Хуссарирыстойнаг богалтæ Зассеты Алан æмæ Хъесаты Петр æнтыстджынæй сæхи равдыстой гауызы дæсныты ‘хсæн уæгъдибар хъæбысхæстæй Уæрæсейы гом чемпионаты. Зассеты Алан сыгъзæрин майдан рамбылдта 35-40 азы онг кæуыл цæуы, уыцы спортсменты ‘хсæн. Хъесаты Петр та æвзист призер ссис 60-65-аздзыд хъæбысæйхæцджыты ‘хсæн.
Ерыстæ уагъд цыдысты Смоленскы. Хайад сæ райстой 250 спортсменæй фылдæр. Уыдон уыдысты Уæрæсе, Беларуси, Казахстан, Таджикистан, Узбекистан, Туркменистан, Молдова, Сомихстон, Монголи æмæ Италийæ.
Алан 88 кг уæзы категорийы финалмæ цæугæйæ, фæуæлахиз Смоленскы область, Буряти, Дагъыстан æмæ Санкт-Петербурджы минæвæрттыл. Сæйраг тохы йæ ныхмæлæууæг уыд Тывайы спортсмен Айдыс-оол Куулар. Фембæлды дыккаг периоды Алан йæ ныхмæлæууæджы йе уæхсджытыл авæрдта æмæ афтæмæй ссис Уæрæсейы чемпион.
Зассеты Аланы тренертæ сты Коцты Тамерлан, Гæджиты Марат æмæ Зассеты Таймураз.
«Фыццаг хатт ацы чемпионаты хайад райсын сфæнд кодтон 2020 азы. Фæлæ уæд коронавирусы пандемийы аххосæй ерыстæ уагъд не ‘рцыдысты. Иннæ аз дзы бæргæ рахæцыдтæн, фæлæ уæд фембылды дæн. Фарон та мын бантыст æрмæстдæр æртыккаг бынат бацахсын. Кæй зæгъын æй хъæуы, ныр мæхи ноджы тынгдæр цæттæ кодтон, æххæст кодтон спортивон режим. Мæхи уæз 96 кг уыд, уымæ гæсгæ мæ бахъуыд 8 кг аппарын. Стæй ма тренировкæтæ кодтон уæззау атлетикæйы залы дæр. Уым мæм тынг фæкаст уæззау атлетикæйы тренер Кæсæбиты Александр», – радзырдта Зассеты Алан.
Ныр Зассейы фырт æмæ Хъесаты Петр сæхи цæттæ кæндзысты радон ерыстæм. Дыууæ дæр фæнд кæнынц гауызы дæсныты ‘хсæн Уæрæсейы Кубокы дæр хайад райсын, кæцы уагъд цæудзæн ноябры мæйы Оренбургы. Уымæй иу мæй раздæр та уагъд æрцæудзæн дунейы чемпионат. Æмæ кæд уырдæм Уæрæсейы æм-бырдгонды бауадзой, уæд уым дæр йæ тыхтæ бафæлвардзæн Зассеты Алан.
ХУРИТЫ Батрадз
