Инциденттæ ма æруадзын æмæ сæм хъусдард здахыны фæдыл механизмты фæлгæт-ты куыст дарддæр кæны арæнгæрон хъæу Ергнетмæ хæстæг. Хуссар Ирыстонæй делегацийы сæргълæууæг, Хуссар Ирыстоны Президенты паддзахадон уынаффæгæнæг Санахъоты Дауыт, фембæлдæн фæстиуджытæ аразгæйæ информацион фæрæзтæн куыд радзырдта, уымæ гæсгæ дзырд цыд арæнмæ æввахс цæрæг æмбæстæгтæм сæвзæргæ проблемæтыл, фæстаг рæстæджы статистикон бæрæггæнæнтыл.

«Хуссар Ирыстон æмæ Гуырдзыстонимæ паддзахадон арæнтæ фехалыны тыххæй урæд æрцыд Гуырдзыстоны авд æмбæстаджы. Уыдонæй æхсæз, æмбæлон процедурæтæ рацæуыны фæстæ сæрибар æрцыдысты. Иннæ арæнхалæг æмбæстаг дæр уыцы процедурæтæ рацæуыны фæстæ, сæрибар æрцæудзæн»- банысан кодта Санахъойы фырт.

Уый ма куыд дзырдта, уымæ гæсгæ, хуссарирыстойнаг фарс фембæлды рæстæджы бафæдзæхста, цæмæй хъæууонхæдзарадон куыстыты рæстæджы хæлд мауал æрцæуой Хуссар Ирыстон æмæ Гуырдзыстонимæ паддзахадон арæнтæ.

«Тагъд рæстæджы æрæвнæлдæуыдзæн хъæууонхæдзарадон куыстытæм, æмæ нæ фæнды, цæмæй фæлхатт мауал æрцæуой ивгъуыд азы проблемæтæ – Хуссар Ирыстоны территорийыл æнæзакъонæй зæххы фадгуытæ кусын.

Ныфс мæ ис, æмæ ахæм проблемæтимæ фæззæджы нал æмбæлдзыстæм, ныридæгæн сæ куы аскъуыддзаг кæнæм, уæд», – дзырдта Санахъоты Дауыт.

Уымæй дарддæр ма Дауыт банысан кодта, зæгъгæ, хуссарирыстойнаг фарс фехъусын кодта, кæй нал хатыр кæндзысты гуырдзиаг æмбæстæгтæн, кæцытæ æнæзакъонæй байтыдтой Хуссар Ирыстоны территорийыл хуымзæххытæ. Цæмæй уыцы цаутæ фæлхатт мауал æрцæуой, уый тыххæй рагацау Гуырдзыстоны арæнгæрон территоритыл цæрæг æмбæстæгтимæ хъæуы æмбарынгæнæн куыст бакæнын. Санахъоты Дауыты ныхæстæм гæсгæ, гуырдзиаг фарс ууыл нæ тыхсы, уымæ гæсгæ сидынц Гуырдзыстоны æмбæстæгтæм, цæмæй æмбарой, паддзахадон арæнтæ халын кæй нæ хъæуы.

Гуырдзиаг информацион фæрæзты минæвæрттæ цымыдис кодтой Хуссар Ирыстоны территорийыл гуырдзиаг ахст æмбæстæгты хъысмæтмæ. Хуссарирыстойнаг делегацийы сæргълæууæг, æрвылхаттау бамбарын кодта, уыдон дæр сты иннæ ахст æмбæстæгты уавæрты, ницахæм тых кæнæ æндæр митæ сæ ныхмæ ист нæ цæуы.

Механизмты фæлгæтты куыст дарддæр уагъд цæудзæн 4 апрелы.

Нæ уацх.

Ацы æрмæджытæ дæр бакæс:

Алы æмбæстаг дæр хъуамæ хъахъхъæна арæнтыл хизыны фæтк Гуырдзыстон æмæ АИШ-ы æнæконструктивон позици нал радта дыууæфарсон хъусынгæнинагыл къухтæ æрфыссыны фадат Æнæзакъонон хæдзарадон куыстытæн кæрон хъуамæ æрцæуа Паддзахадон арæнты демаркаци фæрог кæндзæн проблемæты Хуссарирыстойнаг фарс нæ хизы йæ разы æвæрд хæстæй

Comments are closed, but trackbacks and pingbacks are open.