Хæцынц Путины кандидатурæйы фарс 

Ирон адæм кæддæриддæр тырныдтой сæ хъысмæт Уæрæсеимæ сбæттынмæ. Сæ æмхæларадон ахастытæ дæр 1744 азы уымæн бафидар кодтой. Уæдæй абоны онг дыууæ адæмты хæлар ахастытæ фидарæй-фидардæр кæнынц, бахъуыды рæстæджыты кæрæдзийы фарсмæ балæууынц, знаджы ныхмæ дæр иумæ æрлæууынц.

Мах, Хуссар Ирыстоны цæрæг уæрæсейаг æмбæстæгтæ, нæ хæсыл нымайæм Уæрæсейы президентон æвзæрстыты рахæцæм, 2008 азы мæлæтæй кæй фæрцы аивæрзтыстæм, нæ республикæ кæй фæрцы сæндидзыдта æмæ нын абоны онг дæр чи æххуыс кæны, Уæрæсейы Федерацийы уыцы сæргълæууæджы – Владимир Владимиры фырт Путины фарс.

Уæрæсейы президентон æвзæрстыты къæсæрыл – 11 марты Цхинвалы ауагъдæуыд тымбыл фынг. Хайад дзы райстой политикон партиты лидертæ, политиктæ, дипломаттæ политологтæ æмæ эксперттæ.

Мадзаламонæг, Президенты информацион аналитикон центры хайады сæргълæууæг Уазæгты Юри радзырдта, зæгъгæ, Уæрæсейы президентон æвзæрстытæм сæ хъус дарынц, Хуссар Ирыстон æмæ, Уæрæсейы Федерациимæ цæдисон æмæ хæларадон ахастытæ кæмæн ис, æрмæст уыцы бæстæтæ нæ, фæлæ  æппæт дунейы бæстæтæ дæр.

Фæстаг рæстæджы ныгуылæйнаг бæстæты æрдыгæй Путины адресыл цы истерион ныхæстæ дзурынц, ома, Путины раз йæ сæр ничи æркъул кæндзæн, уыдон дæр ахсджиаг нысаниуæг дæттынц Уæрæсейы президенты политикæйæн, ныры æвзæрстыты та нымайынц актуалоныл.

Владимир Путины сæргълæудæй абон Уæрæсе у процессты фронтмен. Уыцы процесстæ здæхт сты ноджы рæстагондæр дунеон фæткæвæрды рæзтмæ æмæ Иугонд Штатты гегемони скуынæг кæнынмæ.

Ногæй та Уæрæсе февзæрд, дунейы сæрмагонд æлдариуæгад æрфидар кæнынмæ чи тырны, уыдоны фæндагыл. Цал хатты не сразы ис Наполеон æмæ Гитлеры ролы радон претендентты диктатыл?!

Хуссар Ирыстонæн символикон уый у, æмæ дунеон фæткæвæрд ивыны здæхты фыццаг къахдзæфтæ 2008 азы августы арæзт æрцыдысты, Уæрæсейы къухдариуæгад, ныгуылæйнаг бæстæты позици ницæмæ æрдаргæйæ, агрессоры тыхæй сабырдзинадмæ куы  æркодта.

Æмæ та абон дæр, сабыр фидæн сифтонг кæныны æмæ неонацизмы радон дыдынбындзыты ахстон скуынæг кæныны тыххæй Уæрæсе æмæ Хуссар Ирыстон уæхски-уæхск  ногæй тох кæнынц коллективон Ныгуылæны радон марионеткæты ныхмæ.

РХИ-йы Фæсарæйнаг хъуыддæгты министр Джиоты Æхсар радзырдта, уæрæсейаг-хуссарирыстойнаг ахастытæ цы здæхты рæзынц, уый тыххæй æмæ абоны уавæрты дыууæ бæстæйы дарддæры ахастыты Уæрæсейы къухдариуæгады позицийы фæдыл.

Загъта зæгъгæ, Хуссар Ирыстон æмæ Уæрæсейы Федерацийы ‘хсæн ахастытæ рæзынц динамиконæй, бахахх кодта дыууæ паддзахады стратегион партнерондзинад дæр. Уыцы партнерондзинад иу æмæ дыууæ азы дæргъы нæ рæзт. Уый у нæ фыдæлты равзаргæ историон процесс æмæ йын ахсджиаг нысниуæг ис.  Уый тыххæй хуссайраг ирæттæн Уæрæсейы æвзæрстытæ ахсджиаг сты.

Дунейы цы стыр геополитикон ивындзинæдтæ цæуы, уый тыххæй министр цæвиттонæн æрхаста 2007 азы Мюнхены конференци. Конференцийы УФ-йы президент Владимир Путин йæ доклады банысан кодта политикæйы  сæйраг контуртæ æмæ Уæрæсейы Федерацийы дарддæры рæзты фæндæгтæ. Кæй зæгъын æй хъæуы, 2008 аз уыд Путины уыцы доклады фæдыл   реакци. Абон уынæм уæдæй нырмæ куыд тынг фæивта дуне. Коллективон Ныгуылæн æмæ Америкæйы Иугонд Штаттæ Уæрæсейы  ныхмæ аразынц алыгъуызон  æнæбындур санкцитæ, æнæ бындур æлхъывдад, дывæр кæнæ æртывæр стандарттæ.

Хуссар Ирыстоны экс-президент Тыбылты Леонид радзырдта, зæгъгæ, Хуссар Ирыстоны адæмæн хъарм ахастытæ ис йæ стратегион партнер – Уæрæсемæ. Кæй зæгъын æй хъæуы, æвзæрстытæ Хуссар Ирыстонæн  ахсджиаг сты, йæ фæстиуджытыл баст у нæ республикæйы дарддæры рæзт æмæ хъысмæт.

Экс-президент банысан кодта, 2015 азы Уæрæсейы Федераци æмæ Республикæ Хуссар Ирыстоны ‘хсæн Æмцæдисад æмæ интеграцийы тыххæй къухтæ цы бадзырдыл æрфыстæуыд, уый ахсджиагдзинад.

Уыцы бадзырдмæ гæсгæ, арæзт æрцыд Хуссар Ирыстон æмæ Уæрæсейы хъахъ­хъæнынады æмæ æдасдзинады иууон контур.

«Уымæй дарддæр ма Республикæ Хуссар Ирыстон  æмæ Уæрæсейы Федераци æмцæдисонтæ сты политикон, экономикон æмæ ноджы æндæр здæхтыты», – бахахх кодта Тыбылты Леонид.

Æвзæрстыты тыххæй та загъта, ныфс æй кæй ис, бæрзонд æмвæзадыл кæй    ацæудзысты, æмæ нæ адæм Уæрæсейы ныры сæргълæууæгæн кæй  ратдзысты сæ хъæлæстæ.

Хуссар Ирыстоны Компартийы лидер Коцты Станислав:

«Уæрæсейы Федерацийы президент Владимир Путин йæхæдæг иунæгæй фактон æгъдауæй, æппæт дунейыл æндавы. Мах нæ партионтæн бахæс кодтам, цæмæй схъæлæс кæной, сæ намыс сæ куыд амоны, афтæ. Хуыцау зæгъæд, æмæ Уæрæсейы радон президент цы суа Владимир Путин.

Ирон адæм сæ хъысмæт раджы сбастой Уæрæсеимæ. Нæ этнос мах   Уæрæсейы руаджы бахъахъхъæдтам. Уæрæсейы Федерацийы æппæт адæмтæ цæмæй дарддæр дæр рæзой æмæ дидин æфтауой, уый тыххæй уыдонæн дæр хорз уавæртæ сарæзта. Цæмæй нæ этнос дарддæр дæр бахъахъхъæнæм, уый тыххæй нæ иунæг ирвæзынгæнæг у Уæрæсе. Нæ иунæг фæндаг у Уæрæсейы Федерациимæ баиу уæвын. Нæ фидæнæн æндæр уæвæн нæй», – загъта политик.

Политикон парти «Фыдыбæстæ»-йы лидер Гобозты Вячеслав банысан кодта, зæгъгæ, Хуссар Ирыстоны хъæуы, цæмæй рамбула Уæрæсейы Федерацийы абоны президент Владимир Путин. Уымæн æмæ нæ рухс фидæн баст у абоны уæрæсейаг бæстæйы къухдариуæгадимæ.

Радзырдта ныры дуджы геополитикон процессты  контексты Уæрæсейы Федераци æмæ Хуссар Ирыстоны ‘хсæн ахастыты рæзты перспективæты тыххæй.

2008 азæй Уæрæсе здæхын райдыдта, дунеон æмæхсæнады размæцыд чи бæрæг кæны, уыцы разагътайы стыр паддзахадты  нымæц-мæ. Уæрæсейы Федерацийы ныры президентон æвзæрстытæн та сæрмагонд нысаниуæг ис.

Президенты администрацийы сæргълæууæджы хæдивæг Тыбылты Аланы ныхæстæм гæсгæ Хуссар Ирыстоны адæм кæддæриддæр хъуыддагæй æвдисынц сæ иузæрдиондзинад, æнувыддзинад Уæрæсейы æфсымæрон  адæммæ. Бахахх кодта, Ирыстон гадзрахатæй кæй никуы рацыд Уæрæсейыл.

«Уæззау дугты Ирыстон æмæ Уæрæсе кæддæриддæр иумæ кæй уыдысты, уый тыххæй Президент Гаглойты Алан стыр нысаниуæг дæтты Уæрæсейы Федерациимæ ахастытæн.

Æрæджы социологон æрфарсты фæстиуджытæ куыд фенын кодтой, афтæмæй  Хуссар Ирыстон у Уæрæсейы иууыл хæлардæр бæстæ. Кæд нырма официалонæй нысан не ‘рцыд, уæддæр развæлгъау бæрæггæнæнтæ бахынцгæйæ, цæрджыты нымæцмæ гæсгæ, Хуссар Ирыстон фыццаг бынат ахсы Сæрмагонд æфсæддон операцийы йе ‘мбæстæгты хайадистæй», – банысан кодта Тыбылты Алан.

Уый загъта, зæгъгæ, ахсджиаг политикон цау – Уæрæсейы президентон æвзæрстыты къæсæрыл  æнгом æмгуыст цæуы Республикæ Хуссар Ирыстоны Уæрæсейы Федерацийы минæварадимæ.

Политикон парти «Ныхас»-ы сæрдар Бесаты Зитæ радзырдта, зæгъгæ,  хъæуæгыл æмæ йæ хæсыл нымайы Владимир Владимиры фырт Путины кандидатурæйы фарс рахæцын. Уымæн æмæ Хуссар Ирыстон æмæ Уæрæсейы Федераци стратегион партнертæ сты.

«Мах æмбаст стæм Уæрæсеимæ. Уæрæсейы цы политикон цаутæ æрцæуы, уыдон махыл дæр æндавынц. Ныртæккæ Уæрæсейы Федерациимæ Хуссар Ирыстоны ахастытæ хизынц ногдæр, бæрзонддæр æмвæзадмæ. Уый тыххæй махæн ахсджиаг у, цæмæй Уæрæсейы уа стабилондзинад, цæмæй Уæрæсейы Федерацийы лидер уа дунеон нысаниуæджы фарстатæ скъуыддзаг кæныны хъуыддаджы активон хайадисæг. Партитæм нæ кæсгæйæ, нæ адæм иууылдæр Путины фарс кæй рахæцдзысты, ууыл дызæрдыг кæнæн нæй», – банысан кодта Бесаты Зитæ.

Информаци æмæ мыхуыры комитеты сæрдар Хъотайты Мария:

«Хуссар Ирыстоны абоны цард куы абарæм 25 азы размæйы цардимæ, уæд æй бамбардзыстæм, кæрæдзийæ куыд тынг хицæн кæнынц. Хъахъхъæнынады фарстатæй райдайгæйæ суанг нæ студенттæ Уæрæсейы престижон уæлдæр ахуыргæнæндæтты цы бæрзонд æмвæзады ахуырад исынц, æппæт уыдæттыл нæ цæст куы ахæссæм, уæд æй бамбардзыстæм Уæрæсейы руаджы цы ахуыргонд фæлтæр исæм, уый. Ахуырдзинад та у размæдзыд паддзахады нысан. Кæй зæгъын æй хъæуы, нæ цардархайды æппæт фадгуыты дæр нын Уæрæсе æппæтварсонæй æххуыс кæны. Банысан кæнын ма мæ фæнды Мæскуыйы Президент Гаглойты Алан æмæ Владимир Путинимæ куы фембæлд, уæд Уæрæсейы Федерацийы президент Хуссар Ирыстонмæ цы хъарм ахаст равдыста, уый дæр. Уæдæ  æвзæрстыты æртæ боны Хуссар Ирыстон хъуамæ равдиса йæ принципиалон позици æмæ хъæлæс радта Путины пайдайæн» – радзырдта Мария.

Политикон  парти  «Иууон  Ирыстон»-ы сæрдар Бибылты Ацæмæз радзырдта, зæгъгæ,  Уæрæсейы президентон æвзæрстытæ куыд ацæуой, уымæн стыр нысаниуæг ис Хуссар Ирыстоны. «Нæ бæстæтæ кæрæдзиимæ æнгом баст сты. Мах Уæрæсеимæ иумæйаг фидæн аразæм. Нæ партийы уæнгтæ æмхъæлæсæй хæцæм Владимир Владимиры фырт Путины æвварс. Уæрæсейы Федерацийы политикон фæндаг Путин хъуамæ адарддæр кæна».

Политикон парти «Дзыллæты иудзинад»-ы лидер Пухаты Сергей дæр банысан кодта йæ партийы æппæт уæнгтæ дæр кæй рахæцдзысты Владимир Путины кандидатурæйы фарс. Зæгъгæ, нæ адæмæн æндæр вариант нæй æмæ ма дæр хъуамæ уа.

Партиты лидертæ иууылдæр æрсид-тысты адæммæ, цæмæй рахæцой Владимир Путины æвварс æмæ хъæлæс радтой йæ пайдайæн.

Осиаты Индира