Райсомæй æвзарæн фадгуытæ нæ горæты куы байгом сты, уæдæй фæстæмæ Хуссар Ирыстоны уæрæсейаг æмбæстæгтæ активонæй цæуынц æмæ сæ конституцион барæй пайда кæнынц Уæрæсейы Федерацийы президентон æвзæрстыты хайад райсыны рæстæджы.
Бацымыдис кодтон, цы зæрдæйы уагимæ цæуынц æвзарджытæ æмæ цæмæ æнхъæлмæ кæсынц ацы æвзæрстытæм, уымæ.
Тыбылты Земæ, горæты цæрæг:
– Æз абон æрбацыдтæн æвзарæн фадыгмæ тынг хорз æмæ хъæлдзæг зæрдæйы равгимæ. Цы кандидатурæйæн схъæлæс кодтон, мæнæн уыцы адæймаджы политикæ мæ зæрдæмæ цæуы. Стæй ма махæн не ‘мбæстæгты фылдæр хайæн ис уæрæсейаг паспорт. Бузныг Уæрæсейы разамынадæн, йæ адæмæн. Сæ фæрцы махмæ ис стабилондзинад. Æз, куыд Хуссар Ирыстоны цæрæг, афтæ стыр аргъ кæнын нæ сæйраг æмцæдисонæн, уымæн æмæ Уæрæсе æппæтдæр сарæзта æмæ аразы, цæмæй абоны бон нæ республикæйы уа сабырдзинад.
Джыгкайты Эльбрус, горæты цæрæг:
– Мах тынг ахсджиаг боныл нымайæм абоны бон. Куыд ацæуой æвзæрстытæ, уымæ гæсгæ нæ сомбон дæр аскъуыддзаг уыдзæн. 2008 азы хæстон архайдтыты фæстæ уæды Уæрæсейы разамынад цы ахсджиаг хъуыддаг сарæзтой, уый куы нæ уыдаид, уæд абон мах сымахимæ нæ цæриккам хæдбар паддзахады. Уый тыххæй абон æз схъæлæс кодтон нæ паддзахады æмæ Уæрæсейы сабырдзинады тыххæй.
Плиты Джульеттæ, горæты цæрæг:
– Æз ме ‘мбал сылгоймагимæ æрбацыдтæн, цæмæй сæххæст кæнæм не ‘мбæстагон хæс. Ацы хъуыддаг æз нымайын тынг ахсджиагыл. Тынг хорз зæрдæйы равгимæ æрбацыдтæн æмæ хъæлæс радтон мæ Ирыстон æмæ Уæрæсейы рæсугъд æмæ дидинæфтыды тыххæй. Уырны мæ, абон не ‘мбæстæгтæ активон хайад кæй райсдзысты ацы æвзæрстыты. Уымæй мах Уæрæсейæн зæгъдзыстæм бузныг.
Зассеты Заремæ, пенсиисæг:
– Хъæлæс дæттын æз абон нæ республикæйы размæцыды, нæ сывæллæтты фидæны тыххæй, ацы хæдбардзинад æмæ сабырдзинад нæ къухты кæй политикæйы фæрцы бафтыдысты, уый пайдайæн. Махæн нымад паддзахад дæр Уæрæсейы фæрцы ис. Абоны президентон æвзæрстыты хорз фæстиуæгыл комкоммæ дæр баст сты не стабилондзинад æмæ сабырад.
Кокойты Мзия, студенткæ:
– Уæрæсе махæн у нæ иууыл ахсджиагдæр партнер. Уый нын абоны онг дæр кæны егъау æххуыс. Уый махæн хъахъхъæны дунеон политикон аренæйыл нæ интерестæ. Æмæ æрмæстдæр Уæрæсейы къухдариуæгады фæрцы абоны бон мах зæххыл ис сабырдзинад.
Къæбулты Маринæ: æхсæнадон архайæг:
– Ахсджиаг æмæ нысаниуæгджын æвзæрстыты хайад хъуамæ райса алы уæрæсейаг æмбæстаг дæр. Хуссар Ирыстон стыр нысаниуæг дæтты ацы æвзæрстытæн, уымæн æмæ нæ абон æмæ нæ фидæн Стыр Уæрæсеимæ уынæм æмæ бæттæм.
Ацы бонтæ сты хъысмæт скъуыддзаггæнæн Уæрæсейæн дæр æмæ махæн дæр. Хъуамæ равзарæм нæ рухс сомбоны аккаг раздзоджы, кæцы нæ бахъахъхъæндзæн æмæ нæ размæ акæндзæн рæсугъд фидæнмæ.
ТАНДЕЛАТЫ Виленæ
