Путин йæ къух æрфыста УФ-йы скондмæ ног территоритæ   бацæуыны тыххæй закъоныл

УФ-йы барадон информацийы официалон интернет-портал куыд хъусын кæны, афтæмæй 4-æм октябры Уæрæсейы Федерацийы президент Владимир Путин йæ къух æрфыста Уæрæсейы скондмæ Донецк æмæ Луганскы адæмон республикæтæ, Запорожье æмæ Херсоны областты бацæуыны тыххæй закъæттыл.

Владимир Путин ма йæ къух æрфыста, Донецк æмæ Луганскы адæмон республикæты сæргълæуджыты, афтæ ма Запорожьейы æмæ Херсоны областты губернаторты хæстæ рæстæгмæ чи æххæст кæндзæн, уыдоны тыххæй барамындтыл дæр.

Донецкы Адæмон Республикæйы сæргълæууæджы бынаты рæстæгмæ нысан æрцыд Денис Пушилин, Луганскы Адæмон Республикæйы хæстæ та – Леонид Пасечник, Запорожьейы областы губернаторы хæстæ рæстæгмæ æххæст кæндзæн Евгений Балицкий, Херсоны областы губернаторæй та – Владимир Сальдо. Цалынмæ ацы субъектты сæргълæуджытæ официалон æгъдауæй æвзæрст æрцæуой, уæдмæ банысангонд адæймæгтæ рæстæгмæ æххæст кæндзысты сæ бæрны уæвæг хæстæ.

Ацы закъоны уагæвæрдтæм гæсгæ, банысангонд регионтæн Уæрæсейы Федерацийы скондмæ райсыны бонæй 2026 азы 1 январмæ уыдзæн фæлдзæуæн рæстæг.

Закъæттæ æххæстбæрцæй кæрæдзиимæ бæттынц, уыцы территоритыл цæрæг гоймæгтæм ахасты ахсджиаг социалон æмæ экономикон гарантитæ æмæ аразынц æмбæстæгты бартæ æмæ сæрибардзинæдтæ хъахъхъæныны системæ.

Уæрæсейы Федерацийы æмбæстæгтæ, кæцытæ цæрынц Донецкы æмæ Луганскы адæмон республикæты, Запорожье æмæ Херсоны областты территоритыл ифтонг уыдзысты куыстæй, нымад æрцæудзысты ахуырады тыххæй сæ бæлвырдгæнæнтæ, куысты стаж, пенси исыны, социалон æмæ медицинон æххуысы æмæ æндæр лæггæдты тыххæй  документтæ, кæцытæ лæвæрд æрцыдысты Донецкы æмæ Луганскы  адæмон республикæты, афтæ ма Украинæйы дæр. Гарантитæ сын лæвæрд цæуы исадон ахастыты фадыджы дæр.

Закъонмæ гæсгæ ног субъектты ныртæккæ арæзт цы гарзджын тыхтæ, æфсæддон баиугæндтæ æмæ сæрмагонд органтæ æрцыдысты, уыдон баконд æрцæудзысты Уæрæсейы Федерацийы Гарзджын тыхты скондмæ.

2023 азы 1-æм июнмæ ног республикæтæ æмæ областты арæзт æрцæудзысты федералон æххæстгæнæн хицауиуæгады территориалон органтæ.

Фæлдзæуæн рæстæджы арæзт æрцæудзысты УФ-йы прокуратурæйы органтæ æмæ ифтонг æрцæудзæн тæрхондонон системæйы архайд. Æхсæз мæйы дæргъы регионты арæзт хъуамæ æрцæуой горæтты æмæ муниципалон зылдтæ, бæрæг æрцæуой муниципалон зылдты арæнтæ.  УФ-йы ног субъектты нæмттæ баззайдзысты, куыд уыдысты, афтæмæй.