Алы сабимæ дæр ис курдиат. Фæхъæуы йæ æрмæстдæр раргом кæнын. Уый та хъуамæ, фыццаджыдæр, банкъарой ныййарджытæ æмæ йæ бакæной искæцы сфæлдыстадон кæнæ æндæр ахуырадон центрмæ. Уымæн æмæ центрты кусынц ахæм ахуыргæнджытæ, кæцытæ зонынц, куыд æнцондæр у сывæллоны курдиат раргом кæнын. Æнæмæнг ын æххуыс кæндзысты, разæнгард æй кæндзысты.
Иу ныхасæй, курдиат кæмæ ис, уымæн фæрсырдыгæй дæсны æххуысгæнæг куы нæ уа, уæд уыцы курдиатæй ницы пайда ис. Æмæ уый тыххæй та нæ республикæйы алыгъуызон фадæттæ дæр ис нæ сывæллæттæн.
Хъуылымбегты Зæлинæ йæ райгуырдæй фæстæмæ нæ уыд хуымæтæг сывæллон, нæ уарзта йе ‘мбæйттимæ хъазын, æдзухдæр архайдта, цæмæй исты сныв кодтаид, уарзта менталон арифметикæ дæр. Менталон арифметикæйы сæхи цы сабитæ фæлварынц, уыдон бынтон æндæр хуызæн сты. Иннæ сывæллæттæй хицæн кæнынц. 6 аз ыл куы цыд, уæд йæ ныв кæнын ныууагъта. Уымæн æмæ сывæллонæн уыд йæхи нывкæныны стиль. Йæ цахъхъæнтæн Зæлинæйы нывтæ уыдысты зын бамбарæн, æмæ йыл-иу бирæтæ худгæ дæр кодтой. «Кæй цæмæн бахъуыдысты дæ нывтæ», – дзырдтой-иу ын.
Зæлинæ ахуыр кæны Цхинвалы 3-æм астæуккаг сколайы æвдæм къласы, ахуыр кæны хорз нысæнттыл. Афтæ ма ахуыр кæны нæ горæты Тугъанты Махарбеджы номыл Нывгæнæн ахуыргæнæндоны дæр.
Адæймагæн курдиат æрдз ратты, фæлæ хатгай фæхъæуы ахæм адæмтæ, кæцытæ дын баххуыс кæндзысты дæ курдиат ирдæй раргом кæнынæн. Слæууын дæ кæндзысты раст фæндагыл æмæ дын зæрдиагæй æххуыс кæндзысты, кæсдзысты дæм уарзæгой цæстæй. Фæлæ цæмæй сабийы раст фæндагыл слæууын кæнай, уый тыххæй хъуамæ адæймаг йæхæдæг дæр лæуд уа ахæм рæстаг фæндагыл, адæм æй уарзой, кад ын кæной, нымайой йæ, йæ ныхасæн æхсæнады аргъ уа.
«Мæ ныййарджытæ рæхсынц нывкæнынмæ. Мæ мад мæм хæрз чысылæй радта алыгъуызон хуызджын карандастæ, ахорæнтæ æмæ мæ цайдагъ кодта. Цы иу ныхъулæттæ кодтон, уыдонæй-иу нæ дыууæ дæр райстам æхцондзинад æмæ мæ тырнындзинад фылдæрæй-фылдæр кодта», – дзуры чызг. Мæ фæнд у зынгæ нывгæнæг æмæ программист суæвын.
Фæстаг азты Зæлинæ йæхæдæг йæхиуыл кусы. Архайы интернеты сæрмагонд программæмæ гæсгæ.
«Скъолайы мын рæстæг куы вæййы, уæд фæархайын, цæмæй ныв кæнынæй мæхи ирхæфсон. Тетрады цъарыл кæнæ та афтид гæххæтты сыфыл ныв кæнын. Æз аскъуыддзаг кодтон, цæмæй мæ сомбоны царды мæхи бафæлварон нывкæнынады. Фæнды мæ искуы мӕ конд нывтӕн сӕрмагонд равдыст саразын», – зæгъы Зæлинæ.
Адæймагæн йæ сабибонтæ цы цаутæ срæсугъд кæнынц, уыдон сывæллоны зæрдæйы стыр фæд ныууадзынц. Уыцы мысинæгтæ æмæ йын зонындзинæдтæ йæ цардвæндаджы баххуыс кæнынц. Ахсджиаг сты, йæ алфамблай цы хабæрттæ цæуынц, уыдон.
«Ныв хъуамæ вандализмыл нымад ма ‘рцæуа. Стрит-арт чи уарзы, уыдон хъуамæ æххæст кæной сæрмагонд домæнтæ. Национ символикæимæ ирд æмæ зæрдæ-мæдзæугæ куыстытæ горæты уынгты арæх ис фенæн. Мæнæн мæ зæрдæмæ рагæй цæуы уынджы аивад кæй хонынц, уый. Нæхи уынг дæр сæрд вæййы мæ нывты бын. Къæвдайы фæстæ та сæ барæсугъд кæнын.
Мæнмæ гæсгæ граффити хъуамæ уа цымыдисаг, хъæлдзæг кæнæ æндæр исты хъуыды æмæ мидис хæсса. Нæ истори нæ рох кæнын нæ хъæуы, æмæ йæ граффитийы хуызы адæмы размæ хъæуы хæссын. Ныв кæнынæн ис сæрмагонд домæнтæ æмæ сæ хъæуы æххæст кæнын. Хъуамæ закъон ма хала – экстремизм æмæ дзы рекламæ ма хъуамæ уа», – зæгъы Хъуылымбегты Зæлинæ.
Зæлинæйы куыстытæ фенæн ис Инстаграмы йæ фарсыл sgwtya13.
Адæймаг цы дæсныйады фæндагыл ныллæууы, уый хъуамæ хæсса æхцондзинад æмæ пайда æрмæст йæхицæн нæ, фæлæ ма йæ алфæмблай цы адæм ис, уыдонæн дæр. Зæххон удгоймагæн æрдзæй курдиат лæвæрд куы æрцæуы, уæд йæ миддуне байдзаг вæййы таурæгъон сагъæстæй. Æмæ уырдыгæй фæстæмæ райдайы йæ царды ног фæлтæр: æрдз ын цы радта, уый адæмæн рæдауæй дæттыны рæстæг. Курдиат кæмæ ис, уымæй, дзыллæйæ хæс кæй дары, уый куы ферох уа, уæд дзы æцæг нывгæнæг никуы рауайдзæн. Афтæ уыд, афтæ у æмæ афтæ уыдзæн фидæны дæр. Знон, абон æмæ фидæны дæр кæрæдзийыл бæтты дзыллæйы фарн, дзыллæйы бæллиц, дзыллæйы хæс. Уыцы æмбарынад кæмæ нæй, уый дзыллæйы хъæбул никуы суыдзæнис.
ДРИАТЫ Лейла
Comments are closed, but trackbacks and pingbacks are open.