Цæгат Ирыстоны кæд карантины аххосæй зындзинæдтæ æвзарынц, уæддæр Уæлахизы 75 азы бæрæгбонмæ цæттæ кæныны мадзæлттæ æнæкъуылымпыйæ цæуынц. Дзæуджыхъæуы Афицерты хæдзары байгом сæрмагонд пункт æмæ дзы волонтертæ æмбырд кæнынц, Фыдыбæстæйы Стыр хæсты Хъæбатыртæ æмæ ветеранты тыххæй æрмæг. Уырдæм хауынц хæстонты къамтæ, фыстæджытæ, мысинæгтæ, газетты уацхъуыдтæ… Уыдон лæвæрд цæуынц Æппæтуæрæсейон патриотон проект «Дорога памяти»-мæ. Уым æнæхъæн Советон Цæдисы Хъæбатыртимæ иумæ мемориалыл се ‘нусон бынат ссардзысты ирон хæстонтæ дæр. Уый сын уыдзæн æнустæм æнæфæцудгæ цыртдзæвæн.
Бæрæг куыд у, афтæмæй Уæрæсейы Гæрзифтонг тыхты хъæппæрисæй арæзт æрцыд амынд проект. Гæрзифтонг тыхты, культурæ æмæ фæлладуадзæн парк «Патриот»-ы арæзт æрцæудзæн хæстонты номыл кувæндон. Йæ фарсмæ та сæвæрдзысты мемориалон комплекс «Номарæн фæндаг». Уырдæм хаст æрцæудзысты Уæрæсейы æппæт регионты хæстонты тыххæй бæрæггæнæнтæ.
Цæгат Ирыстонæй хæсты архайдта 90 мин адæймагмæ хæстæг. Бирæ сты хæсты хъæбатыртæ дæр. Уымæ гæсгæ, нæ республикæ дæр бахауд Æппæтуæрæсейон акцимæ. Ныридæгæн активисттæ æрæмбырд кодтой 40 минæй фылдæр хæстоны тыххæй бæрæггæнæнтæ. Дарддæр уый тыххæй куыст цæуы.
Ирон хæстонтæ се ‘ппæт дæр цæмæй иумæйаг номхыгъдмæ бахауой, уый тыххæй сæ хæстæджыты бæрæггæнæнтæ бахæссын хъæуы Афицерты хæдзармæ кæнæ Æфсæддон госпиталмæ, стæй Гæрзифтонг тыхты сайтмæ. Хæстонтæй уæлдай номхыгъдмæ бахæссæн ис фæсчъылдымы фæллойгæнджытæ æмæ «хæсты сабиты» тыххæй цымыдисаг æрмæджытæ дæр.
Нæ уацх.
Comments are closed, but trackbacks and pingbacks are open.