Микробиолог, биологон æмæ химион хæцæнгæрзты фæдыл эксперт, биологон хæцæнгарзы фæдыл ИНО-йы къамисы раздæры уæнг Игорь Никулин коронавирусы тыххæй фехъусын кодта, зæгъгæ, КОВИД-19 арæзт æрцыд лабораторийы, аразгæ та йæ скодтой америкæйаг ахуыргæндтæ. Америкæйæгтæ сиу кодтой вирус SARS æмæ китайаг хæлынбыттыры коронавирусы. Уый бахизы адæймаджы чырæгтæм æмæ бирæ кæнын райдайы тыхджын тагъдадæй. Афтæмæй арæзт æрцыд ног патоген. Ахæм комбинаци æрдзы гæнæн нæй æмæ йæхигъæдæй фæзындаид: 80% уый у вирус SARS – адæймагон, уæззау респираторон синдром, 20% та – китайаг хæлынбыттыры коронавирус. Ахуыргæндтæ куыд дзурынц, уымæ гæсгæ сентябры уыдзæн коронавирусы эпидемийы дыккаг уылæн. Кæд уа афтæхуыйнæг персистенци, уæд уый уыдзæн сезонон низ гриппы хуызы, фæлæ тынг серьезон фæкарзимæ. Ахæм вирус саразын дунейы йæ бон уыд æрмæстдæр АИШ-æн, кæцыйæн йе ‘фсæддон бактериологон лабораторитæ сты æнæхъæн дунейы, уыцы нымæцы Уæрæсейы арæнтæм æввахс бæстæты – Украинæ, Гуырдзыстон, Прибалтикæйы, Казахстаны æмæ афтæ дарддæр.
Никулины хъуыдымæ гæсгæ, АИШ æвæстиатæй хъуамæ дунеон хъусдарджыты бауадзой сæ бактериологон лабораторитæм, науæд дуне коронавирусон пандемийы фæзынды аххосджыныл нымайдзысты Америкæйы. Цалдæр боны размæ Китайы фæсарæйнаг хъуыддæгты министрады минæвар Чжао Лицзянь фæаххосджын кодта АИШ-ы Уханмæ коронавирус америкæйаг æфсæддонтæ кæй æрбахастой, уымæй. 2019 азы октябры æмбисы Уханы уагъд цыдысты дунеон æфсæддон хъæзтытæ 100 бæстæйы, уыцы нымæцы АИШ-ы æфсæддон службæгæнджыты хайадистæй.
Ахæм хатдзæгтæ уый сарæзта АИШ-ы минæвæртты хъусдарды палатæйы фæдыл комитеты низтыл контроль кæнын æмæ профилактикæйы фæдыл америкæйаг центры директор Роберт Редфилды раныхасы фæстæ, зæгъгæ АИШ-ы территорийыл ивгъуыд аз сбæрæгчындæуыд пациентты, кæцытыл уыд коронавирус. Америкæйаг иртасджытæ гæнæн ис æмæ коронавирус бакуыстой 5 азы размæ. Мæлæтхæссæг вирус арæзт цыд барæйаразгæ методтæй. Никулины ацы хъуыдыимæ разы у РУДН-ы стратегион иртасынæдты æмæ прогнозты институты директоры хæдивæг Павел Фельдман. Канадæйы иртасæн центры афæлгæсæг Лэрри Романофф фехъусын кодта, зæгъгæ, коронавриус арæзт æрцыд АИШ-ы æмæ, æгæрыстæмæй, загъта ацы биологон хæцæнгарз арæзт кæм æрцыд, уыцы лаборатори Форт-Детрикы бынат дæр. Эксперты хатдзæгтæ бындуриуæг кæнынц япойнаг æмæ тайвайнаг эпидемиологты иртасæнтыл. Уымæй дарддæр ма, Рома-нофф банысан кодта, зæгъгæ, ацы низы фæтынгы размæ АИШ-ы цæмæдæр гæсгæ тагъдыл сæхгæдтой Форт-Детрикы сæ сæйраг æфсæддон биолаборатори, ома, АИШ-ы æфсæддонтæ бафиппайдтой сæ фæдтæ.
Ацы версийы æвварс у Игорь Никулин дæр, кæцы фехъусын кодта: «2015 азы журнал NATURE-йы мыхуыр æрцыд уац, зæгъгæ, Форт-Детрикы лабораторийы уагъд æрцыд æнтыстджын эксперимент китайаг хæлынбыттыры коронавриусы модификацийы фæдыл, кæцы гæнæн ис æмæ æнцонтæй хызтаид адæймагы чырæгтæм. Ацы уацы бацамынд æрцыд, зæгъгæ, автортæ ахæм экспериментты адæймагадæн нымайынц тынг тæссагыл». Китайы хицауад официалонæй хъусын кæны, зæгъгæ, ацы инфекци сарæзтой АИШ-ы. Китайæгтæ Уханы раздæры америкæйаг консулады ссардтой афтид банкæтæ ахæм фыстимæ «бактериологон тæссагдзинад». Æгæрыстæмæй, кæд уый коронавирус нæ уыд, уæддæр гæнæн уыд æмæ уыдаиккой йæ компоненттæ. Китайаг æхсæнад æмæ ахуыргæндтæ АИШ-æй домынц инфекцион низты фæдыл Форт-Детрикы æфсæддон биолабораторийы архайд æруромыны тыххæй информ-аци ныммыхуыр кæнын. Ацы лабораторийæн ис æнæофициалон ном «Кухня дьявола». Номхуындæй Форт-Детрикы америкæйæгтæ Дыккаг дунеон хæсты рæстæджы уагътой бактериологон хæцæнгарз æмæ йæ абоны онг дæр уадзынц ацы лабораторийы. Уыимæ сын кæд сæхиуыл хъæуы тæрхон кæнын, уæддæр АИШ-ы президент Дональд Трамп ацы бонты фехъусын кодта, зæгъгæ, гæнæн ис Китайыл хъаст бадæттой дунеон тæрхондонмæ, коронавирус парахат кæнын кæй бауагътой, уый тыххæй.
2015 азы америкæйаг амалиуæггæнæг æмæ æхсæнадон архайæг Билл Гейтс сарæзта доклад, цыран загъта, зæгъгæ, дунейæн иууыл тæссагдæр у коронавирусы пандеми. «Æртыккаг дунеон хæст нæ уыдзæн, 20-æм æнусы йæ куыд æнхъæлдтой, ахæм. Нæ уыдзæн нæдæр хъомысджын æфсад, нæдæр дзыллон ракетон цæфтæ. Хæст уыдзæн сусæг, гибридон биологон хæцæнгарзæй спайда кæнгæйæ». Игорь Никулин банысан кодта, зæгъгæ, пандемийы фæстæ куыд Уæрæсейы, афтæ æндæр бæстæты къухдариуæгад дæр хъуамæ сæ хъусдард аздахой вирусологтæ æмæ микробиологтæм. Мах бахъæудзæн ацы здæхт рæзын кæнын, фæнды нæ æви нæ, уымæ æнæкæсгæйæ. Никулин ма куыд загъта, уымæ гæсгæ АИШ-ы раздæры президент Барак Обама куы базыдта ацы вирусы тыххæй, уæд уый бар нæ радта ахæм эксперименттæ уадзынæн. Уымæ гæсгæ иртасджыты бахъуыд сæ куыст Уханмæ рахæссын, цыран Билл æмæ Мелинда Гейтсты фонды фæрцы арæзт æрцыд вирусологийы нырыккон институт.
Æрæджы УФ-йы фæсарæйнаг хъуыддæгты министрады официалон минæвар Мария Захарова йæ брифингы хъусдард аздæхта, сæр-магондæй раздæры советон паддзахадты территоритыл АИШ-ы биологон уæвынадмæ. «Биотерроризмы ныхмæ тох кæныны æфсонæн, арæзт цæуынц дывæр нысаны америкæйаг биолабораторитæ». Йæ ныхæстæм гæсгæ, Гуырдзыстоны территорийыл, Тбилисмæ æввахс уæвынад кæны Ричард Лугары номыл æхсæнадон æнæниздзинад хъахъхъæныны америкæйаг-гуырдзиаг центр. «Мах уый тыххæй дзырдтам бирæ хæттыты, ацы лабораторион комплекс официалонæй хаст æрцыд инфекцион низты парахат кæныны фæдыл глобалон контролы америкæйаг æфсæддон системæмæ. Ахæм лабораториты америкæйæгтæ æртыккаг бæстæты кусынц тæссаг низты алыгъуызон цырынгæнджытæ саразын æмæ модификацийыл, уыцы нымæцы хæстон нысæнтты тыххæй дæр. Уыимæ нæм цы информаци ис, уымæ гæсгæ, хæрз æрæджы уым уыдысты Пентагоны бæрзонд бынæтты кусæг минæвæрттæ, кæцытæ гуырдзиаг хицауадæн загътой сæ фæндон иртасæнты диапазон фæуæрæхдæр кæныны тыххæй», – загъта Захарова.
Уæрæсейыл æрхъула кодтой АИШ-ы биолабораторитæ, кæцыты цы экс-перименттæ уадзынц, уыдоныл контроль кæнын дунеон æмæхсæнадæн йæ бон нæу. АИШ-ы 13000 ахуыргонды кусынц Пентагонæн номхуындæй биологон хæцæнгарзы фæдыл. Уыдонæй уæлдай тæссагдæр у Гуырдзыстоны Лугары номыл центр, цыран дарынц æмæ ахуыр кæнынц змисхуыз бындзыты – ахæм тæссаг низ, куыд лейшманиоз хæсджыты. Ацы мæлæтхæссæг уырынгонтæ фæзындысты Ставрополь, Краснодары край, Хъырымы. Хуссар Ирыстоны хицауад дæр иу æмæ дыууæ хатты нæ равдыста йæ катайдзинад йæ территоримæ æввахс Лугары номыл биолабораторийы архайды тыххæй. Æмæ уымæн бындур дæр ис. Ивгъуыд аз нæ республикæйы територийыл цы морæгъуыз хъæндил фæзынд, уый дæр уыд ацы лабораторийы фæрцы. Ивгъуыд аз ма фиппайдæуыд нæ горæты уынгты гæлæубтæ æмæ дзынгатæ кæй сбирæ сты, уый дæр. Америкæйаг лабораториты нысан у ног патогентæ саразыны фæдыл эксперименттæ уадзын æмæ сæ адæмыл, цæрæгойтыл, зайæгойтыл фæлварын. Нæ «хорзмæбæллæг» сыхæгтæ хуссарирыстойнаг адæмыл кæй нæ бацауæрддзысты, уый ирдæй бæрæг у… Уæлдайдæр та сæ ныртæккæ тынг тыхсын кæны гуырзиаг-ирон арæн æхгæд кæй у, уый дæр. Арæн æхгæд кæй æрцыд, уый хорзæрдæм бандæвта нæ республикæйы цæрджытыл, уымæн æмæ Гуырдзыстон æппæт амæлттæй дæр бацархайдтаид Хуссар Ирыстонмæ вирус æрбаирвæзын кæныныл. Æниу, къæрцхъус уæвын – нæ хæс…
Гуырдзыстоны цæрджытæй ацы лабораторийы тæссагдзинад чи æмбары, уыдон дæр цалдæр хатты рацыдысты йæ ныхмæ, фæлæ сæ бæстæйы хицауад хъусгæ дæр нæ фæкодта. Уымæн æмæ уыдон сты АИШ-ы фæсдзæуинтæ æмæ сын цы дзурынц уый æххæст кæнынц. Уый æнхъæл чи уыд æмæ 4 миллиард адæймаджы изоляцийы бахауой. Ахæм цау дунейы æрцыд фыццаг хатт.
Катайдзинад æвзæрын кæны америкæйæгтæ европеоидон расæйы уæрæсейæгты биоæрмæг кæй æмбырд кæнынц, уый дæр. Растдæр, уый тыххæй фæдзæхста УФ-йы Президент В.Путин дæр, уæд дзырдта: «…уыимæ УФ-йы алы æмæ алы географион бынæтты цæрæг алыгъуызон этностæ æмæ адæмæй. Фарстæуы, уый цæмæн арæзт цæ-уы?».
Æппæт ацы факттæм, ома æнæхъæн дунейы адæм коронавирусæй куыд хъизæмар кæнынц, уыдæттæм кæсгæйæ та мæ зæрдыл æрлæууыдысты америкæйаг шахматист Бобби Фишеры ныхæстæ, зæгъгæ, цалынмæ зæххыл Америкæйы Иугонд Штаттæ уæвынад кæной, уæдмæ дунейы сабырдзинад æмæ æнцойад никуы уыдзæн…
Мыхуырмæ йæ бацæттæ кодта
ДЖИОТЫ Екатеринæ
Comments are closed, but trackbacks and pingbacks are open.