кæй рахизы, уый дæр кæуылты стыр хъуыддаг у. Æз никуы хъуыды кæнын, æмæ йæ раныхас иронау ма райдайа. Дыууæ æвзаджы дæр паддзахадон æвзæгтæ сты æмæ куыд Президент, афтæ сæ иттæг хорз хаты. Уырны мæ, ирон адæм уымæ хъусгæйæ, рыздæхдзысты ирондзинадмæ, ирон æвзаг æмæ ирон æгъдаумæ.
Афæдзы куыст республикæйы Президентæн кæд егъау рæстæг нæу, уæддæр нæ сомбоны райрæзтæн йæ разы цы хæстæ æрæвæрдта, уыдон царды акæнынæн, æвæццæгæн, дырыс фæндæгтæ равзæрста. Уынæм ын йæ активон архайд æппæт фадгуыты дæр, хъусæм ын йæ ирон ныхас.
Æз, куыд ирон æвзаг иртасæг, куыд ирон æвзаджы культурæйы практикон кусæг, афтæ хатын нæ цытджын Президентмæ: цæмæй Республикæ Хуссар Ирыстоны ирон паддзахадон æвзаг йæ бынат æрцахса, уый тыххæй хъæуы райсын сæрмагонд мадзæлттæ сабидонæй æппæт иннæ ахуырадон уагдæтты архайды, Республикæ Хуссар Ирыстоны истори, географи, национ традицитæ, базон дуне (æрдззонынад), технологи… адæттæ кæд ахуыр кæной иронау, уæд ирон æвзагæн йæ тау-уидаг фæфидар уыдзæн.
Фæндараст – æнтыстытæм!
Сланты Мадинæ, Ленингоры районы администрацийы ахуыры хайады хистæр
– Нæ бæстæйы сæргълæууæг Гаглойты Аланы æнтыстджын куыст бæрæгæй фæзынд нæ районыл. Президенты барамындæй районы сæргълæууæгæй нысан æрцыд Гæджиты Иларион. Уый йæ куысты фыццаг бонтæй æрбалæууыд адæмы фарсмæ, йæ бон цы у уымæй сын скъуыддзаг кæны сæ зындзинæдтæ æмæ проблемæтæ. Æмæ уый, кæй зæгъын æй хъæуы, хорзæрдæм æндавы районыл. Мæ хъуыдымæ гæсгæ, дарддæр дæр афтæ куы куса, уæд ын нæ республикæйæн бантысдзæн бирæ саразын.
Дриаты Иринæ, Ленингоры районы Орчъосаны астæуккаг скъолайы директор
– Президент Гаглойты Аланы куыст мæ зæрдæмæ тынг цæуы, уæлдайдæр та йæ алы раныхасы дæр мадæлон æвзагыл кæй фæдзуры, уый. Ирон æвзаг бæрзонд æмвæзадмæ кæй исы æмæ йын афтæ тынг кæй аргъ кæны, уымæй цæвиттон у бæрнон бынæтты кусджытæ æмæ кæстæр фæлтæрæн дæр.
