Куыд Уæрæсейы, афтæ Хуссар Ирыстоны паддзахадон университеты дæр цытимæ банысан кодтой «Студенты бон». Студенттæ сæхи æмæ ацы бæрæгбоны тыххæй нæ уацхæссæгæн радзырдтой сæ хъуыдытæ.
Гаглойты Эдгар. Инженерон-экономикон факультеты 3-аг курсы студент.
Уæлдæр ахуыргæнæндоны ахуырæй дæн райгонд, фæлæ скъолайы бонтæ æрымысын арæх. Сæрыстыр дæн, нæхи университетмæ кæй бацыдтæн, уый тыххæй. Райгонд дæн мæ лектортæй, ректор Тедеты Вадимæй. Уый æппæт дæр аразы, цæмæй студенты цард уа цымыдисон, райдзаст æмæ æнтыстджын. Раст фæндагыл цæуын, ахуыр кæнын æмæ нæ æндæр хорз миниуджытыл цайдагъ кæны университеты проректор Цхуырбаты Иннæ.
Гасситы Антон. Журналистикæйы факультеты 4-æм курсы студент.
Æз дæр скъолайы стырдæр хъусдард здæхтон ирон æвзаг æмæ литературæмæ. Уымæн æмæ ирон адæймаг фыцаджы-фыццаг хъуамæ зона йæ мадæлон æвзаг. Æвæццæгæн мæ уый сразæнгард кодта æмæ бацыдтæн нæхи университетмæ. Абоны уонг уымæй дæн сæрыстыр. Нæ размæ университет каст чи фæцис, уыдон ма арæх тæхуды дæр бакæнынц, зæгъгæ, ахæм ахуыргæнæндоны ахуыр кæнын амондджын хъуыддаг у. 8-æм къласы ма куы ахуыр кодтон, уæд аскъуыддзаг кодтон журналист суæвын. Фадат мын уыд Уæрæсейы уæлдæр ахуыргæнæндæттæм ацæуынæн дæр, фæлæ абон иу уысм дæр никуы æрфæсмон кæнын, нæхи университетмæ кæй бацыдтæн, уый тыххæй. Æппыныдзух архайын ХИПУ-ТВ йы куысты. Уый мæ ноджы тынгдæр разæнгард кæны ахуырмæ æмæ абоны бæрæгбоныл æмбæлын цины æмæ æнтыстыты æнкъарæнтимæ.
Медойты Аннæ. Æппæтадæмон ахастыты историйы 4-æм курсы студент.
Райдиан кълæсты ахуыр кодтон мæгуырау, фæлæ ахуыры стыр нысаниуæг куы бамбæрстон, уæд æппæт мæ тыхтæ радтон ахуыр кæнынмæ æмæ астæуккаг скъола каст фæдæн хорз æмæ иттæг хорз нысæнттыл. Цалынмæ ма скъолайы ахуыр кодтон, уæдмæ дæр студенттæн мæ цæсты уыд стыр кад æмæ мæхæдæг студент куы сдæн, уæд мæ цинæн кæрон дæр нал уыд. Цалдæр азы стыр цины æнкъарæнтимæ ме ‘мкурсонтимæ фæнысан кæнæм студенты бон æмæ та ацы аз дæр рауад афтæ.
Тыджыты Кристинæ. Юридикон факультеты 5-æм курсы студент.
Цалынмæ студент не сдæн, уæдмæ дæр мын студенттæм уыд хъарм ахаст æмæ мæ тынг фæндыд, цæмæй æз мæхæдæг дæр суыдаин студент.
ХИПУ-мæ кæй бацыдтæн, юридикон факультет кæй равзæрстон, уый мын æппынæдзух хæссы æхцондзинад æмæ мæ разыллæууæг хæстæ æххæст кæнын æппæт домæнтæм гæсгæ. Райгонд дæн университеты ректорат, лектортæ æмæ ахуыргæнджытæй. Уыдон хорз æмæ иузæрдион ахастыты фæрцы райстон бирæ зонындзинæдтæ æмæ мæ уырны, уыцы зонындзинæдтæй кæй пайда кæндзынæн, университет каст куы фæуон æмæ кусын куы райдайон, уæд.
Къуылыхты Ланæ. Инженерон-экономикон факультеты 5 курсы студент.
Цалынмæ ма скъолайы ахуыр кодтон, уæдмæ студенттæм кодтон тæхуды. Мæхæдæг студент куы сдæн, уæд та мæм афтæ каст, раст цыма æндæр дунемæ бахаудтæн. Уый мын бирæбæрцæй фæахъаз ахуыр кæнынмæ хъус хуыздæр æрдарынæн. Фæнды мæ ацы райдзаст æмæ рæсугъд бæрæгбон раарфæ кæнон æрмæст нæ университеты студенттæн нæ, фæлæ абон студенты ном чидæриддæр хæссы, уыдонæн се ‘ппæтæн дæр. Мæ зæрдæ сын зæгъы æнæниздзинад, абон ахуыры æмæ сом та куысты стыр æнтыстытæ.
Дзигойты Каринæ. Прикладон математикæ æмæ информатикæйы факультеты 3-аг курсы студент.
Студент куы сдæн, уæд мæхи банымадтон амондджыныл. Æххæст кæнын райдыдтон студенты æнæмæнгхъæуæг æмæ ахсджиаг хæстæ. Æмæ мын ис хорз æнтыстытæ, исын президенты стипенди.
ГÆЗЗАТЫ Иван
Comments are closed, but trackbacks and pingbacks are open.