Фыдыбæстæ хъахъхъæнæджы боны цытæн Æвзонг натуралистты станцы ауагътой бæрæгбонон мадзал æмæ дзы хайад райстой нæ горæты скъолаты ахуыргæнинæгтæ.
Ацы уагдоны организатор Джиоты Нана радзырдта Стыр Фыдыбæстæйон хæсты не ‘мбæстæгтæ цы сгуыхтдзинæдтæ æвдыстой, 1989-2008 азты нæ лæппутæ сæ райгуырæн зæхх æмæ бинонты хъахъхъæнгæйæ се ‘мбæстагон хæс куыд æххæст кодтой, уыдæтты тыххæй. «Æхсæвæй-бонæй уазал акъоппыты чи бадт, алы уысм дæр знаджы мæлæтхæссæг нæмгуытæй тас кæмæн уыд æмæ афтæмæй мах чи бахъахъхъæдта, уыцы лæппутæн кад кæнын хъæуы. Кад кæнын хъæуы уыцы тохты чи бабын æмæ абон не ‘хсæн чи нал ис, уыдоны бинонтæн дæр. Хъайтарты номарын хъæуы æрмæст мæнæ ахæм нысаниуæгджын бон нæ, фæлæ æрвылбон дæр. Чи кæцы скъолайы ахуыр кæны, уыцы скъолатæй цы рауагъдонтæ фæмард, уыдоны нæмттæ хъуамæ зонат», – дзырдта ахуыргæнæг скъоладзаутæн.
Ныртæккæ сæрмагонд æфсæддон операцийы нæ хæстон лæппутæ цы сгуыхтдзинæдтæ æвдисынц, уый тыххæй дæр скъоладзаутæн радзырдтой бæрæгбонон мадзалы. Сæрмагондæй æрæмысыдысты ацы хæсты цы лæппутæ фæмард, уыдон рухс нæмттæ.
Нæ уацх.
