РХИ-йы Ахуырад æмæ зонады министрады цур ахуыргæнджыты квалификаци бæрзонддæргæнæн институты сæргълæууæг Къæбулты Заирæ нын радзырдта, зæгъгæ, конференцийы куысты хайад райстой хуссарирыстойнаг ахуырады къабазы минæвæрттæ – Гæззаты Лианæ, Санахъоты Иринæ, Гæззаты Юринæ, Рассохина Надежда, Мамиты Лали æмæ Хетæгкаты Яков. Цхинвалы 12-æм астæуккаг скъолайы уæлæмхас ахуырады ахуыргæнæг Санахъоты Иринæйы доклад уыд «Сывæллæтты этнокультурон рæзты æмæ хъомылады паддзахадон символтæй спайда кæнын». Хуссар Ирыстоны ахуыргæнджыты квалификаци бæрзонддæргæнæн институты ахуырадон-методикон куысты фæдыл ахуырады хайы сæргълæууæг Гæззаты Лианæ та доклад бакаст ахæм темæйыл – «Нырыккон скъолайы уавæрты монон-хæрзæгъдаудзинады хъомылад», зæгъгæ. Ацы институты методист Мамиты Лалийы доклад уыд «Скъолайы агъоммæйы кары сывæллæтты этнокультурон рæзты æмæ хъомылады тематикон бæрæгбонтæ». Нæ горæты 6-æм астæуккаг скъолайы англисаг æвзаджы ахуыргæнæг Гæззаты Юринæйы доклад та уыд «Англисаг æвзаджы уроктыл этнокультурон компонент». Горæт Цхинвалы 1-æм астæуккаг скъолайы уæлæмхас ахуырады ахуыргæнæг Хетæгкаты Яков та доклад бакаст ахæм темæйыл – «Ирæтты традицион культурæ», зæгъгæ. Хуссарирыстойнаг ахуыргæнджыты докладтæ уыдысты мидисджын æмæ цымыдисдзинад сæвзæрын кодтой конференцийы хайадисджытæм.
Конференцийы кæрон уагъд æрцыд тымбыл фынг, цыран хатдзæгтæ арæзт æрцыд хайадисджыты докладтæн. Уæлдай тынгдæр рахицæн кодтой 6-æм астæуккаг скъолайы ахуыргæнæг Гæззаты Юринæ æмæ 1-æм астæуккаг скъолайы минæвар Хетæгкаты Яковы докладтæ. Дыккаг бон та Цæцæны Республикæйы уагъд æрцыд æппæтуæрæсейон педагогон конкурс – «Мы разные, но равные», зæгъгæ. Уырдæм цæгатирыстойнаг делегациимæ ацыдысты хуссарирыстойнаг ахуыргæнджытæ Гæззаты Юринæ æмæ Хетæгкаты Яков, куыд хуыздæр доклад бакæсджытæ, афтæ. Семæ ма Цæцæнмæ ацыд Рассохина Надежда дæр. Конкурсы хайадисджытæн уагъд æрцыдысты мастер-къластæ.
ДЖИОТЫ Екатеринæ
Comments are closed, but trackbacks and pingbacks are open.