Знауыры районы Хъорнисы хид иу кæны Сихиат, Цъорбис æмæ Хъорнисы хъæутæ республикон трассæ Цхинвал – Знауыримæ.
Хиды реконструкци хаст уыд 2025 азы Инвестицион программæйы нывæзтмæ, фæлæ ивгъуыд аз ацы комы донивылдтытæ хид бахъыгдардтой. Специалисттæ йæ банымадтой аварионыл. Йæ сæрты цæуын уыд тæссаг æмæ йæ сæхгæдтой. Хидæн йæ иу фарс фæндаг алыг кодтой æмæ уал рæстæгмæ бæлццæттæ цæуынц уыцы фæндагыл. Арæзтад æмæ архитектурæйы министрад ивгъуыд аз Инвестицион программæйæ æндæр объектты фæрæзтæй рахицæн кодта бæрæг суммæ, æмæ бавнæлдтой аварион хид пырх кæнынмæ. Арæзтады министр Елдзарты Константин, уæд, пресс-конференцийы рæcтæджы журналисттæн радзырдта, финансон фæрæзтæ, дам, ацы куыстытæн здæхт æрцыдысты Цхинвалы зæронд хидыл 2023 азы кæронмæ кæй нæ бахардз кодтам, удонæй.
Уыцы фæрæзтæй уал бантыст хид ныппырх кæнын. Ныр та, апрелы мæйы бавнæлдтой зæронд хиды бынаты ног капиталон хид саразынмæ. Объект эксплуатацимæ лæвæрд æрцæудзæнис 2025 азы фыццаг кварталы. Фæлæ йыл техникон æгъдауæй цæуыны бар уыдзæн ацы аз дæр. Йæ арæзтадæн Инвестпрограммы хицæн æрцыд 30 милуан сомы бæрц.
Ныртæккæ хиды арæзтадыл кусы генподрядон организаци «ЮгСетСтройИнвест». Организацийы директоры хæдивæг Коцты Сослан куыд зæгъы, афтæмæй сын абоны онг бантыст хидæн цæгтæ сæвæрын æмæ сæ æфсæнбетонон конструкцитæй сфидар кæнын. Уый фæстæ хид бацæттæ кæндзысты асфальт кæнынмæ. Кæронбæттæн куыстытæ арæзт цæудзысты цадæггай æмæ бæстонæй.
Понайы цæугæдоныл арæзт хид сырæзт 1970 азы. Бæргæ фидар арæзт уыдис, фæлæ уæды рæстæджы уагæвæрдмæ гæсгæ, йæ уæрх уыд æртæ метрмæ ‘ввахс. Дыууæ машинæйы дзы фæрсæй-фæрстæм æдæрсгæ нæ цыдис. Шофырты-иу бахъуыд кæрæдзийæн фæндаг дæттын. Ныр уыцы хъуагдзинæдтæ фæстийæ баззайдзысты. Ног хиды фæтæн уыдзæн аст метры, йæ дæргъ та у 18 метры. Фистæгæй цæуджытæн уыдзæн сæрмагонд хай. Цæугæдоны былгæрæттæ дæр капиталон æгъдауæй фидар æрцæудзысты.
Хъорнисы зонæйы цæрæн пункты цæрджытæ Понайы цæугæдоны сæрты хиды арæзтадмæ æнхъæлмæ кæсынц æнæрхъæцæй. Фæсвæд цы рæстæгмæ хид арæзт æрцыд, уый зынвадат у. Фæлæ ныртæккæ ног хидыл бæстонæй кæй кусынц, уымæй стыр бузныг сты хицауадæй.
УАЗÆГТЫ Марфа
