Хуссар Ирыстоны къорд азты размæ, цалынмæ автоскъола нæ уыд, уæдмæ ахуырад райсыны тыххæй не ‘мбæстæгтæ цыдысты Уæрæсемæ æмæ уым истой машинæ скъæрыны бæлвырдгæнæнтæ. Ацы хъуыддаг æрбæстон кæныны тыххæй нæ областы уæды разамынад хатыд Гуырдзыстоны æмбæлон органтæм æмæ, æппынфæстаг, сæххæст сæ бæллиц – 1970 азы 10 августы Гуырдзыстоны ДОСААФ-ы комитет Цхинвалы байгом кодта авто-мотоклуб. Уымæн йæ фыццаг хистæрæй нысангонд æрцыд Цхинвалы цæрæг Гогинашвили Михаил æмæ дзы фæкуыста 1980 азмæ. Хæдивæг та уыд Къæбысты Вячеслав. Автомотоклубы фыццаг ахуыргæнджытæ уыдысты Хетæгкаты Джемал, Джиоты Зауыр, Хухашвили Михаил, Цхуырбаты Гарик, Гахеладзе Гайоз, Дзабиты Владимир. Машинæ скъæрын ахуыр кæныны фыццаг мастертæ та уыдысты Джиоты Алыксандр, Инаури Дауыт, Налбандов Отар æмæ Къæбулты Альберт, бухгалтертæй та куыстой Цхуырбаты Хаджумар æмæ Битеты Мария. Æрвылаз дæр сæ рауагъдонты нымæц хæццæ кодта 350-400 ахуыргæнинагмæ. Курсытæ чи фæуд кодта, уыдон лæвæрдтой ГТО-йы нормативтæ. Хуыздæр фæстиуджытæ уынын кодтой ахæм ахуыргæнджытæ, куыд Габатты Мурат, Хуыбецты Руслан, Къасрадзе Гия, Биганаты Михаил, Дзабиты Мендик æмæ æндæртæ. Практикон æгъдауæй скъæрыны инструктортæ-мастертæ та уыдысты Челæхсаты Алыксандр, Джиоты Алыксандр, Налбандов Отар, Тыбылты Владимир, Куымæридтаты Георги, Плиты Харитон æмæ Чехойты Альберт.
Сæхи тыхтæй бæрæг куыст бакодтой ахуырадон-материалон базæ рауæрæх æмæ фæхуыздæр кæныныл, уыцы нымæцы автомобилы арæзт, змæлынгæнджыты кълас æмæ æндæртæ. Автодром сырæзт 3 гектары фæзуатыл æппæт элементтимæ.
1980 азы Цхинвалы автоскъолайы хистæрæй кусын райдыдта æфсæддон службæгæнæг, майор Джиоты Владимир Самсоны фырт. Джиойы фыртмæ уыд стыр фæлтæрддзинад, автомобилон транспорт зыдта бæрзонд æмвæзадыл, бынтондæр сног кодта автомобилон хæдзарады фæлындзынад, ахуыргæнæн кълæсты сног кодта æххæстæй. Уый фæстиуæгæн коллектив Гуырдзыстоны ДОСААФ-ы йе ‘нгæс автоскъолаты ‘хсæн ссис иууыл раззагондæр. Стыр бавæрæн бахаста уыцы хъуыддагмæ автоскъолайы хистæры хæдивæг, йæ адæмы æцæг патриот, уæлдæр категорийы специалист Къæбысты Вячеслав. Уый ам фæллой кодта йæ сырæзтæй суанг 1995 азмæ. Уыцы аз автоскъолайы хистæрæй снысан код-ой Икъоты Мухары æмæ дзы бакуыста 2004 азмæ. Уæд скъолайæн балхæдтой «Жигули»-тæ 4 иуæджы, Хеиты территорийы сарæзтой автодром ног стандарттæм гæсгæ æмæ активон хайад истой ГССР ДОСААФ-ы скъолаты хсæн спортивон æмæ æндæр ерысты. Уыцы мадзæлттæ бацæттæ кæнын æмæ ауадзынмæ стыр бавæрд бахастой хайады хистæры хæдивæг Гусойты Гурам æмæ спорты инструктор Тадтаты Анатоли. Сындæггай скъолайы коллек-тив бæххæст æрцыд æвзонг перспективон ахуыргæнджытæй, уыцы нымæцы Кокойты Вадим, Тедеты Вадим, Дзабиты В., практикон ахуырты инструктортæ Куымæридтаты Георги, Уалыты Важа æмæ Джыккайты Георги. Икъойы фырты фæстæ автоскъолайы хистæрæй 2004 азы нысан æрцыд Хъуылымбегты Петр æмæ дзы цæсгомджынæй фæкуыста 2012 азы онг. 2007 азы июлы мæйæ 2013 азы ноябры мæймæ автоскъола уыд Республикæ Хуссар Ирыстоны Мидхъуыддæгты министрады дæлбар. 2013 азы ноябры 13-æм бонæй Хуссар Ирыстоны Хицауады уынаффæмæ гæсгæ автоскъола Мидхъуыддæгты министрады балансæй раконд æрцыд æмæ лæвæрд æрцыд Хуссар Ирыстоны паддзахадон университеты балансмæ. Скъолайы хистæрæй та уыцы азæй фæстæмæ кусы Кулиджанов В.. Уымæн, университеты ректор Тедеты Вадимы æдзухон æххуысы фæрцы йæ куысты ис хорз æнтыстытæ. Ахуыргæнæн кълæстæ сфæлыстой, балхæдтой ахуыргæнæн автомашинæтæ, сырæзт университетæн йæхи мидæг автодром. Бирæ сты, ахуыр кæнын кæй фæнды ацы автоскъолайы, уыдон нымæц, куыд республикæйы æмбæстæгтæй, афтæ ма ацы уæлдæр ахуыргæнæндоны студенттæй дæр.
Æрдæг æнус лæггад кæны иузæрдионæй Цхинвалы автоскъола нæ республикæйы æмбæстæгтæн, йæ рауагъдонтæ та намысджынæй фæллой кæнынц нæ адæмон хæдзарады хицæн къабæзты. Фылдæр æмæ хуыздæр æнтыстытæм у йæ тырнындзинад коллективæн æмæ сын æнтысæд.
ХУЫБИАТЫ Никъала
Comments are closed, but trackbacks and pingbacks are open.