12-14 майы Мæскуыйы областы горæт Долгопрудныйы уагъд æрцыд Европæйы чемпионат пауэрлифтингæй. Хуссар Ирыстоны æмбырдгонды сконды уыд фараст спортсмены æмæ иууылдæр систы призертæ. Ерысты хайад райстой 600 адæймагæй фылдæр æмæ дзы уæзы категоритæ дæр уыдис дæсæй фылдæр. Номинациты фылдæр хайы нæ спортсментæ сæхи равдыстой хорз. Ӕдæппæт рамбылдтой 31 майданы – 27 фыццаг бынæтты, 3 æвзист майданы æмæ иу та бронзæ.
Мидхъуыддæгты министрады кусджытæй æртæйæ уыдысты командæйы сконды æмæ сæхи равдыстой тынг хорз – рамбылдтой 14 майданы. Цхинвалы районы милицæйы управ-ленийы кусæг Гаглойты Леван æрæвæрдта Уæрæсейы рекорд бицепсæй уæз сисынæй. Слестгæнæн управленийы кусæг Къудухты Сослан та сæххæст кодта спорты мастеры норматив.
Милицæйы сæрмагонд нысаниуæджы къорды взводы командир Хъоцыты Азæмæт хайад иста 100 килограммы категорийы æмæ «народный жим»-ы номинацийы райста фыццаг æмæ дыккаг бынæттæ. «Жим лежа без экипировки»-йы номинацийы та бацахста æртыккаг бынат.
110 килограмм уæзы та архайдта Къудухты Сослан æмæ «пауэрлифтинг» æмæ «пауэрспорт»-ы номинациты бацахста фыццаг бы-нæттæ. «Жим лежа» номинацийы та сæххæст кодта спорты мастеры норматив.
Гаглойты Леван архайдта 66 килограммы уæзы æмæ 8 номинацийы бацахста фыццаг бынæттæ, иу номинацийы та райста дыккаг бынат.
Хуссар Ирыстоны спортсментæ фыццаг хатт хайад исынц ахæм егъау спортивон мадзалы паддзахадон тырысаимæ. Ацы ерысты вæййынц Уæрæсейы регионтæй æмæ фæсарæн-тæй, 15 азæй фылдæр кæуыл цæуы æмæ æмбæлон спортивон-техникон цæттæдзинад кæмæ ис, ахæм спортсментæ.
Джиоты Алыксандр
