21-æм марты Цхинвалы 5-æм астæуккаг скъола поэзийы боны цытæн бацæттæ кодтой æмæ ауагътой Ирыстоны адæмон фыссæг, курдиатджын поэт æмæ драматург, публицист æмæ тæлмацгæнæг, прозаик æмæ критик, стыр ахуыргонд, ирон адæмы уарзон хъæбул, дзæнæттаг Джусойты Нафийы мысæн изæр. Мадзалы дзы хайад райстой нæ республикæйы Президент Бибылты Анатоли, РХИ-йы Ахуырад æмæ зонады министр Гасситы Натали, йæ хæдивæг Гаглойты Элисо, профессор Плиты Гацыр, филологон зонæдты кандидат Дзиццойты Юри, чиныг «Осетия и осетины»-йы аразæг, æхсæнадон архайæг Чилæхсаты Хъазбег æмæ æндæртæ.
Мысæн изæр бацæуæн ныхасæй байгом кодта мадзаламонæг, 5-æм скъолайы уырыссаг æвзаг æмæ литературæйы ахуыргæнæг Уалыты Розæ. Уый цыбыртæй æрдзырдта Джусойты Нафийы цард æмæ сфæлдыстадыл æмæ банысан кодта Нафийы стыр курдиат æмæ йæ куысты ахадындзинад. Уый фæстæ Уалыты Розæ æрæмбырдуæвджытæм бахатыд, цæмæй иу уысм æмырæй алæугæйæ ссарой Джусойты уыцы хистæр æмæ Плиты Гацырæн. Уый банысан кодта, Нафи стыр ахуыргонд, æппæтмæ дæр æвзыгъд æмæ курдиатджын адæймаг кæй уыдис, уый. «Нафи ахæм адæймаг уыдис æмæ йемæ лæг ныхас кæнынæй дæр æмæ фæндагыл цæуынæй дæр нæ бафсæстаид. Нæ ирон æгъдæутты иууыл сæйрагдæр сты фынджы æгъдæуттæ. Ирон фынг ахæм диссаг у, æмæ йæ Абайты Васо йæ рæстæджы схуыдта академи. Ис ахæм æмбисонд, зæгъгæ, лæджы базондзынæ фæндагыл æмæ фынгыл. Æмæ уый Нафийы тыххæй зæгъын, алкæцы ран дæр йæ кад уыдис бæрзонд, æгъдауылхæцæг. Куыд поэт æмæ драматург, афтæ йын цы стыр æнтыстытæ уыд, уый махæн зындгонд у. Нафи иунæгæй ирон литературæйы историйæн хæрзты бацыди, уый ничи. Стыр бузныг æппæт уыдонæн, чидæриддæр хайад исы Нафийы сфæлдыстадон бынтæ рухсмæ рауадзыны хъуыддаджы. Нафи алыварсонæй дæр уыд диссаджы лæг æмæ йæ амæлæтыл адæмы зæрдæтæ дæр уымæн фæрыстысты. Цыма сидзæрæй аззадыстæм, афтæ ныл бандæвта Нафийы амæлæт. Уый махæн алы хъуыддаджы дæр уыд нæ фæдисон, дзуапп радтынмæ, æгъдау радтынмæ, кæм цы хъæуы, уый зæгъынмæ, уый хуызæн арæхстджын æз никæй зонын. Кæстæртимæ кæстæр уыдис, хистæртимæ та табугæнæг æмæ уый тыххæй мах макуы хъуамæ рох кæнæм Нафийæн йе стыр ном», – загъта Плиты Гацыр. Уый ма сывæллæттæн фæдзæхста, цæмæй йын хуыздæр ахуыр кæной йе сфæлдыстад æмæ дзы кæддæриддæр исой цæвиттон.
Мадзалы ма Нафийы тыххæй сæ мысинæгтæ радзырдтой Дзиццойты Юри æмæ Чилæхсаты Хъазбег. Уыдон дæр банысан кодтой ахуыргонды куырыхондзинад æмæ курдиат. Нафийы руаджы ирон адæмы бирæ бæстæтæ кæй базыдтой æмæ йын йе стыр фæллæйттæн кадгæнæг кæй уыдысты, уыцы хъуыды дæр загъдгонд æрцыд сывæллæттæн. Чилæхсаты Хъазбег йæ раныхасы банысан кодта, Нафи йæ рынчыны рæстæджы дæр йæ хо Клавдиямæ уæвгæйæ, йæ куыст кæй нæ ныууагъта æмæ йæ амæлæты бонмæ куысты уæлхъус кæй уыд, уый. «Йæ цæрæнбон бирæ Хуыгаты Ростикæн, уый финансон æххуысс кæны Нафийы номыл цы æрвылазон конкурс расидтыстæм, уымæн. Уагъд æрцыдис ирон фысджыты æхсæн. Фарон ма Джусойты Нафи æмæ Плиты Грисы номыл рауагътам риуылдарæнтæ æмæ уын дзы лæвар кæнын», – загъта Чилæхсаты Хъазбег. Уый ма бакаст Нафийы номыл йæхи фыст æмдзæвгæ дæр.
Нафи æмæ йе сфæлдыстадæн стыр аргъ кæны нæ республикæйы Президент Бибылты Анатоли. Уый арæх æмбæлдис ахуыргондимæ æмæ-иу ныхас кодтой æндæр æмæ æндæр фарстаты фæдыл. Нафиимæ йæ фæстаг фембæлды тыххæй, стæй йын цы аргъ кæны, æппæт уыдон тыххæй йæ раныхасы банысан кодта бæстæйы сæргълæууæг.
«Нафи йæхицæн стыр ном скодта. Уый Ирыстонæн, ирон литературæйæн цы хæрзты бацыд, уый æвæццæгæн, алкæмæн дæр зындгонд у. Нафи уарзт кодта Ирыстоны, ирон адæмы. Æмбæлдысты-иу, рынчын куы уыдис, уæд-иу æй аабæрæг кодтам, æмæ-иу æй афарстам, зæгъгæ, куыд хъуыды кæныс Ирыстоны сомбоны фæдыл. Нафи-иу дзырдта, зæгъгæ, Ирыстонæн хицæнтæй цæуæн нæй. Дыууæ Ирыстоны зæгъгæ, хъæуы баиу кæнын. Уыдон уыдысты йæ ны-хæстæ ацы хъуыддаджы фæдыл. Æвæццæгæн йæ зæрдæ куы нæ рыстаид, уæд ыл нæ хъуыды кодтаид æмæ йæ зæгъгæ дæр нæ кодтаид. Нафийæн йæ алы ныхас дæр баст уыдис ирон æвзаг æмæ ирон адæмимæ. Уый уыдис йæ раттæг адæмы стыр патриот æмæ мах кæддæриддæр хъуамæ уымæн кад кæнæм. Сывæллæттæн та мæ зæрдæ зæгъы сæ ахуыры фæндагыл стыр æмæ бæрзонддæр æмвæзадмæ цы. Мæхæн та уыцы стыр хъару балæвар кæнæд сфæлдисæг Хуыцау æмæ Нафийы ном куыд никуы рох кæнæм, йæ ном ын бæрзонд цы исæм», – загъта Президент Бибылты Анатоли.
Мадзалы раныхасæй раныхасы æхсæн скъолайы ахуыргæнинæгтæ аив кастысты Нафийы фыст æмæ тæлмацæмдзæвгæтæ. Сывæллæттæ сæ арæхстдзинад æвдыстой ирон национ кафт æмæ зарджытæй. Ацы ран ма музыкалон номыртæ сæххæст кодта адæмон инструментты паддзахадон оркестр «Айзæлд», Уалыты Нинæйы къухдариуæгадæй.
Мысæн изæры РХИ-йы Ахуырад æмæ зонады министр Гасситы Натали банысан кодта мадзалы ахсджиаг нысан, йæ ауадзыны хъуыддаг æмбæлон кæй у æмæ уый дæр йæ мысинæгтæ Нафийы тыххæй радзырдта скъоладзау фæсивæдæн, цы ран ардта æцæг ирон æмæ стыр ахуыргонды рухс ном.
Цхуырбаты Ларисæ
Comments are closed, but trackbacks and pingbacks are open.