Райгуырæн къуым адджын æмæ зынаргъ у æмæ йын йæ сæрибардзинад хъахъхъæнын, фыццаджыдæр у, чи йыл цæры, йæ фыццаг къахдзæфтæ цы зæххыл акодта, цардмæ уæрæх фæндæгтæ кæмæн байгом кодта, уыдонæн. Афтæ у райдианæй фæстæмæ не ‘мбæстæгтæн дæр сæ уарзон Ирыстон. Æмæ æрмæст уарзон Фыдыбæстæ нæ, фæлæ ма йæм хæлар æмæ уарзон ахаст чи дары, уыцы адæмтæм дæр бахъуаджы рæстæджы фæдаргъ кæнынц се ‘ххуысы къух. Ныр дæр Стыр Уæрæсе зын уавæры куы ис, уæд фæстæ нæ фæлæууыдысты нæ цæхæрцæст лæппутæ, æмæ аккаг ныхкъуырд дæттынц ныхмæлæуджытæн.
Украинæйы æнæмсæр тохмæ бархийæ ацыдысты Цхинвалы районы Къостайыхъæуæй дæр цалдæр хæстоны æмæ сæхи æвдисынц хъæбатырæй. Стыр хъыгагæн, сæ иу Лохты Алим хъæбатырæй фæмард, Уæрæсейы Президент В. Путин æй схорзæхджын кодта «Хъæбатырдзинады орден»-æй, нæ республикæйы Президент Гаглойты Алан та йын саккаг кодта республикæйы уæлдæр хорзæх «Уацамонгæ».
Афтæ сты райдианæй фæстæмæ уарзон фыдыбæстæйы иузæрдион цæхæрцæст гуырдты сгуыхтдзинæдтæ. Уыдон номыл æрвылаз дæр цытимæ банысан кæнæм Фыдыбæстæ хъахъхъæнæджы бон, æрдзурæм сын сæ æгæрон хъайтардзинæдтыл, сæ хайбавæрд сабырад, хæдбардзинад æмæ адæмты хæлардзинадмæ.
Къостайыхъæуы астæуккаг скъолайы дæр уыд ахæм мадзал æмæ йæ бацæуæн ныхасæй байгом кодта æмæ æрæмбырдуæвджытæн арфæйы ныхæстæ загъта скъолайы директор Плиты Заирæ. Ахуырдзаутæ Тъотъоты Амандæ, Тараты Янæ, Хуыбиаты Аделинæ, Азæмæт æмæ Дауыт цины æнкъарæнтимæ азарыдысты цалдæр зарæджы ирон æмæ уырыссаг æвзæгтыл, бакастысты æмдзæвгæтæ. Ирон адæмон кæфтытæ «Хонгæ» æмæ «Æнæнкъуысгæ кафт»-æй та адæмы зæрдæтæ барухс кодтой Джусойты Георги, Саулохты Ланæ, Джиоты Кристинæ, Хуыбиаты Миланæ, Камилæ, Азæмæт, Аслан æмæ Эдик.
Къостайыхъæуы цæрджытæ ссардтой Украинæйы зæххыл фæмардуæвæг Лохты Алимы рухс ном.
Культурæйы хæдзары коллективы номæй адæмæн арфæйы ныхæстæ загътой Мамиты Дзерассæ æмæ Джиоты Миланæ. Уый фæстæ бæрæгбонон агъуысты айзæлыдысты «Хистæрты зарæг» æмæ «Катюша». Фæстæ нæ фæлæууыдысты æвзонг кафджытæ дæр æмæ аив сæххæст кодтой «Хонгæ», «Хæххон кафт», «Смуглянка» æмæ «Зилгæ».
ХУЫБИАТЫ Никъала
