Барухс сын кæндзысты сæ зæрдæтæ

Цхинвалы районы администрацийы Культурӕйы управленийы (йӕ сӕргълӕууӕг – Гаглойты Ростислав) уӕвынад кӕнынц хореографион ансамбль «Ирыстон», зарӕггӕнджыты къорд ӕмӕ ӕндӕр сфæлдыстадон къордтæ. Уыдон арӕх фӕуазӕг вӕййынц куыд районы, афтӕ ма республикӕйы æндæр хъӕутӕм дӕр, равдисынц концерттӕ ӕмӕ сӕ базонгæ кӕнынц сӕ зӕрдӕмӕдзӕугӕ аивадимæ. Артистты ралӕуд алы хатт дӕр вӕййы цымыдисон ӕмӕ хорз тӕлмӕнтӕ ныууадзынц сценӕмӕкӕсджытыл. Культурӕйы министрады ӕххуысæй уыдон ӕнӕаргъӕй концерттӕ равдыстой Знауыр ӕмӕ Къуайсайы фӕллойгӕнджытӕн. Культурӕйы министрады нысан у, цӕмӕй сӕ республикӕйы иннӕ районтӕ дӕр бафӕзмой ӕмӕ бынӕтты сӕндидзын кӕной куыд кӕстӕр, афтӕ хистӕр фӕлтӕрӕй дӕр аивадон коллективтӕ. Концертты хайад райстой «Амонд»-ы ӕвзонг кафджыты къорд ӕмӕ фольклорон ансамбль. Сӕ репертуары уыдысты ирон дзыллон кафт «Симд», «Чепена», «Сандрахъ», «Сыбайаг кафт», «Хӕххон кафт», «Чызджыты кафт» ӕмӕ ӕндӕртӕ. Ацы ансамблы аивадон къухдариуӕггӕнӕг у Санахъоты Сослан ӕмӕ хореограф-балетмейстер та – Дыгъуызты Владимир. Уымӕй дарддӕр ма сценӕтӕй зӕлланг кодтой ирон ӕмӕ уырыссаг зарджытӕ, уыдон ӕххӕстгӕнджытӕ та уыдысты Гогинова Кристина, Хацырты Земӕ ӕмӕ Задыты Олеся. Сӕ аивадон къухдариуӕггӕнӕг у дӕсны фӕндырдзӕгъдӕг ӕмӕ зарӕггӕнӕг Саппиты Зӕлинӕ. Концерттӕй разыйӕ баззадысты сценӕмӕкӕсджытӕ, сӕ зӕрдӕмӕдзӕугӕ ралӕуд сыл ныууагъта хорз тӕлмӕнтӕ ӕмӕ сӕ бафӕндыд, цӕмӕй сӕм арӕхдӕр цӕуой ахӕм хъӕздыг аивадимӕ.

ХУЫБИАТЫ Никъала