Гуманитарон æххуыс Авдеевкæмæ

Фæндæгты арæзтад æмæ сæ эксплуатацимæ радтыны комитеты дæлбар уæвæг «Дорэкспострой»-ы кусджытæ Украинæйы цæуæг Сæрмагонд æфсæддон операцийы хайадисæг ирон лæппутæн аластой гума-нитарон æххуыс. Ацы куыстуаты директор Гæбæраты Алан куыд зæгъы, афтæмæй хуссарирыстойнаг лæппутæ райстой электрогенератортæ, дрон, медицинон фыццаградон хостæ æмæ ма сæ иууыл сæйрагдæр цы хъуыд – хæдтулгæ «Нива». Гуманитарон æххуыс адресонæй райстой, Авдеевкæйы бахизæны цы хæстонтæ лæууынц, уыдон. «Уый хæстонтæн сæхи фæндон уыд. Транспортæй, дам, тыхсæм. Арæх сæ бахъæуы иу бынатæй иннæмæ цæуын, Авдеевкæмæ хæстæг бирæ ис Хуссар Ирыстонæй бархионтæ, стæй 4-æм Æфсæддон базæйы хæстонтæ. Уыдонæн кæрæдзиимæ ис бастдзинад. Фронтмæ цы æххуыс цæуы, уый дæр адих кæнынц кæрæдзийыл. Хæдтулгæ фенгæйæ, тынг фæцин кодтой. Немæ ма аластам къахыдзаумайæн термостелкæтæ, минералон дон «Бæгъиатæ», медикаменттæй та фылдæр антигистаминон препараттæ. Куыд зонæм, афтæмæй фронты канд техникæйы хъуагдзинадæй нæ тыхсынц, фæлæ гъæдджын донæй дæр. «Бæгъиатæ» сын кæй нылластам, уый дæр сын æхсызгон уыд», – радзырдта Гæбæраты Алан.

Гуманитарон æххуыс арвитынæн æмæ йæ бынатмæ фæхæццæ кæнынæн баххуыс кодта республикæйы сæргълæууæг Гаглойты Алан.

Зæххæнкъуысты зианбаййафæг адæмæн æххуыс

Дарддæр йæ куыст кæны Президент Гаглойты Аланы бахæсмæ гæсгæ Фæсивæдон политикæ æмæ спорты фæдыл комитеты цы æххуысæмбырдгæнæн пункт байгом, уый дæр. Ардæм гуманитарон æххуыс хæссынц Турк æмæ Сирийы зæххæнкъуысты фæстиуæгæн зиæнттæ кæуыл æрцыд, уыцы цæрджытæн. Комитеты пресс-службæ куыд зæгъы, афтæмæй февралы кæрон республикæйы цæрджытæ активондæр уыдысты. Марты райдианы та процесс æрнымæг. Пресс-службæйы кусæг ма куыд загъта, афтæмæй, цæмæй алцыдæр æргом конд цæуа, уый тыххæй фыссынц æххуыс чидæриддæр бакæны, уыдоны тыххæй зонæнтæ.

Гуманитарон хуызы æрбахæссæн ис хъарм æмбæрзæнтæ, фонартæ, батарейкæтæ, цырæгътæ, спичкæтæ, фынæйгæнæн голджытæ, термостæ, гигиенæйы фæрæзтæ, хосгæнæн препараттæ æмæ хъарм дзаумæттæ.

Æмбырдгæнæн пункт кусы æрвылбон 9 сахатæй 20 сахатмæ. Бæстыхаймæ бахизæны дуарыл фыст сты контактон телефоны номыртæ. Баххуыс кæнын кæй фæнды, уыдонæн сæ бон у развæлгъау зонæнтæ райсын ахæм телефонты номыртæй:

8-929-807-01-09; 8-929- 804-35-35;

8-929-805-46-51

Фæсивæды политикæ æмæ спорты фæдыл комитет сиды нæ республикæйы цæр-джытæм «Тыхст рæстæджы æххуысы къух фæдарын, адæмы иудзинад, кæрæдзимæ уарзондзинад æмæ хорз зæрдæйы ахаст – хъуамæ уой æрыгон адæймаджы хуыздæр миниуджытæ. 2008 азы фыдæвзарæн бон-ты Хуссар Ирæн канд Цæгат Ирыстон нæ, фæлæ æгас дунейы адæм æххуыс кодтой. Мах дæр равдисæм, гуманон адæм кæй стæм. Табуафси, баххуыс кæнут, йæ бон кæмæн куыд у, афтæ».

УАЗÆГТЫ Марфæ