Ветеранты фæлтæрддзинад – фæзминаг кæстæртæн

Нæ республикæйы егъаудæр æхсæнадон организацитæй сæ иу у Ветеранты организаци. Аивгъуыйгæ азы, уый йæ хæстæ æххæст кодта зын уавæрты. Хъуыддаг уый мидæг уыдис æмæ дыууæ къордыл фæдих сты, кæрæдзийы нал æмбæрстой, æмæ сæ 2022 азы 15-æм сентябры ногæй бахъуыд æвзарæн конференци ауадзын. Уæд сæвзæрстой ветеранты организацийæн ног совет. Советы сæрдарæй та æвзæрст æрцыд Хуыбылты Руслан. Афтæ ма сæвзæрстой сæрдары хæдивæг, бæрнон секретарь æмæ контролон-ревизион къамис.

Сæвзæргæ уавæрмæ нæ кæсгæйæ, республикæйы ветеранты организаци бæрæг куыст кодта, номхыгъды сæм чи сты, уыдонимæ. Номхыгъды та сæм ис 1105 ветераны. Стыр Фыдыбæстæйон хæсты хайадисджытæй ма баззад æрмæстдæр иу адæймаг æмæ уый дæр цæры Цæгат Ирыстоны, фæсчъылдымы архайджытæ сты 40, куысты ветерантæ – 845, Гарзджын Тыхты ветерантæ – 15, Стыр Фыдыбæстæйон хæсты хайадисджыты идæдзтæ – 33, афгайнаг хæсты ветерантæ – 98, Венгрийы цауты ветерантæ -13, Советон Æфсады службæйы рæстæджы  чи фæсахъатджын сты, ахæмтæ – 6 æмæ мидхъуыддæгты министрады ветерантæ – 54 адæймаджы.

Ветеранты совет сæрмагонд хъусдард здахы æххуысхъуаг ветерантæм æмæ сын бакæны материалон æххуыс. Цæвиттон, ивгъуыд азы декабры мæйы, ахæм æххуыс фæйнæ 5 мин сомы райстой 27 ветераны, ацы аз январы та -28 ветераны.

Ветерантæн ма баххуыс кæнынц æндæр æмæ æндæр организацитæ дæр. Ветеранты советы сæрдар Хуыбылты Руслан куыд зæгъы, афтæмæй сын фæстаг рæстæджы сæ хыгъдмæ æхцайы фæрæзтæ ахыгътой РХИ-йы Национ банг (йæ сæрдар Джиоты Жаннæ), гом акционерон æхсæнад “Ари плюс” (йæ сæрдар Шамрина Еленæ), ресторан “Бынæттон” (йæ хицау Хуыбиаты Альберт). Ацы здæхты, Хуыбылы фырты ныхæстæм гæсгæ, куыст дарддæр дæр цæудзæн.

Ветеранты организаци йæ иууыл ахсджиагдæр хæстæй сæ иуыл нымайы фæсивæды `хсæн æмбарынгæнæн куыст кæнын, интернационалон æмæ патриотон æнкъарæнтыл сæ хъомыл кæнын, хистæр фæлтæрæн кад кæнын, нæ адæмы æгъдæуттæ æмæ традицитæ хъахъхъæнын.

Ветеранты Советы уæнгтæй бирæтæ уыцы нысанæн хайад райсынц æхсæнадон царды, рæзгæ фæлтæры, ахуырдзау фæсивæдимæ куысты æмæ æндæр ахсджиаг мадзæлтты дæр. Цæвиттон, аивгъуыйгæ азы хайад истой иумиагахуырадон скъолаты, зæрдылдарæн боны цытæн цы мадзæлттæ уагътой, уыдоны. Ахæмты куыд зæгъæм: “Æхсардзинады бон”, “Стыр Фыдыбæстæйон хæсты фæндæгтыл”, “Мысæн бон”, “Стыр Уæлахизыл 77 азы сæххæсты цытæн.” Ахæм мадзал уагъд æрцыд Анахарсисы номыл библиотекæйы дæр æмæ дзы активон хайад райстой ветерантæ. Афтæ ма хайад истой скъолаты уагъд цæуæг гом урокты. Ивгъуыд азы ма хайад райстой, ноябры мæйы Мæскуыйы уагъдцæуæг ду-неон цæдис “Хæдбар паддзахадты ветеранты æхсæнадон организациты æмхæларад”-ы конференцийы, афтæ ма æндæр æмæ æндæр мадзæлтты дæр.

Ветеранты организацийы уæнгтæ хистæр кары адæм кæй сты, уый хынцгæйæ, се `нæниздзинадмæ хъæуы фылдæр хъусдард здахын. Уымæ гæсгæ, ветеранты совет республикæйы æнæниздзинад хъахъхъæнынады министрадмæ барвыста 71 адæймаджы номхыгъд, ахæм куырдиатимæ, цæмæй се ‘нæнинздзинад банывыл кæной санаторион – курортон улæфæн хосгæнæндæтты, фæлæ æндæр æмæ æндæр хосгæнæндæттæм æрвыст æрцыдысты æрмæстдæр 32 адæймаджы.

Ветеранты советы сæрдар куыд загъта, афтæмæй республикæйы территорийыл арæзт æрцыдысты 42 райдиан ветеранон организацийы, уыдонæй 20 сты горæт Цхинвалы, иннæтæ та – районты.

БЕСТАУТЫ Валя