Бæрæгбонон концерт – 8-æм марты цытæн

9-æм марты Тедеты Георгийы номыл Цхинвалы 1-æм музыкалон скъолайы уагъд æрцыд бæрæгбонон концерт – Сылгоймæгты Дунеон бон 8-æм марты цытæн. Концерты хайад райстой музыкалон скъолайы фортепиано, хор, скрипкæ, гитарæ, аккордеон, вокалон æххæсткæнынад æмæ домрæйы хайадты хъомылгæнинæгтæ. Ацы скъолайы традицион ссис æрвылаз дæр ахæм бæрæгбонон концерттæ уадзын.

Мадзалмæ æрбамбырд сты музыкалон скъолайы ахуыргæнинæгтæ,  аивадæн табугæнджытæ, РХИ-йы Культурæйы министрады æмæ горæт Цхинвалы администрацийы культурæйы хайады минæвæрттæ. Мадзалмæ ма æрбацыдысты сывæллæтты ныййарджытæ сæ кæстæрты арæхстдзинадмæ бакæсынмæ.

Мадзал амыдта РХИ-йы сгуыхт ахуыргæнæг Котолиты Тамарæ. Уый раарфæ кодта æрæмбырдуæвджытæн Сылгоймæгты дунеон боны цытæн.

Бæрæгбонон концерт байгом кодтой музыкалон скъолайы кæстæр кълæсты иумиаг-скъолайон хоры хайадисджытæ  РХИ-йы сгуыхт ахуыргæнæг Тасойты Валентинæйы къухдариуæгадæй. Уыдон сæххæст кодтой цалдæр зарæджы: “Бабушка-бабуля”, “Про весну”, “Улыбка мамы” æмæ æндæртæ. Уый фæстæ концерт адарддæр кодтой иннæ æххæстгæнджытæ, кæцытæ тырныдтой сæ арæхстдзинад иттæг хорз равдисынмæ. Залы хъуыстысты зынгæ композитортæ С. Майкапар, В. Косенко,  Э. Казачкова, М. Блантер, В. Бетховен, А. Моцарт, П. Чайковский, М. Легран, А. Островский, В. Шаинский, А. Джойс, И. Шатров, афтæ ма ирон композитортæ Магкоты А., Хæбæлаты З., Гуырдзыбекты  Г., Гæздæнты Булаты уацмыстæ.

Алы музыкалон уацмыс дæр цымыдисон вæййы, йе ‘ххæстгæнæг æй куыд сæххæст кæна, текст куыд сахуыр кæна æмæ йын йæ мидис сценæмæкæсæгæн куыд равдиса, уымæ гæсгæ. Программæ адарддæр кодтой, нырма фæлтæрддзинад кæмæ нæй, уыцы фыццагкъласонтæ. Кæд сценæйыл ахуыргæнинæгтæ тынг тыхстысты, уæддæр сæ арæхстдзинад тынг хорз равдыстой фыццагкъласонтæ: Санахъоты Виктория, Гæззаты Эмилия,  Боровик София, Æлборты Елизаветæ, Гæбæраты Дианæ æмæ Заринæ, Гасситы Нинæ, Харебаты Арсен, Гуыбеты Виктория. Уæлдай тынгдæр сценæмæкæсджыты зæрдæмæ фæцыдысты 2-аг къласы ахуыргæнинаг Гобозты Роман, кæцы сæххæст кодта мелоди кинофильм «Крестный Отец»-æй, Чехойты Ланæ, Плиты Аннæ, Гасситы Нинæ, Битеты Миланæ. Уыдон иууылдæр хорз сæххæст кодтой сæ номыртæ. Уый фæстæ концерт адарддæр кодтой кæстæр кълæсты ансамбль РХИ-йы сгуыхт ахуыр-гæнæг Котолиты Тамарæйы сæргълæудæй. Сæ архæстдзинадæй ма сценæмæкæсджыты зæрдæтæ барухс кодтой 3-аг æмæ 4-æм кълæсты ахуыргæнинæгтæ дæр: Козаты Иринæ æмæ Дианæ, Гæззаты Аленæ, Хуыбылты Алан, Гæджиты Кирæ, Джиджойты Виктория, Гобозты Роман, Пæррæстаты Аннæ, Тасойты Настя, Хъуылымбегты Надя, Тасойты Илонæ æмæ æндæртæ. Сценæмæкæсджытæ ма райгондæй сæмбæлдысты 5-æм къласы ахуыргæнинаг Уалыты Регинæйыл,  кæцы сæххæст кодта Гуырдзыбекты Г. уацмысæй оперон зарæг «Милая мама». Сæ арæхстдзинад ма равдыстой: Бæззаты Фатимæ, Бязырты Алан, Быценты Анна-Мария, Хъуылымбегты Янæ. Ходты Арсен дæр иттæг хорз равдыста йæ музыкалон арæхстдзинад æмæ аккордеоныл сæххæст кодта И. Шатровы вальс «На сопках Маньчжурии», зæгъгæ, РХИ-йы Культурæйы сгуыхт архайæг Куымæридтаты Тинæйы къухдариуæгадæй. Сывæллæттæ афтæ хорз цæттæ уыдысты æмæ сыл залы бадджытæ æмбæлдысты тыхджын къухæмдзæгъдимæ. Концерты иумиагæй уыд 38 номыры.

Концерты фæстæ 1-æм музыкалон скъолайы директор Тедеты Маринæ загъта: “Æрвылаз дæр мах ауадзæм бæрæгбонон концерттæ. Мæнмæ гæсгæ нæ концерт уагъд æрцыд бæрзонд æмвæзадыл æмæ райгондæй баззадтæн нæ хъомылгæнинæгты арæхстдзинадæй, уæлдайдæр та – фыццагкъласонтæй».

Чертхъоты Ж.