Республикæ Хуссар Ирыстоны арæнтæм хæстæг Эргнеты хъæуы уагъд æрцыд кусæгон къордты фембæлд Инциденттæ ма æруадзын æмæ сæм хъусдард здахыны фæдыл механизмты фæлгæтты. Традицимæ гæсгæ фембæлды хайд райстой Республикæ Хуссар Ирыстон, Уæрæсейы Федераци, гуырдзыстоны минæвæрттæ æмæ Гуырдзыстоны Евроцæдис æмæ ЕÆÆО-йы Мисситы хъусдарджытæ.

Хуссар Ирыстонæй делегацийæн ра-замынад кодта РХИ-йы Президенты паддзахадон уынаффæгæнæг Санахъоты Дауыт.

Фембæлдæн фæстиуджытæ аразгæйæ, Санахъоты Дауыт инфомацион фæрæзтæн радзырдта, зæгъгæ, Механизмты фæлгæтты фæстаг фембæлдæй фæстæмæ Хуссар Ирыстон æмæ Гуырдзыстоны ‘хсæн паддзахадон арæнты фæтк фехалыны тыххæй урæд æрцыд æхсæз адæймаджы. Иумæйагæй сисгæ-йæ, кæд хицæн фæткхалæн цаутæ æрцыд, уæддæр арæнтыл уавæр у стабилон. Ахст æхсæз адæймагæй цыппар ссæрибарчындæуыд, дыууæ та æмбæлон процедурæтæ ацæуыны фæстæ, æввахс рæстæджы лæвæрд æрцæудзысты Гуырдзыстоны фарсмæ.

Санахъоты Дауыт ма куыд банысан кодта, уымæ гæсгæ гуырдзиаг фарс хус кæрдæгыл арт кæй бафтыдтой, уый фæстиуæгæн фехæлдтой паддзахадон арæныл амонæн нысæнттæ.

«Мах æрдзырдтам паддзахадон арæнты хаххыл æмбæлон куыстытæ ба-кæныны æнæмæнгхъæуындзинадыл, зынджы ныхмæ тох кæныны мадзæлттыл. Уæлдæрзагъдгонд бынаты дæр нæ уыд зынгсирвæзты ныхмæ арæзт къанау, æмæ Гуырдзыстоны территорийæ хуссарирыстойнаг фарсмæ æрбаирвæзт арт», — банысан кодта Дауыт.

Уымæй дарддæр раразмæ æрцыд паддзахадон арæнтæ делимитаци æмæ демаркацийы æнæмæнгхъæуæг фарст. Уый цасдæрбæрцæй æрбæстон кæнид арæнтæм æввахс цæрджытæм сæвзæргæ проблемæтæ. Дауыт куыд дзырдта, афтæмæй хуссарирыстойнаг фарс дарддæр дæр, иуфарсон фæткмæ гæсгæ араздзæн арæнтæ, цалынмæдæриддæр гуырдзиаг фарс ацы фарсты фæдыл иумæйаг куыстмæ цæттæ нæ уа, уæдмæ.

Гуырдзиаг фарс ма раразмæ кодта ахæстæтты уавæрты фæдыл фарст, кæцытæ сты ахст нæ республикæйы. Санахъоты Дауыт куыд банысан кодта, уымæ гæсгæ Гуырдзыстоны æмбæстæгтæ дæр сты, иннæ ахст æмбæстæгтæ цы уавæры сты, ахæм уавæры.

«Дзырд ма цыд арæнтыл дыууæ фарсырдæм дæр хæдзарон цæрæгойтæ кæй ахизынц, ууыл. Æркастæуыд алыхуызон мадзæлттæм, ацы фарст аскъуыддзаг кæныны нысанæн», — загъта Санахъойы фырт.

Механизмты фæлгæтты радон куыст уагъд цæудзæн ацы аз 30 ноябры.

Comments are closed, but trackbacks and pingbacks are open.