Нæ бæстæйы территорийыл инфекцион низ апарахатæй уæлдай уæз æрæнцад медицинæйы къабазы кусджыты уæхсчытыл. Сæрмагонд хъахъхъæнæн дзаумæтты уыдон дæргъвæтин рæстæджы уæхскуæзæй кусынц коронавирусæй рынчынтæн æнæмæнгхъæуæг медицинон æххуыс бакæныныл. Уымæн æвдисæн стæм мах дæр æмæ цы рынчынтæн хос кæнынц, уыдон дæр.

Æнæниздзинад хъахъхъæныны къабазы кусджыты ныхæстæм гæсгæ ныртæккæ бирæпрофилон медицинон центры нæ фаг кæны астæуккаг медицинон персонал. Уымæн æмæ уыдон дæр, ацы рынчынтимæ кусгæйæ, рынчын кæнынц æмæ фæтыхсынц. Медицинон хотæ æмæ санитаркæтæ сæ комкоммæ хæстæй дарддæр рынчынтæн æххуыс кæнынц сынтæгыл æрзилынæн, хæрын сын кæнынц, зилынц сæм æмæ куысты фæстæ адæймаджы хуызæн дæр нал вæййынц.

Астæуккаг нымадæй, иу медицинон хо «сырх зонæйы» кæсы æртынæй фылдæр рынчынмæ. Уый тынг бирæ у иу адæймагæн, хатт сыл æххæсгæ дæр нæ фæкæнынц. Уымæ гæсгæ алы адæймаг дæр æмбаргæ ахаст хъуамæ дара нæ дуджы ацы хъайтарты куыстмæ.

Медицинон центры алы къабазы медперсонал дæр ныртæккæ архайынц ацы низы ныхмæ, уымæн æмæ профилон фадыджы персонал нæ фаг кæны. «Сырх зонæйы» рад хæссынц медцентры алкæцы хайады медперсонал дæр.

Коцты Илонæ медицинон хойæ кусы горæты поликлиникæйы. Бирæнымæц рынчынтæ, персоналы хъуагдзинад æмæ сæм æххуысы къух фæдарын кæй хъæуы, уыдæттæн æвдисæн, æвзонг чызг уадидæгæн йæхи ныффыссын кодта ацы зонæмæ. Кусы боны сменæйы, йæ куыст хатт аххæссы райсом фараст сахатæй изæры авд сахатмæ: «Цы хи бахъахъхъæнынæн дзаумæтты вæййæм изæрмæ, уыдоны знаг фæдарæд … Фæлæ нæ хъæуы ацы низы ныхмæ тох кæныны сæр. Фæллайæм, куыд физикон, афтæ моралон æгъдауæй дæр, тыхст рынчынтæм кæсгæйæ – нæ горæт чысыл у, æмæ алкæй дæр зонæм – зæрдиагæй дæ фæнды баххуыс кæнын, фæлæ дæ бон цы у? Ацы æгъатыр вирус ахæм у, æмæ алы адæймаг дæр алыгъуызонæй йæ ахæсты хауы».

Илонæ афтæ аныгъуылд коронавирусæй рынчынтимæ куысты æмæ йæ цымæ рох фæцис, ныййарæг, æввахс хиуæттæ дæр ма йын кæй ис… Йæ ныййарæг фыд Гайоз зæрдæнизджын лæг ацы бонты æррынчын æмæ, хъыгагæн, фæзиан. Нæ бары уыцы хъуыддаг йæхицæн Илонæ, зæгъгæ, чизоны ма исты амæлттæй фæдаргъдæр кодтаин ма уарзон бабайы цардыбонтæ æмæ ма йæ уды мидæг уæддæр федтаин…

Дзеранты Линдæ дæр кусы горæтон поликлиникæйы медицинон хойæ. Уымæн та йæ бæрны ис æмбæстæгтæн ацы низ рабæрæг кæныны нысанæн тестытæ аразын. Медицинон центры фæлгæттæй дарддæр ацы æвзонг чызг тестытæ аразынмæ цыд тыхст æмбæстæгтæм хæдзæрттæм дæр.

Линдæйы хо Ландæ та кусы рынчындоны поликлиникæйы медицинон хойæ. Уый, ацы низ рапарахатæй фæстæмæ куыста инфекцион хайады. Карантины цы æмбæстæгтæ уыд, уыдонæн кодта медицинон лæггæдтæ. Нырттæккæ та уыцы куыст ад-арддæр кодта медицинон центры «сырх зонæйы».

Сæ куыстыл – æнувыд, фердæхтджын хотæ фæллад нæ зыдтой, дыстæсчъилæй архайдтой, кæмæн йæ бæрны цы уыд, уым æнæзæрдæхудт куыст кæнынмæ. Фæлæ ныртæккæ уыдонæн сæхицæн дæр хъæуы, сæхæдæг цахæм æххуыс кодтой, ахæм æххуыс, уымæн æмæ сæм, рынчынтимæ кусгæйæ, баирвæзт ацы æнæхайыры инфекцион низ æмæ ныртæккæ хос кæнынц.

Гобозты Ланæ медицинон хойæ кусы хирургион хайады. Сывæллæтты рынчындоны уый сменæйы куыста фæндзай коронавирусæй рынчынимæ. Ланæйæн йе ‘нæниздзинад йæ уагыл кæй нæу, уый аххосагмæ гæсгæ йæ бон нал бацис кусын ацы зонæйы. Уый куыста изæры цыппар сахатæй райсомы фараст сахатмæ: «Уыцы рæстæг дын иу ран æрбадт нæй. Рынчынтæ улæфынц туаггуыр, æдзух сæ хъæуы бæрæг кæнын, кæмæн капельницæ æвæрын хъæуы, кæмæн æй исын хъæуы, кæмæн судзин аразын афон у, кæмæн – хос дæттын афон …».

Ланæйы сменæйы йемæ куыстой дохтыр Болататы Шоренæ, медицинон хотæ: Коцты Евелинæ, Туаты Фатимæ æмæ Аленæ.

Алы медицинон кусæджы хъæбатыр куыст равдисыныл дæр архайæм мах, æмæ дарддæр дæр фысдзыстæм сæ иузæрдион архайдыл. Алкæй ном дæр ардзыстæм, цæмæй алчи дæр зона æмæ сын табу кæна медицинон къабазы алы фæрнджын кусæгæн дæр. Уадз, æмæ зоной, рынчындоны æддейæ цы адæм ис, уыдон дæр сын иттæг хорз кæй æмбарынц сæ уæззау æмæ æнæрынцой куыст. Зын у, дæ риуыдзаг сулæфын дæ бон цы сæрмагонд     дзаумæтты нæу, уыдоны мидæг, фæлæ сæм ахæм уæззау уаргъ æрхаудта дуг æмæ рæстæгæй, æмæ йæ иууыл иумæ цы ахæссæм, ахæм арфæ нæ Дунескæнæгæй уæд!

КЪÆБУЛТЫ Маринæ

Comments are closed, but trackbacks and pingbacks are open.