Президент Гаглойты Алан хайад райста Æдасдзинады паддзахадон комитеты коллегийы рабадты. Хатдзæгтæ сарæзтой 2023 азы оперативон-службæйон архайдæн æмæ сбæлвырдчындæуыд оперативон æмæ аналитикон куысты эффективондзинад фæбæрзонддæр кæныны фæдыл сæйраг здæхтытæ.
Ведомствойы куысты тыххæй хыгъд æмæ ацы азы плæнтты тыххæй радзырдта Æдасдзинады паддзахадон комитеты сæрдар Олег Ширан.
Паддзахады сæргълæууæг бузныг загъта ведомствойы кусджытæн профессионализмы æмæ бæстæйы къухдариуæгад цы хæстæ æрæвæры, уыдон оперативонæй скъуыддзаг кæнынмæ цæттæдзинады тыххæй. Гаглойты Алан банысан кодта, зæгъгæ, Æдасдзинады паддзахадон комитет у Хуссар Ирыстоны стабилондзинад æмæ æдасдзинад ифтонг кæныны, æмбæстæгты бартæ æмæ сæрибардзинæдтæ хъахъхъæныны сæйраг ведомство, йæ кусджытæ та алыхатт дæр лæууынц фыдракæнды ныхмæ тох кæныны фыццаг рæнхъыты.
«Ацы аз уыдзысты Уæрæсейы Федерацийы президенты æвзæрстытæ. Уый нæ республикæйы æхсæнадон-политикон царды у ахсджиаг цау. Æнæмæнгхъæуæг у бæрнон ахаст равдисын Хуссар Ирыстоны Уæрæсейы президенты æвзæрстытæ цæттæ кæныны æмæ ауадзыны рæстæджы æдасдзинад ифтонг кæныны фарстатæм», – загъта Президент.
Уый банысан кодта, зæгъгæ, бæстæйы æмбæстæгты æддагон æмæ мидæггагон тасдзинадæй хъахъхъæнынад ифтонг кæныны фæдыл паддзахадон æдасдзинады фарстатæ æдзух кæй сты къухдариуæгады хъусдарды бын.
Президент банысан кодта, зæгъгæ, куыст цæуы зын рæстæджы æмæ хынцын хъæуы абоны реалитæ.
«Зын геополитикон уавæртæ хынцгæйæ иуæй-иу ныгуылæйнаг спецслужбæты фарсæрдыгæй арæнгæрон районты сæвзæры уавæры дестабилизаци æмæ карздæр кæныны тасдзинад. Уымæ гæсгæ хъæуы райсын æппæт æнæмæнгхъæуæг мадзæлттæ контрразвæдсгæрсты фæдыл фæтыхджын кæнын, паддзахадон арæн хъахъхъæныны фæдыл мадзæлттæ фæбæрзонддæр кæнын, æппæт провокацитæм оперативонæй хъусдард здахын, – загъта Гаглойты Алан.
Йæ ныхæстæм гæсгæ, Æдасдзинады паддзахадон комитеты кусджытæ тох кæнынц экстремизм æмæ коррупциийы ныхмæ, серьезон хъусдард здæхт цæуы Хуссар Ирыстоны экономикон æдасдзинад ифтонг кæныны фарстатæм, куыст цæуы УФ-йы Æдасдзинады федералон службæ, Хуссар Ирыстоны Уæрæсейы Æдасдзинады федералон службæйы арæнгæрон управлениимæ æмгуыстад фидардæр кæныны фæдыл.
Кæронбæттæны паддзахады сæргълæууæг банысан кодта, зæгъгæ, Æдасдзинады паддзахадон комитет эффективонæй æмæ æххæстбæрцæй æххæст кодтой Райгуырæн бæстæйы раз сæ хæс, æмæ ныфс бавæрдта, уыдон дарддæр дæр аккагæй кæй скъуыддзаг кæндзысты сæ разылæууæг хæстæ.
Президент ма ведомствойæн радта автомашинæ «УАЗ-Патриот».
