Сæрмагонд æфсæддон операцийы хайад чи исынц, уыдонæн хæлцад æрæмбырд кодтой Цхинвалы районы хъæуты цæрджытæ.
Гуманитарон æххуысы 10 тоннæйы хæдзарон хæлцадимæ балæууыдысты За-порожьейы. Фæндаджы хæрдзтæ иууылдæр йæхимæ райста машинæйы шофыр. «Куыд æгас Ирыстон, афтæ мах дæр нæ хæсыл нымайæм нæ лæппутæн баххуыс кæнын. Гуманитарон æххуыс фыццаг хатт нæ кæнынц Цхинвалы районы цæрджытæ. Уымæй размæ дæр куыд хицæн адæймæгтæ, афтæ хъæуты цæрджытæ æндæр организатортимæ баиу уæвгæйæ, сæ хайбавæрд иу бахастой. Фæлæ ныр цы гуманитарон æххуыс арвыстам, уый бацæттæ кодтам хъæуты администрациты сæргълæуджыты инициативæмæ гæсгæ. Лæппутæн хъæуты цæрджытæ æрæмбырд кодтой мыд, хæдзарон æйчытæ, минералон дон, цыхтытæ. Сæрмагондæй мæ рахицæн кæнын фæнды нæ районы цæрæг Козаты Юрийы. Уый æмбырдгæнæн пунктмæ æрбахаста 100 килограммы бæрц цыхт. Цы æхцайы фæрæзтæ нæм æрбамбырд, уыдонæй та балхæдтам электрогенератортæ, рацитæ, газы пецтæ, хъарм æмбæрзæнтæ æмæ а. д.», – радзырдта Цхинвалы районы сæргълæууæг Бæззаты Инал.
Гуманитарон æххуыс сæрмагондæй йæхæдæг фæхæццæ кодта районы сæргълæууæг. Уымæн бастдзинад ис нæ хæцæг лæппутимæ æмæ йыл фембæлдысты Мелитополы. Лæппутæ стыр бузныджы ныхæстæ рарвыстой æгас Ирыстонæн æмæ сæрмагондæй та Цхинвалы районы хъæуты цæрджытæн.
УАЗÆГТЫ Марфæ
