Нæ республикæйы финансон-бюджетон къабазы закъондзинад сфидар кæныны хъуыдддажы йæ архайд уæзгæ у РХИ-йы Контролон-нымайæн палатæйæн. Аивгъуыйгæ азы ацы ведомствойæн цы бантыст саразын, куыд скъуыддзаг кодта йæ разылæууæг хæстæ, афтæ ма дарддæр йæ разы цы хæстæ лæууы, уыдæттыл дзырд цыдис йæ коллегийы рабадты.
Боны фæткмæ рахастой ахæм фарстатæ, куыд аивгъуыйгæ азы бакæнгæ куысты фæстиуджыты тыххæй хыгъд сфидар кæнын æмæ 2024 азы фыццаг æмбисы куысты план сфидар кæнын.
Контролон-нымайæн палатæйы сæрдар Плиты Алымбег бузныг загъта йæ коллегæтæн сæ æнтысгæ архайды тыххæй æмæ æрдзырдта сæ куысты сæйрагдæр фæстиуджытыл. Куыд банысан кодта, афтæмæй хыгъдон рæстæджы контролон-нымайæн палатæ йæ хæстæ æххæст кодта финансон-бюджетон къабазы закъондзинад сфидар кæныны фæдыл. Республикæйы куыстуæттæ, уагдæттæ æмæ организациты ауагъд æрцыдис 27 контролон мадзалы, уыдонæй 22 кæронмæ куыст фесты, 5 мадзалы фæдыл та дарддæр куыст цæуы.
«Цы мадзæлттæ фесты кæронмæ куыст, уыдоны фæдыл арæзт æрцыдысты басгæрсты хатдзæгон документтæ, цыран æвдыст æрцыдысты раргомгонд цухдзинæдтæ. РХИ-йы Президенты номыл арвыстам хицæн контролон мадзæлтты цыды æмæ сæ фæстиуджыты тыххæй фыстæджытæ.
Куыстуæтты разамонджыты номыл та æрвыст цыдысты æмбарынгæнæн фыстæджытæ раргомгонд цухдзинæдтæ аиуварс кæныны æнæмæнгхъæуындзинады тыххæй. Ахæм фыстæджытæ хыгъдон рæстæджы æдæппæт æрвыст æрцыд 17. РХИ-йы Прокуратурæ æмæ Паддзахадон æдасдзинады комитетмæ та арвыстам 13 басгæрсты фæдыл æрмæджытæ», – радзырдта Контролон-нымайæн палатæйы сæргълæууæг.
Коллегийы уæнгтæ æмхъæлæсæй сфидар кодтой аивгъуыйгæ азы бакæнгæ куысты тыххæй хыгъд.
2024 азы фыццаг æмбисы куысты планы проект коллегийы уæнгтыл развæлгъау уæрст кæй æрцыдис, уымæ гæсгæ йемæ зонгæ уыдысты, хорзыл æй банымадтой æмæ йыл æмхъæлæсæй сразы сты.
