Кæд ныры дуджы машинæты нымæц бæрæг фæфылдæр æмæ бонæй-бонмæ фылдæр кæнынц, уæддæр алкæмæн йæ балхæныны фæрæз нæй. Стæй дын куы уа, уæддæр дæ таксийы сæр кæддæр бахъæудзæнис. Не ‘мбæстæгтæй бирæтæ кусынц таксисттæй. Чи дзы æппынæдзух кæны ацы куыст, чи та – рæстæгæй-рæстæгмæ. Нæ горæты уынгты бирæ ис фенæн ахæм машинæтæ, кæцытæ бæрæг вæййынц сæрмагонд нысæнттæй. Ис ма нæм ахæм такситæ, кæцытыл ницы бæрæггæнæн нысæнттæ ис, фæлæ сæм фæхъæуы телефонæй бадзурын.
Хицауады къухдариуæгады æрдыгæй ис уæлдай хъусдард ацы транспорты категоримæ. Ома не ‘мбæстæгтæ цæмæй æдæрсгæйæ æмæ, уæлдайдæр та, æдасæй, æнæфыдбылызæй пайда кæной такситы лæггæдтæй, уый фæдыл рæстæгæй-рæстæгмæ уагъд фæцæуынц рейдон мадзæлттæ, кæцыты рæстæджы рабæрæг кæнынц æнæзакъонæй чи кусы таксистæй, уыдоны.
Ныридæгæн дæр та милицийы Экономикон фыдракæндты ныхмæ управленийы, Хъалонты æмæ фиддонты фæдыл комитет æмæ Лицензион управленийы кусджытæ ауагътой рейдон мадзæлттæ Цхинвалы. Басгæрстой 30 такси-машинæйæ фылдæр æмæ дзы æрмæстдæр æхсæзмæ разындис бары гæххæттытæ. Иннæ шофырты бафæдзæхстой, цæмæй сæ документаци æрнывыл кæной 14 октябрмæ, кæннод иваргонд цæудзысты. Закъонмæ гæсгæ та ивар кæндзысты 15 мин сомы бæрц. Рейдон мадзæлттæ уагъд цæуыдзысты æрвылбон.
Рейдты рæстæджы-иу сгарджыты фенгæйæ, бирæ таксисттæ сæ сæрмагонд ныссæнттæ феппæрстой, абадтысты-иу сæ машинæтыл æмæ-иу аскъæрдтой. Ахæм рæстæджы зын рабæрæг кæнæн у, такси машинæ у, æви нæ, æмæ йæ бæрндзинадмæ дæр не ‘ркæндзынæ. Сгæрст цы машинæтæ æрцыдысты, уыдоны шофыртæ дæр сæ æнæразыдзинад равдыстой лицензи райсыны процедурæйы фæдыл. Банысан кодтой, зæгъгæ, йын æгæр вазыгджын схемæ ис, стæй ма хъалон дæр æгæр бирæ у.
Цæмæй таксист бары гæххæтт райса, уый тыххæй хъуамæ Хъалонты æмæ фиддонты фæдыл комитеты номхыгъды слæууа куыд индивидуалон амалиуæггæнæг, æмæ æрвылмæй дæр фида 450 сомы. Уый фæстæ йын Лицензион управленийы ратдзысты бары гæххæтт, ома лицензи, æртæ азы æмгъуыдмæ. Лицензийæн та хъæуы бафидын 880 сомы. Таксисттæй бирæтæ зæгъынц, зæгъгæ, ацы куыст фæкæнынц рæстæгæй-рæстæгмæ, куы сæ февдæлы сæ иннæ хъуыддæгтæй, уæд, æмæ фидын та хъæуы æрвылмæй.
Хъалонты æмæ фиддонты фæдыл комитеты кусæг Цхуырбаты Вадим куыд банысан кодта, афтæмæй рейдон мадзæлттæн ис æвæрццаг фæстиуджытæ. Кæй бафæдзæхсынц, уыцы шофыртæн сæ фылдæр хай райсынц лицензи. Фæндагон змæлды æдасдзинады инпектортæ дæр ивар кæнынц, бары гæххæттытæ кæмæ нæ вæййы, уыцы таксистты, фæлæ ивары бæрц у æрмæстдæр 150 сомы æмæ дзы уый фæдыл ничи тæрсы. Ӕмæ ацы проблемæ хъæуы тагъддæр аскъуыддзаг кæнын, уымæн æмæ баст у адæмы æдасдзинадимæ.
Ацы хъуыддаджы æрмæст лицензи нæу проблемон. Бирæ такси- машинæты техникон уавæр ахæм æвзæр у, æмæ уыцы машинæ фæндагмæ рахизгæйæ йæхæдæг хæссы фыдбылыз. Стæй ма шофыртæй дæр бирæтæ сты ас кары адæм, кæмæн дзы йæ бон машинæ скъæрын нал у, чи дзы цæстæй æвзæр уыны, фæлæ уæддæр адæмы ласынц. Уый та стыр тæссагдзинад æвзæрын кæны, уымæн æмæ чысыл сывæллæттæ фæцæуынц куыд фистæгæй, афтæ такситыл дæр. Ӕмæ уыдон та сты иууыл хъахъхъæнинагдæр æмбæстæгтæ.
ДЖИОТЫ Александр
Comments are closed, but trackbacks and pingbacks are open.