Хуссарирыстойнаг спортсмен Гасситы Сослан фуæлахиз армрестлингæй профессионалон турнир «Вершина»-йы. Ерыстæ уагъд цыдысты Санкт-Петербурджы. Сослан хæцыд иууыл уæззаудæр уæзы категорийы. Йæ ныхмæлæууæг уыд Санкт-Петербурджы 17 хатты чемпион, 1997 азы Уæрæсейы чемпион Борис Поска. Уыдон акодтой 5 тохы. Уæлдай цымыдисондæр рауад фæндзæм тох, уымæн æмæ уæдмæ хыгъд уыд 2:2. Фæндзæм тох цыд 35 секунды. Уый та армрестлингы у тынг бирæ рæстæг. Ам фидар удыхъæд равдыста Гассийы фырт æмæ йын бантыст йæ ныхмæлæууæджы рамбулын.
Банысан кæнын хъæуы уый дæр, æмæ иуазон паузæйы фæстæ Сослан кæй сног кодта йæ спортивон карьерæ.
«Цалдæр мæйы размæ мæм фæдзырдтой профессионалон турнир «Вершина»-йы организатортæ æмæ мæ фæхуыдтой сæ ерысты хайад райсынмæ. Уæд сразы дæн æмæ мæхицæн загътон æнæмæнгæйдæр кæй хъуамæ рамбулон ацы ерысты», – банысан кодта Гасситы Сослан.
Уый ма къуыри раздæр та хайад райста РЦИ-Аланийы чемпионаты.
«Ацы ерыстæм ацыдтæн, цæмæй сæм бакæсон. Фæлæ куы бакастæн иумæйагæй атмосферæмæ, уæд мæ бафæндыд ерысты хайад райсын. Стæй ма ахъуыды кодтон, зягъгæ, мын фæпайда уыдзæн «Вершина»-йы турнирмæ бацæттæ кæнынæн дæр», – загъта Гассийы фырт.
РОГ АТЛЕТИКÆ
Ульяновскы уагъд æрцыд, 18 азы онг кæуыл цæуы, уыцы спортсменты ‘хсæн Уæрæсейы чемпионат рог атлетикæйæ. Уым бронзæ майдан рамбылдта Джиоты Дзамболат. Йæ цæттæдзинад фæлвæрдта дæргъмæ гæпп кæнынæй. Уый агæпп кодта 6 м 54 см.
ХУРИТЫ Батрадз
