Минводыйы фыццаг Кавказаг инвестицион равдысты фæзуаты фæлгæтты уагъд æрцыд Цæгат Кавказы регионтæ, Абхаз æмæ Хуссар Ирыстоны экономикæйы фадгуыты рæзт, инвестицион химæлвастдзинад фæбæрзонддæр кæныны фарстатæ.
РХИ-йы Экономикон рæзты министрады делегаци активон хайад райста равдысты. Цхин-валмæ æрцæугæйæ Хицауады Сæрдары хæдивæг – Экономикон рæзты министр Тадтаты Дзамболат сарæзта балцы цыбыр хатдзæгтæ.
Фыццаг рады вице-премьер бузныг загъта республикæйы къухдариуæгадæн Президент Гаглойты Аланы номæй Хуссар Ирыстоны экспозици организаци кæныны фарсты æххуысы тыххæй, афтæ ма компаниты къухдариуæггæнджытæн, активон хайад кæй райстой республикæйы равдыстон фæзуат цæттæ кæныны хъуыддаджы æмæ Национ музейæн, хæххон мыггæгты хуызтæ æрбавдисыны тыххæй.
«Национ экспозицийы фæлгæтты РХИ-йы Экономикон рæзты министрад бавдыста цалдæр проекты, кæцытæ реализаци цæуынц республикæйы территорийыл. Се ‘хсæн сты: Паддзахадон унитарон куыстуат «Багиатский наливочный завод», ООО «Высокогорная Кельская Пивоварня», ООО «Винодельня Иронсан»-ы продукци, Лохты Дзамболаты сæрмагонд сæнуадзæны продукци, индивидуалон амалиуæггæнæг Дзигойты М.П. «АSSA TUAG»-ы соустæ, ИП Акопов Н.Г. натуралон мыд, ИП Абайты А.С. цайы продукци, ООО «ИрБазальт» æввахс рæстæджы скусдзæн. Афтæ ма бавдыстам хæххон æрмæджыты хуызтæ: куыд, зæгъæм, диабаз, андезит, алевролит, халькопирит, серпентинит, туфты алыгъуызон хуызтæ æмæ æндæртæ. Уыдон иууылдæр хъæуæг сты арæзтады. Экспозицийы ма æрныхас кодтам республикæйы туристон хъомысадыл», – загъта Тадтаты Дзамболат æмæ банысан кодта, Хуссар Ирыстоны стенд цымыдисдзинад кæй æвзарын кодта равдысты хайадисджыты.
Йæ ныхæстæм гæсгæ, Кавказаг инвестицион фæзуаты уагъд æрцыд хуссарирыстойнаг деле-гацийы хъуыддагон фембæлдтытæ регионты къухдариуæггæнджытæ, эксперттæ, бизнес-æхсæнады минæвæрттимæ. Уыдонимæ уынаффæ цыд Хуссар Ирыстоны бизнесы рæзтмæ ин-вестицитæ æрбаздахын, туризм æмæ агропромы фадгуыты фарстатыл.
