Æмбæлон хъусдард – фæндагон змæлды нысæнттæм

Æхсызгон у, нæ горæты фæстаг рæстæджы бирæ уынгтæ хæрзарæзт кæй цæуынц, уый. Æрмæст Мæскуыйы уынгыл ацы мæй монтажгонд æрцыд цыппар æнхъæлмæкæсæн бæлццæттæн. Фыццаг светофортæ фæзынд скъолаты рæзты дæр. Уый тыххæй нын горæты администрацийы пресс-службæйы афтæ загътой:

«Иумæйаг ахуырадон скъолатæ æмæ сабиты рæвдауæндæтты раз æвæрд æрцæудзæнис сæрмагонд светофортæ, ныллæг æфсæн цæджындзтыл кондæй. Уыцы ногдзинæдтæ здæхт сты фæндагон змæлды рæстæджы сывæллæтты æдасдзинад бахъахъхъæныны тыххæй, æмæ реализаци цæуы, Хицауад цы проект сфидар кодта «Æдас горæт», – зæгъгæ, уый фæлгæтты», – зæгъы Коцты Зæринæ.

Проект æххæст цæуы Паддзахадон автоинспекцийы æмархайдæй. Ныридæгæн ахæм светофортæ фæзынд Джиоты Аланы проспектыл 6, 2, 5, скъолаты рæзты. Скъоладзауты фæндагæн иннæ фарсмæ ахизыны размæ бахъæудзæн бахæцын светофоры нысаныл, цæмæй ссудза цъæх рухс æмæ маши-нæтæ бауромой.

Мах катайдзинад равдыстам, ацы системæ куы скуса, уæд ахуыргæнинæгтæ иугай-дыгай куы хæцой светофоры кнопкæйыл æмæ æппынæдзух машинæты змæлд куы лæууын кæной. Уый тыххæй нын горæты администрацийы цæрæн коммуналон хæдзарады хистæр Лалыты Сослан афтæ загъта: «Куыддæр монтажгонд  фæуæм  светофортæ, скъолатæ æмæ рæвдауæндæтты рæзты æмæ уыцы ногдзинад скуса, афтæ мах, администрацийы кусджытæ, паддзахадон автоинспецийы инспектортимæ иумæ ауадздзыстæм скъоладзауты ‘хсæн, светофортæй пайда кæныны фæтк бамбарыны нысанæн. Канд светофортæ нæ, фæлæ ма сабиты æдасдзинад бахъахъхъæныны нысанæн, мах, скъолаты æмæ рæвдауæндæтты рæзты сæвæрдтам ныллæг æфсæн æмбæндтæ, фæндагыл сарæзтам асфальтæй чысыл обæуттæ (лежачий полицейский), цæмæй тагъд цы шофыртæ скъæрынц, уыдон ацы бынæтты сæ машинæты змæлд фæсабырдæр кæной».

Нæ уацх.