Дарддæр кæнæм нæ рубрикæ «Чысыл æмæ астæуккаг амалиуæгады паддзахадон программæ»-йы æххуысæй чи куыд спайда кодта.
Абон нæ редакцийы уазæг у Уазæгты Къоста. Уый ивгъуыд аз райста хатырон кредит æмæ дзы Цхинвалы районы Зонкъары хъæуы аразы улæфæн зонæ.
– Дæ хорзæхæй, радзур-ма, сæрмагондæй Зонкъары хъæуы бизнес саразын цæмæн сфæнд кодтай?
– Нуæртты низтæ, радикулит, стæгниз – ацы низтæн рагæй фæстæмæ дæр адæм хос кодтой Ирыстоны кæмтты цы алыгъуызон минералон дæттæ ис, уыдонæй. Уыцы дæттæй бирæ ис Зонкъары комы дæр, мæнæ куыд фæзæгъынц, алы къахдзæфæн дæр – суæрттæ хæрх. Ам цы æрдз ис, уый рæсугъддзинад, уазал хæххон суадæтты дон, хихджын æмæ сыфтæрджын хъæдты сатæг уæлдæф дæр æвдадзы хосы хуызæн сты адæймагæн. Иу бон дæр адæймаг йæхи ам куы аирхæфса, уæддæр банкъардзæн цавæрдæр æхцондзинад æмæ уæнгрогдзинад.
Мæ фыдæлтæ Сиатайæ рацæугæ сты уый Зонкъарæй мидæгаудæр у, фæлæ уым ныртæккæ «Æвæрд хъæд»-ы зонæ ис, арæзтадтæ аразыны бар дзы нæй. Гъе, уымæ гæсгæ сарæзтон ацы улæфæн зонæ Зонкъары хъæуы. Ам, комы цы диссаджы хосгæнæн суадæттæ ис, уыдонæн сæ миниуджытæ рагæй фæстæмæ бæрæг сты. Суæрттæ иууылдæр сты æнцонвадат бынæтты, ис сын сæрмагонд нæмттæ дæр. Цымыдисаг уый у, æмæ кæрæдзимæ сты æввахс, фæлæ сæ хосгæнæн миниуджытæ иугъуызон не сты. Иу дзы сондоны ад кæны, иннæ карз æмæ сыгъдæг суары ад. Цъус фалдæр та æндæр суар, сæрдыгон бон дзы аназæн нæ вæййы фыр уазалæй. Хъæдмæ мидæгау куы бацæуай, уæд дзы ис æхсæз суары. Фæлæ уыдонæн сæ хосгæнæн миниуджытæ никуы ничи сбæрæг кодта, æцæг, иннæтæй цъус æнаддæр сты. Сæ иу – цæстысыджы хуызæн рæсугъд, иннæйæн згæгъуыз у йæ донвæд.
Ам, Зонкъары хъæумæ бацæуæны рахиз фарс, Советон дуджы арæзт уыд цалдæр корпусы, уым улæфт бонты сæ рæстæг æрвыстой обком æмæ райкомты бæрнон кусджытæ. Уый фæстæ-иу сæ алчидæр суары дон ахаста йæ хæдзармæ. Хистæр фæлтæры лæгтæ зæгъынц, ацы суар ахъаз кæй уыд нуæртты низтæн. Стæй, дам, тынг сæфта фæллад дæр. Сæрдыгон, дам – иу хосдзаутæ улæфынмæ ацы суары цурмæ цыдысты. Уымæй чысыл уæлдæр ма ис æнгæс суар, фæлæ уый дæр аразæг нæй æмæ тæдзы дарддæр Чысыл Леуахийы донмæ. Афтæмæй та ацы комбæстæ нæ республикæйы цæрджытæн у уарзон бынат, сæрды тæвдбонты сæхи ам фæирхæфсынц. Зонкъары хъæуы цæрæг зæронд лæг мын куыд радзырдта, афтæмæй цалынмæ гуырдзиаг-ирон конфликт нæ райдыдта, уæдмæ Гуырдзыстоны хицауад фæнд кодта цады былгæрон курорт саразынмæ ныхлæуды рæстæджы. Зонкъары хъæуæй фæсырдтой ирон адæмы, басыгътой сын сæ хæдзæрттæ. Фæлæ тыхгæнджытæн сæ фæндтæ сæ хъуыры фæбадтысты.
Абон комбæсты фарн нымæг кæнын нæ уадзынц Уалыты Тамаз æмæ Азæ. Сæхи тыхтæй архайынц, фыдæбон кæнынц, хъæу æдзæрæг кæнын нæ уадзынц.
Зонкъары хъæуы фæстаг азты фæзынд ноджыдæр бирæ ногарæзт хæдзæрттæ, фæлæ уыдонæй æппынæдзух уым ничи цæры, æрмæстдæр сæрдыгон бонты бацæуынц улæфынмæ. Уымæн æмæ Зонкъармæ цæуæн фæндаг æнцонвадат нæу. Комбæсты цъус цæрджытæ кæй ис, уый тыххæй фæндæгтæм дæр хъусдард нæ цæуы. Зонкъары комы æрдз ма хъæздыг у хосгæнæн кæрдæджытæй æмæ хæрынæн бæзгæ алыгъуызон хъæддаг гагадыргътæй.
Иудзырдæй, Зонкъаргомы хуызæн улæфæн бынат нæй. Уый туризмы фадыджы у иттæг перспективон. Уæлдæр куыд загътон, афтæмæй æвдадзы хос сты йæ суæрттæ. Фæлæ дзы æххæстæй кæй нæй пайда кæнæн, уый хъыгаг у. Зæгъæм, мæнæн кæд ныридæгæн цæттæ у мæ улæфæн зонæ, уæддæр æм электроны рухс уагъд нæй, æмæ мæ уый тынг къуылымпы кæны туристтæ райсынæн. Электроны рухс æрбауадзыны тыххæй бацыдтæн «Энергоресурс — Южная Осетия»-мæ, фæлæ уыдон нæ тагъд кæнынц фарст аскъуыддзаг кæнынмæ. Рухс мæм куы уаид, уæд ам хорз бынат у спортсмен сывæллæттæн сæрдыгон бонты сбортæ уадзынæн. Хорз уаид, республикæйы Æнæниздзинад хъахъхъæныны министрад, Спорты комитет æмæ Æрдзон ресурстæй пайда кæныны комитет иумæ куы бахынциккой ацы комбæсты æрдзон хæрзиуджыты нысаниуæг æмæ исты амæлттæй куы бакусиккой ваннæтæисæн, сывæллæтты лагертæ бакæныныл æмæ æндæр пайдахæссæг хъуыддæгтыл. Уый хорз уаид нæ адæмæн, туризмы райрæзтæн æмæ Зонкъары комбæсты дæр ногæй адæмы цард феггуырсид размæ.
ДУДАЙТЫ Авелиа
