Хуссарирыстойнаг богал Плиты Вадим ссис 18 азы онг кæуыл цæуы, уыцы спортсменты ‘хсæн уæгъдибар хъæбысхæстæй Уæрæсейы чемпионаты бронзæйон призер. Ерыстæ уагъд цыдысты Наро-Фоминскы. Вадим архайдта 60 кг уæзы категорийы.
Бацæттæ йæ кодтой тренертæ Коцты Тамерлан, Гæджиты Марат æмæ Бикойты Вадим.
ГРЕКЪАГ-РОМАГ ХЪÆБЫСХÆСТ
Æрæджы уагъд æрцыд 24 азы онг кæуыл цæуы, уыцы богалаты ‘хсæн грекаг-ромаг хъæбысхæстæй Мæскуыйы чемпионат. Уым 87 кг уæзы категорийы архайдта хуссарирыстойнаг спортсмен Хацырты Симон. Уымæн бантыст æртыккаг бынат бацахсын.
Симон тренировкæ кæны Мæскуыйы физикон культурæ æмæ спорты колледж «Спарта»-йы.
Ивгъуыд азы кæрон уымæн лæвæрд æрцыд Уæрæсейы спорты дæсныйы ном.
БАУАДЗДЗЫСТЫ СÆ ЕРЫСТÆМ
4-æм апрелы уагъд æрцыд Хъæбысхæсты иугонд дунейы (UWW) æххæстæтгæнæг комитеты рабадт. Уым хаст æрцыд уынаффæ дунеон Олимпион комитеты рекомендацитæ æххæстгæнгæйæ дунеон ерыстæм уæрæсейаг æмæ белорусаг спортсменты бауадзын.
Дунеон Олимпион комитет ерыстæм нæ уадзы контрактмæ гæсгæ æфсæддон структурæты кусæг спортсменты. Æрмæстдæр 16 азы æмæ 18 азы онг кæуыл цæуы, уыцы спортсменты, уыдон бæлвырд нæ цæудзысты ацы критеритæм гæсгæ æмæ уагъд æрцæудзысты æввахсдæр ерыстæм.
Хъæбысхæсты иугонд дуне ма бахатдзæн дунеон Олимпион комитетмæ, цæмæй хистæр кары спортсменты дæр ерыстæм бауадзыны тыххæй фæлæмæгъдæр кæной ацы домæн, ома æфсæддон структурæты ма хъуамæ кусой контрактмæ гæсгæ.
ХУРИТЫ Батрадз
