19-æм майы Цхинвалы 10-æм астæуккаг сколайы, фыссæг æмæ поэт Джиоты Дауыты райгуырдыл 110 азы сæххæсты боны цытæн уагъд æрцыдис гом урок «Адæм, дæ хъæбул дæн æз», зæгъгæ. Хайад дзы райстой горæты ахуырады къабазы минæвæрттæ, ахуыргæнджытæ æмæ хистæр кълæсты ахуыргæнинæгтæ.
Урок уагъта Хуссар Ирыстоны сгуыхт ахуыргæнæг Джиоты Мананæ. Уый банысан кодта, зæгъгæ, кæд Дауытæн йæ уæнгтæ нæ кастысты йæ коммæ, уæддæр цы уацмыстæ сфæлдыста, уыдон адæмы зæрдæмæ цыдысты. Кастысты æмæ сæ абон дæр кæсынц стыр цымыдисимæ.
Йæ раныхасы фæстæ скъолайы хистæр кълæсты ахуыргæнинæгтæ Джиоты Алинæ, Алан, Битеты Миленæ, Марат æмæ æндæртæ бакастысты Дауытæн йæхи фыст æмæ Дауытыл фыст æмдзæвгæтæ.
Уый фæстæ Дауыты цард æмæ сфæлдыстады тыххæй Джиоты Мананæ йæ ахуыргæнинæгтæм цы фарстытæ лæвæрдта, уыдонæн иста æмбæлон æмæ бæстон дзуаппытæ. Ирдæй бæрæг уыд, скъоладзаутæ лæмбынæг кæй сахуыр кодтой Джиоты Дауыты сфæлдыстад.
Гæззаты Иван
