Цхинвалы уагъд æрцыд Паддзахад Аланийы Кубок пауэрлифтинг, хуысгæйæ штангæ исын (жим лежа) æмæ бицепсмæ штангæ исынæй. Ерыстæ уагъд цыдысты республикон комплексон спортивон скъолайы. Уыдон стыр цымыдисдзинад сывзæрын кодтой спортуарзджытæм. Сæйраг призтыл тох кодтой 30 спортсмены бæрц. Се ’хсæн уыдысты «РХИ-йы пауэрлифтингы федераци»-йы президент Æлборты Леван æмæ федерацийы бындурæвæрæг, РХИ-йы парламенты сæрдары æххуысгæнæг Сиукъаты Алымбег дæр.
Пауэрлифтингмæ хауынц æртæ фæлтæрæны — ома «становая тяга», «жим лежа» æмæ штангæимæ æрбадын. Ам иууыл хуыздæр бæрæггæнæнтæ равдыстой Гаглойты Леван (65 кг, 405 кг бæрæггæнæн), Кирилл Никитин (72 кг, 540 кг), Гæбæраты Алик (80 кг, 370 кг), Джиоты Роберт (87 кг, 492 кг), Козаты Арсен (95 кг, 447 кг), Æлборты Леван (105 кг, 647,5 кг), Челдыты Азæмæт (115 кг, 650 кг).
«Жим лежа» кæй хонынц, уым та иууыл хуыздæр бæрæггæнæн-тæ равдыстой — Гаглойты Леван (65 кг, 130 кг), Кирилл Никитин (72 кг, 150 кг), Туаты Ацæмæз (80 кг, 130 кг), Тедеты Батрадз (87 кг, 155 кг), Санахъоты Алан (95 кг, 160 кг), Æлборты Леван (105 кг, 167,5 кг), Челдыты Азæмæт (115 кг, 170 кг), Мамиты Эдик (+115 кг, 150 кг).
Пауэрлифтинг æмæ «жим лежайæ» абсолютон уæлахиздзау ссис Кирилл Никитин, кæцы у спорты сгуыхт дæсны æмæ Уæрæсейы рекордсмен.
Бицепсмæ штангæ исынæй та сыгъзæрин майдантæ рамбылдтой: Гаглойты Леван (65 кг, 65 кг бæрæггæнæн), Дудайты Александр (72 кг, 52,5 кг), Туаты Ацæмæз (80 кг, 70 кг), Букуылты Владимир (87 кг, 65 кг), Хъæцлæуты Рауль (95 кг, 77,5 кг), Хуыбецты Сæрмæт (105 кг, 70 кг), Сиукъаты Алымбег (115 кг, 80 кг), Мамиты Эдик (+115 кг, 70 кг). Ам та абсолютон уæлахиздзау ссис Гаглойты Леван, кæцы 2022 азы Мæскуыйы Дунейы Кубокы ацы дисциплинæйы систа 70 кг æмæ сæххæст кодта Элитæйы норматив.
«Ерысты хайадисджытæ сты тынг амбициозон æмæ сæ кæд бирæтæм фæлтæрддзинад нæ уыд, афтæмæй тынг хорз бæрæггæнæнтæ равдыстой, уæддæр райгондæй нæ баззадысты сæ архайдæй æмæ æнæрхъæцæй æнхъæлмæ кæсынц радон турниртæм, цæмæй равдисой сæ тых. Уæлдай мæ фæнды рахицæн кæнын нæ ветерантæ Джиоты Роберт æмæ Бахъаты Аланы», — загъта «РХИ-йы пауэрлифтингы федерации»-йы президент Æлборты Леван.
Банысан кæнын хъæуы уый дæр æмæ федераци арæзт кæй æрцыд 2020 азы. Ацы хабар уæлдай æхсызгондæр уыд уыцы æвзонг лæппутæн, кæцытæ рагæй архайынц пауэрлифтингæй, фæлæ сын фадат никуы уыд сæ цæттæдзинад официалон ерысты бафæлварынæн.
Хуриты Батрадз
