Уæрæсейы Федерацийы хицауады официалон мыхуырон орган «Российская газета» Цхинвалы сорганизаци кæндзæн фоторавдыст 2008 азы августы хæсты райдианыл 10 азы кæй æххæст кæны, уый тыххæй.
Газеты журналисттæ цалдæр боны æмгъуыдмæ æрцыдысты Хуссар Ирыстонмæ, цæмæй равдыст ауадзынæн сисой æнæмæнгхъæуæг фотоæрмæджытæ.
«Мах æрцыдыстæм, цæмæй ам бацæттæ кæнæм фоторавдыст 2008 азы августы цаутыл – Хуссар Ирыстонмæ Гуырдзыстоны ныббырстыл æмæ Гуырдзыстоны сабырадмæ æркæныны фæдыл Уæрæсейы æфсады æнтысгæ операцийыл 10 азы сæххæсты сæраппонд», – загъта газеты уацхæссæг Юрий Гень.
Уый зæрдыл æрлæууын кодта, зæгъгæ, 10 азы размæ, августы хæсты хæдфæстæ «Российская газета»-йы уацхæсджытæ ауагътой Цхинвалы ахæм фоторавдыст.
«Къамты æвдыст æрцыдысты, ам цытæ цыдис, уыдæттæ – адæмы хъысмæт, горæты уавæр, уæрæсейаг салдаттæ æмæ хуссарирыстойнаг хæстонты хъайтардзинæдтæ, сабыр цæрджыты трагеди», – банысан кодта уый.
Журналисты ныхæстæм гæсгæ, «Российская газета» æххуыс кодта Хуссар Ирыстонæн информацион хæсты, августы цаутæ æвдисыны, информаци лæвæрдта æндæр бæстæтæм, цаутæ æцæгæй куыд цыдысты, уый тыххæй.
Бирæ ныгуылæйнаг дзыллон информацийы фæрæзтæ сæ æвдыстой æндæргъуызонæй. Ныр уæдæй фæстæмæ рацыд 10 азы æмæ журналист куыд зæгъы, афтæмæй сæ фæнды ацы равдыст сфæлхатт кæнын, рæстæджы цыд хынцгæйæ, равдисой, куыд фæивта Республикæ уыцы æмгъуыдмæ, уыдæттæ.
«Мах цымыдис кæнæм, цы баисты, уыцы трагикон цаутæ чи бавзæрстой, уыцы адæймæгтæ, – зæгъы Гень. – Цæвиттон, ис ахæм сывæллæттæ, кæцытæ райгуырдысты хæсты хæдразмæ, кæнæ та хæстон архайдтыты рæстæджы. Уыдоныл ныр цæуы 10 азы æмæ нæ фæнды равдисын, куыд рауад сæ хъысмæт, пырх хæдзæртты ногæй куыд æндидзын кодтой æмæ афтæ дарддæр».
Йæ ныхæстæм гæсгæ, фоторавдысты план кæнынц æвдæм августæй æстæм августмæ æхсæвы байгом кæнын. Æххуыс сын кæны РХИ-йы Культурæйы министрад.
Уый ма куыд загъта, афтæмæй къамты автортæ сты «Российская газета»-йы фотоуацхæсджытæ, уыдон нымæцы зындгонд фотонывгæнæг Владимир Аносов.
Comments are closed, but trackbacks and pingbacks are open.