Уæрæсейы Федерацийы президентон æвзæрстыты Владимир Путины кандидатурæйы фарс балæууыны нысанæн нын митинджы рæстæджы нæ республикæйы æмбæстæгтæ нæ бавгъау кодтой сæ арфæтæ, сæ фæндиæгтæ æмæ цы зæрдæйы равгимæ хайад райсдзысты нæ бæстæйæн уыцы нысаниуæгджын цауы.
Хуыгаты Илья, профессор:
– Цы стыр политикы фарс балæууыны нысанæн æрæмбырд стæм Театралон фæзуатмæ, уый Хуссар Ирыстонæн тынг зынаргъ адæймаг у. Уымæн æмæ Владимир Путины æгæрон æххуыс куы нæ æнкъариккам, уæд нæ бæстæ афтæ размæ нæ цæуид. Уæззау хæстон æмæ æвадат рæстæджытæ сæ дæрзæг фæд ныууагътой нæ бæстæйыл, æмæ йæ рæстæджы Уæрæсейы раст политикон уынаффæйы руаджы хъахъхъæд æрцыд нæ хæстæфхæрд Ирыстон – абоны онг дæр ныфсджынæй хъахъхъæд цæуынц нæ паддзахадон арæнтæ æмæ нæ æмбæстæгтæ… мах хорз зонæм, нæ хорз сыхæгтæ нæм цы цæстæй кæсынц æмæ нын сæ цæст цы фæндиæгтæ уарзы.
Уæрæсе Хуссар Ирыстоныл кæй ауды, уымæн æвдисæн стæм мах – политикон, материалон, социалон æмæ æндæр æгъдауæй. Мæ зæрдæ зæгъы Владимир Путинæн ноджыдæр бирæ цæрæнбон, цæмæй афтæ æнтыстджын æмæ арæхстджынæй разамынад кæна бæстæйæн.
Саулохты Беслан, Зъуыбиры цæрæг:
– Путины политикæ куы нæ уыдаид, уæд мах абон ацы цъæх æмæ сæрибар арвы бын нæ цæриккам. Хуссар Ирыстоныл уæззау хæстон рæстæджыты фæстæ цыдæриддæр хорз хабæрттæ æрцыдысты, уыдон се ‘ппæт дæр ацы стыр политикы руаджы сты. Уый тыххæй абон æз сæрыстыр дæн Владимир Путинæй æмæ зæрдæрайæ æрбацыдтæн митинджы хайад райсынмæ.
Æлборты Эммæ, ХИПУ-йы ирон кафедрæйы кусæг, горæты администрацийы ахуырады хайады методист:
– Æз куыд ирон адæймаг, куыд Ирыстоны цæрæг, афтæ стыр аргъ кæнын абоны бонæн. Махæн абон у бæрæгбоны хуызæн – Уæрæсеимæ иудзинады, æмзонддзинады бæрæгбон. Æмæ уый, мæ хъуыдымæ гæсгæ, алкæмæн дæр афтæ у, уымæн æмæ æнæ Уæрæсе махæн уæвæн нæй. Стыр фæндиæгтæ зæгъын æз Уæрæсейы Федерацийы къухдариуæгадæн дæр æмæ мæ райгуырæн бæстæйы разамынадæн дæр.
Æмбаргæ ахаст нæм кæй дарынц æмæ нæ фарсмæ кæй сты, уый не ‘ппæтæн дæр æхсызгон у. Мæ зæрдæ зæгъы мæ райгуырæн Ирыстонæн сæ политикæимæ æмдзу кæнын, уымæн æмæ æнæ Уæрæсе махæн уæвæн нæй.
Наниты Альбинæ, Къуайсайы цæрæг:
– Æвæджиаг хæсыл банымадтон ацы митинджы хайад райсыны хъуыддаг. Уымæн æмæ уымæй æз æвдисын мæ разыдзинад, Уæрæсейы стыр фæтæг Владимир Путины кандидатурæйы фарс кæй балæудзынæн.
Йæ рæстæджы уый раст политикон уынаффæйы руаджы æз мæ кæстæртимæ цæрын абон сабыр арвы бын, куыд мадæн, афтæ уый тынг ахсджиаг у мæнæн.
Культурæйы, ахуырады, зонады фадыджы размæ цæуынц нæ фæсивæд, сæ сæрибар рæстæг нæ сывæллæттæ кæм æрвитой, ахæм бынæттæ цадæггай фылдæр кæнынц нæ республикæйы территорийыл – рæзгæ фæлтæрæн уыдон ахсджиаг сты, цæмæй рæзой æмæ размæ цæуой – уыдон се ‘ппæт дæр Уæрæсейы ныры къухдариуæгады раст æмæ рæстæгыл уынаффæты руаджы арæзт цæуынц.
Ирон адæмæй никуы ферох уыдзысты, нæ «хорз сыхæгтæ» ныл куыд аудыдтой æмæ нын сæ фыдаудæн архæйдтытæ цыхуызæн уæззау мысинæгтæй баззадысты. Уыцы рæстæг æмæ дугæй нæ фервæзын кодта Стыр Уæрæсе – цагъайраджы дуг æмæ рæстæгæн скодта кæрон.
Раджы дæр æмæ æрæджы дæр æвзæрстытæ Хуссар Ирыстоны адæмæн сты бæрæгбоны хуызæн – ныр дæр хайад райсдзыстæм уыцы ахсджиаг æмæ нысаниуæгджын политикон цауы. Хуссарирыстойнаг адæм кæдфæнды дæр сты активон æвзарджытæ, æмæ ныр дæр, дызæрдыггаг нæу, активонæй кæй равзардзыстæм нæ фидæны тыхджын фæтæджы.
Къæбулты Маринæ
