Ныртæккæ нæ республикæйы политикон царды ахсджиаг бынат ис æстæм сæвзæрст Парламентмæ æвзæрстытæм цæттæгæнæн куыст. Бæрæг куыд у, уымæ гæсгæ парламентон æвзæрстытæ уагъд цæудзысты мажоритарон-пропорционалон системæмæ гæсгæ, ома Парламентмæ депутатты иу хай æвзæрст цæудзæн партион номхыгъдтæм æмæ иннæ хай та иумандатон зылдтæм гæсгæ. Æвзæрстытæм нæ республикæйы цæрджытæ куыд цæттæ кæнынц, цы зæрдæйы уагимæ цæудзысты æвзарæн фадгуытæм, уый тыххæй нын сæ хъуыдытæ раргом кодтой:
Æлборты Анжелæ:
– Алы æмбаргæ адæймагæн дæр йе ‘мбæстагон хæс у, цæмæй хайад райса парламентон æвзæрстыты. Æз, æвзонг фæсивæды минæвар, сидын, цæмæй алы æвзонг æмбæстаг дæр активон хайад райса æвзæрстыты, уымæн æмæ мах стæм бæстæйы фидæн æмæ мах хæсджын стæм ахсджиаг уынаффæтæ райсыны хъуыддаджы.
Мæнæн тынг æхсызгон у, ныртæккæ фæсивæд политикæмæ тынг кæй цымыдис кæнынц. Мæ сæрибар рæстæг кæд фылдæр æрвитын чиныг кæсгæйæ, уæддæр тынг æхсызгонæй фехъусын æвзонг кандидатты хъуыдытæ æмæ фæндæттæм, уый фæстæ скæндзынæн раст æвзæрст.
Куымæридтаты Аленæ:
– Лæмбынæг сахуыр кодтон партитæ æмæ иумандатон зылдтæм кандидатты программæтæ, кандидатты хайадистæй дебаттæм дæр кæсын æппынæдзух æмæ уый фæстæ ахъуыды кæндзынæн, цæмæй мæхимæ гæсгæ раст æвзæрст саразон мæ Райгуырæн бæстæ æмæ адæмы хæрзæбонæн. Махæн, ирон адæмæн алы æвзæрстытæ дæр сты бæрæгбоны хуызæн – афтæ уыдзæн ныр дæр – хъæлдзæгæй, хорз зæрдæйы равгимæ хуыцаубоны сæххæст кæндзыстæм нæ æвæджиаг æмæ æмбæстагон хæс.
Гуыцмæзты Ларисæ:
– Парламентон æвзæрстытæ махæн, Хуссар Ирыстонæн сты ахсджиаг. Бæрндзинад æмæ зондджындзинады æвдисæн уыдзысты махæн æвзæрстытæ. Уымæ гæсгæ 9 июны нæ алы æмбæстаг дæр хæсджын у æвзарæн фадыгмæ бацæуа æмæ сараза йæ раст æвзæрст. Уымæн æмæ та радон æвзæрст сараздзыстæм хорз фидæнæн, ууыл баст у нæ бæстæйы дарддæры рæзт æмæ хъуамæ реализаци æрцæуа нæ æмбæстагон позици.
Наниты Альбинæ:
-Тынг æхсызгон мын у, фæсивæдæй бирæтæ Парламенты депутаттæм сæ кандидатурæтæ кæй раразмæ кодтой.
Махмæ тынг бирæ закъæттæ ист æрцыд, кæцытæ здæхт сты адæмы царды æмвæзад фæхуыздæр кæнынмæ. Фидæны æвзонг депутаттæн æнцон кусæн уыдзæн, цы фракцитæ дзы архайдзæн, уыдонимæ.
Мах куыд æвзонг паддзахад, афтæ нæ хъæуы закъоны бындурыл нæ паддзахад сфидар кæнын цæмæй закъæттæ кусой, хъахъхъæд цæуой. Тынг цымыдисæй кæсын æвзæрстыты агъоммæ дебаттæм. Кæй зæгъын æй хъæуы, ис дзы бирæ хорз хъуыдытыл хæст кандидаттæ. Уыдоны хъæуы бангом кæнын æмæ нæ адæмы цард æмæ бæстæйы хæрзæбонæн ахсджиаг закъæттыл бакусын. Уымæ сæм æнхъæлмæ кæсæм æнæрхъæцæй!
Босыкты Риммæ:
– Парламент у Республикæйы уæлдæр закъондæттынадон орган æмæ алчи уым кусын æмæ архайынмæ йæ ныфс ма хъуамæ хæсса. Бирæ кандидатты ныхæстæм гæсгæ мæхæдæг фефсæрмы вæййын, уымæн æмæ æппындæр нæ фембарынц, дарддæр сæ разы цы ахсджиаг æмæ вазыгджын хæстæ лæууы, уый.
Мæнæн ахсджиаг у нæ бæстæйы фидæн æмæ ууыл чи хъуамæ кусой, уыдон хъуамæ уой зондджын, хъуыдыджын æмæ бадтзонд æмбæстæгтæ. Уымæ гæсгæ фадат ис махæн алкæмæндæр, цæмæй байхъусæм алы парти, алы кандидаты хъуыды æмæ фæндæттæм æмæ уый фæстæ раст æвзæрст саразæм. Уый æрмæст нæ бар нæу, фæлæ алы æмбæстаджы хæс дæр, уымæн æмæ алы хъæлæсæн дæр ис ахсджиаг нысаниуæг.
Нæ уацх.
