Цалдæр боны размæ Хуссар Ирыстоны Анахарсисы номыл библиотекæйы, культурæйы министрады æххуысæй, «Российская газета»-йы редакци байгом кодта къамты равдыст. Равдыст арæзт æрцыдис Хуссар Ирыстоны хæдбардзинад банымайыныл 10 азы кæй сæххæст, уый сæраппонд. Æвдыст дзы æрцыдысты «Российская газета»-йы къамисæг уацхæсджытæ 1990 азæй абонмæ Хуссар Ирыстоны кæй систой æмæ газеты мыхуыр чи æрцыд, уыдон, æдæппæт 75 къамæй фылдæр. Уыдон се ‘ппæт дæр дзурæг сты Гуырдзыстоны фыдгæнджытæ Хуссар Ирыстоны цæрæг адæмæн цы стыр хъизæмæрттæ бавзарын кодтой, цы уæззау уавæрмæ сæ æркодтой, æппæт уыдæтты тыххæй.
Равдысты къамтæ ма дзурæг сты, ирон адæмы ныфс æмæ хъару кæй нæ асаст, ууыл дæр. Уыдон дыккаг бон рахызтысты æмæ сыгъдæг кодтой хæдзæртты пырхæнтæ, æрæвнæлдтой æндидзынгæнæн куыстытæм.
Къамтæ дзурынц, уавæр хæсты фæстæ куыд ивы, нæ цардуагон уавæтæ хуыздæр кæй кæнынц, уыдæттыл дæр.
Равдыстмæ бацæуджыты цæстæнгас сæхимæ тынгдæр здахынц ахæм къамтæ, куыд «Прямое попадание», «Город в огне», «Россия с нами», «Цхинвал встал из пепла», «В этот город нельзя не влюбится», «Наследник героев» æмæ æндæртæ.
«Российская газета»-йы ахæм архайды тыххæй Хуссар Ирыстоны Культурæйы министр Зассеты Жаннæ афтæ зæгъы, зæгъгæ, ацы газеты редакци 1990 азæй фæстæмæ стыр лæггад æмæ æххуыс бакодта æмæ абон дæр кæны Хуссар Ирыстоны цæрæг адæмæн.
«Гуырдзыстоны хæстон архайдтытæн кæрон куы нал уыд, радио, телеуынынад куы нал куыстой, бынæттон газеттæ къуылымпытимæ куы цыдысты, уæддæр-иу нæм «Рассийская газета»-йы редакци сæ газеттæ æрвыстой лæвар. Уыцы куыст абон дæр æххæст цæуы æмæ сын æппæт «Российская газета»-йы кæсджыты номæй зæгъын стыр бузныг», – загъта министр.
Гæззаты Иван
Comments are closed, but trackbacks and pingbacks are open.