Арæнгæрон цæрæн пункт Эргнетмæ хæстæг уагъд æрцыд Инциденттæ ма æруадзын æмæ сæм хъусдард здахыны фæдыл механизмты радон раунд.

Хуссар Ирыстонæй делегацийы къухдариуæггæнæг, РХИ-йы Президенты Паддзахадон уынаффæгæнæг Санахъоты Дауыт фембæлдæн фæстиу-джытæ аразгæйæ, банысан кодта, Хуссар Ирыстон æмæ Гуырдзыстоны ‘хсæн Паддзахадон арæнты делимитаци æмæ демаркацийы æнæмæнгхъæуæг куыстытæ.

Хъуыддаг уый мидæг ис, æмæ Ленингоры районы Æмдзæрины хъæуы Гуырдзыстоны цæрджытæ æнæзакъонæй бахуым кодтой зæххы фадгуытæ. Дауыт куыд дзырдта, уымæ гæсгæ хуссарирыстойнаг фарс раздæр дæр рæгъмæ хаста гуырдзиаг цæрджыты æнæзакъонон хæдзарадон куысты фæдыл фарст. Архайдтой йæ аскъуыддзаг кæныныл, цæмæй адæм æнæхъуаджы ма хуым кæной æмæ тауой сæ зæххы фадгуытæ сыхаг паддзахады территорийыл.

«Фæстаг дыууæ азы мах хатыдыстæм гуырдзиаг æмбæстæгтæм, цæмæй ахæм хъуыд-дæгтæй мауал архайой, фæлæ уæддæр нæ территорийыл сæ зæххы фадгуытæ ногæй ба-куыстой. Уымæ гæсгæ хуссарирыстойнаг фарс фæззæджы фадат нал ратдзæн тыллæг æм-бырд кæнынæн», – банысан кодта Дауыт.

Механизмты куысты цы фарстыл цыд уынаффæ, уый уыд Хуссар Ирыстон æмæ Гуырдзыстоны арæнты ‘хсæн зынгсирвæзтимæ баст фарстатæ æрбæстон кæнын. «Арæнгæрæтты ацы аз æрцыд бирæ зынгсирвæзты цаутæ. Мах æрхастам къорд факттæ, кæцытæ дзурæг сты ууыл, æмæ-иу арт кæй сæндзæрстой Гуырдзыстоны фарсæрдыгæй. Кæй зæгъын æй хъæуы, уый стæй рахизы мах фарсмæ æмæ халы арæнтыл арæзтæдтæ. Уымæ гæсгæ ист цæудзæн мадзæлттæ æмæ нæ территорийыл къахт æрцæудзæн зынгсирвæзты ныхмæ къанаутæ», – дзырдта уый.

Санахъоты Дауыт куыд дзырдта, уымæ гæсгæ хуссарирыстойнаг фарс дарддæр дæр архайдзæн арæнтыл инженерон арæзтæдтæ æндидзын кæныныл, уымæн æмæ Хуссар Ирыстоны бирæ цæрджытæ тыхсынц, сæ стурвос гуырдзиаг фарсмæ кæй ахизынц æмæ уый адыл кæй фесæфынц, уый тыххæй .

Дауыт ма æрсидт Гуырдзыстоны æмбæстæгтæм, цæмæй ма халой паддзахадонæй арæнты фæтк. Арæнтыл бирæ бынæтты ис информацихæссæг нысæнттæ, кæцытæ дзурæг сты ууыл, æмæ арæнтæ æввахс кæй сты æмæ мауал халой арæнтæ.

Хуссарирыстойнаг фарс  хъусдард аздæхта ахæм фарстмæ дæр, цæмæй гуырдзиаг фарс ма пайда кæна зыгъуыммæ терминтæй – “ахст” æмбæстаджы бæсты “давд” æмбæстаг. Уыдон, зæгъгæ, ахъаз не сты позицитæ æрбангом кæнынæн, фæлæ дих кæнынц арæнтыл æрцæугæ цауты фæдыл нæ позицитæ. Уымæ гæсгæ бахатыдыстæм гуырдзиаг фарсмæ, цæмæй цæрджытæн лæвæрд цæуа раст информаци.

Санахъоты Дауыт ма куыд радзырдта, уымæ гæсгæ фæстаг фембæлдæй фæстæмæ Хуссар Ирыстон æмæ Гуырдзыстоны ‘хсæн арæнтæ фехалыны фæстиуæгæн ахст æрцыд аст æмбæстаджы. Уыдонæй сæ иу мæйы мидæг урæд æрцыд дыууæ хатты. Уыдон сæрибар æрцыдысты æмбæлон процедурæтæ рацæуыны фæстæ.

Механизмты фæлгæтты радон раунд уагъд æрцæудзæн 11 майы.

Нæ уацх.

Comments are closed, but trackbacks and pingbacks are open.