Фæндагон змæлды æдасдзинады инспекторты хъæппæрисæй горæты коммуналон службæтæ æхсæдынц бæлæстæ, кæцытæ æхгæнынц светофорты æмæ фæндагон нысæнтты. Ахæм куыстытæ арæх фæкæнынц, цæмæй шофыртæм фæндагон нысæнттæ хорз зыной æмæ æдасдæр уой, куыд шофыртæ, афтæ бæлцæттæ дæр. Горæты хæрзарæзтады управленийы директоры хæдивæг Джиоты Филипп куыд зæгъы, афтæмæй горæты бæлæстæн санитарон æхсæдæн куыстытæ арæх саразынц, ома хус къалиуты æмæ фæндагмæ кæнæ тратуармæ чи рахизы, уыдоны ралыг кæнынц.
«Паддзахадон автоинспекци нæм куы бахаты, уæд семæ азилæм æмæ нын равдисынц, кæцы бынæтты хъæуы бахсæдын бæлæстæ. Æнæуый та рæстæгæй-рæстæгмæ нæхæдæг зилæм æмæ чи хъыгдары, уыцы къалиутæ æхсæдæм, хус къалиутæй асыгъдæг кæнæм бæлæсты. Фæнды нæ, цæмæй цалдæр боны æмгъуыдмæ æмбæлон уагмæ æркæнæм горæты уынгтæ», – зæгъы Джиоты Филипп.
Фæндагон нысæнттæ бæлæсты къалиутæй куы нæ фæзынынц, уæд тæссаг вæййы аваритæй. Уымæ гæсгæ фæндагон инспектортæ сбæлвырд кæнынц проблемон бынæттæ æмæ бахæсджын кæнынц горæты администрацийы, цæмæй бакæной æхсæдæн куыстытæ.
ДЖИОТЫ Алыксандр
