Хуссарирыстойнаг ахуыргæнджытæ хайад райстой зонадон-практикон конференцийы

Хетæгкаты Къостайы 160 азы юбилейы сæраппонд РЦИ-Аланийы Ахуырады кусджыты дæсныйад бæрзонддæргæнæн институты уагъд æрцыд æппæтадæмон зонадон-практикон конференци ахæм темæйыл: «Нырыккон ахуырады бастдзинад Къостаимæ», зæгъгæ. Конференци сорганизаци кодтой РЦИ-Аланийы Ахуырад æмæ зонады министрад æмæ Ахуырады кусджыты дæсныйад бæрзонддæргæнæн институт.

Хайад дзы райстой Цæгат æмæ Хуссар Ирыстоны ирон æвзаг æмæ литературæйы ахуыргæнджытæ. Мадзалмæ фæхуыдтой историон зонæдты доктор, профессор, академик Мæхæмæтты Ахуырбегы, кæцы доклад бакаст Къостайы публицистикæйы фæдыл.

Конференци байгом кодта æмæ йæ хайадисджытæн æнтыстджын куысты тыххæй арфæ ракодта институты проректор Дзæхойты Ларисæ. 

Конференцийы куысты хайад райстой хуссарирыстойнаг ахуыргæнджытæ фондзæй – 6-æм, 9-æм астæуккаг скъолаты, Колыты Аксойы номыл аивæдты паддзахадон лицейы,  горæт Цхинвалы скъола-интернаты æмæ Дменисы астæуккаг скъолайы  ирон æвзаг æмæ литературæйы ахуыргæнджытæ Дыгъуызты Лианæ, Зассеты Зарæ, Гæбæраты Фатимæ, Цоциты Галинæ æмæ Къусраты Анжелæ.

Дыгъуызты Лианæ доклад бакаст ахæм темæйыл «Къоста æмæ Ирыстон», Зассеты Зарæ – «Къоста æмæ Гаппо», Гæбæраты Фатимæ – «Къоста – нывгæнæг», Цоциты Галинæйы темæ уыд «Сидзæры хъысмæт Къостайы сфæлдыстады» æмæ Къусраты Анжелæ та бакаст доклад «Къоста æмæ уырыссаг литературæ». Конференцийы хайадисджытæ куыд банысан кодтой, уымæ гæсгæ хуссарирыстойнаг ахуыргæнджыты докладтæ уыдысты тынг цымыдисон. Конференцийы Джусойты Клавдия та бакаст доклад ахæм темæйыл: «Джусойты Нафи Хетæгкаты Къостайы тыххæй». Педагогон зонæдты кандидат, Ахуы-рады кусджыты дæсныйад бæрзонддæргæнæн институты ирон æвзаг æмæ литературæйы кафедрæйы сæргълæууæг Майрæмы-хъуаты Фатимæ пленарон æмбырды доклад бакаст Къоста æмæ ирон национ ахуырады темæйыл.

Æдæппæтæй конференцийы докладтæ бакастысты 60 адæймагæй фылдæр. РЦИ-Аланийы Ахуырады кусджыты дæсныйад бæрзонддæргæнæн институты ректор Исакова Людмила конференцийы хайадисджытæн радта сертификаттæ, мадзалы хайад кæй райстой, уый тыххæй.