Сабаты, 2-æм сентябры, Хуссар Ирыстоны адæм фæстаг хæрзбон загътой бархион Хацырты Артурæн. Уыцы бон, хæстоны райгуырæн хъæу – Дменисмæ æрбамырд бирæ адæм. Уырдæм æрбацыдысты æмæ зианджын бинонтæн мæсæллæйы ныхæстæ загътой паддзахады сæргълæууæг Гаглойты Алан, Парламенты сæрдар Æлборты Алан, Хъахъхъæнынады министр Марат Павлов, министрадты æмæ ведомствоты æндæр сæргълæуджытæ.
Фыдохы митинджы раныхасгæнджытæ иууылдæр банысан кодтой, зæгъгæ, Ирыстон хъæздыг у хъæбатыр фырттæй. Уыдон Хуссар Ирыстоны хæдбардзинады сæрыл тохы райдианæй, æмæ абоны онг дæр, æвдисынц хъайтардзинад. Ныр та сгуыхтдзинæдтæ æвдисынц Донбассы республикæты сабыр цæрджыты сæрибардзинадыл тох кæнгæйæ.
«Абон мах, Артуры хуызæн хъæбатыр фыртты фæрцы цæрæм сабыр арвы бын. Уый ацыд Донбассмæ нацистты ныхмæ тох кæнынмæ. Уымæн æмæ уый хорз зоны хæст цы у, уый. Йæ радтæг адæм иу æмæ дыууæ хатты сæхиуыл нæ бавзæрстой Гуырдзыстоны агресси», – дзырдта раныхасгæнджытæй иу.
Хацырты Артур сидзæрæй ныууагъта йæ фондз хъæбулы. Цыдис ыл æрмæстдæр 33 азы.
РХИ-йы Президент Гаглойты Аланы Барамындæй хорзæхджын æрцыд «Фыдыбæстæ хъахъхъæнæджы» майданæй йæ амæлæты фæстæ.
Рухсаг у!
Нæ уацх.
