Хъæрæсе-Черкесийы Республикæйы сырæзтыл 100 азы сæххæсты цытæн уагъд æрцыд æппæтуæрæсейон турнир уæгъдибар хъæбысхæстæй. Хайад дзы райстой, 23 азы онг кæуыл цæуы, ахæм спортсментæ. Ерысты ирон богалтæн бантыст 7 хорзæхы рамбулын. 125 кг уæзы категорийы аккаг ныхмæлæууæг нæ разынд Теблойты Ацæмæзæн. 97 кг уæзы та фыццаг бынат бацахста Козырты Сергей. Æвзист майданы хицæуттæ баисты Сабанты Александр (65 кг), Годжыцаты Станислав (86 кг) æмæ Кцойты Алихан (92 кг). Бронзæйон призертæ та систы Бæтæгаты Сослан (61 кг) æмæ Хъарданты Магомед (79 кг).
ФУТБОЛ
Национ футболон къорды 35-æм туры Дзæуджыхъæуы «Алани» хъазыд Тольяттийы «Акрон»-имæ. Фембæлды 17-æм минутыл расгуыхт дзæуджыхъæуккæгты размæбырсæг Хуыбылты Владимир. Уый ма расгуыхт 63-æм минутыл æмæ хыгъд ссис 2:0. Фæлæ уый фæстæ алайнæгтæ фæлæмæгъдæр кодтой сæ хъазт. Уымæй спайда кодтой «Акрон»-ы хъазджытæ æмæ сын 69-æм минутыл бантыст иу дзуаппон пурти бакъуырын. Уымæй 10 минуты фæстæдæр та – хыгъд сæмхуызон кæнын. Алайнæгтæ ма бæргæ абырстой размæ, фæлæ хъазты кæронмæ хыгъд нал фæивта.
Чемпионаты кæронмæ ма баззад æртæ хъазты. Дзæуджыхъæуккæгтæ æрæмбырд кодтой 57 очкойы æмæ турнирон таблицæйы цæуынц 6-æм бынатыл.
6-æм майы «Алани» уазæгуаты хъаздзæн Нижнекамскы «Нефтехимик»-имæ. Ирыстоны сæйраг футболон командæ уырдæм атæхдзæн иу суткæ раздæр. Футболисттæн комфортон уавæртæ саразыны фæдыл клубы хицау Гуыриаты Владимир командæйæн сорганизаци кæндзæн чартерон рейс.
ХУРИТЫ Батрадз
Comments are closed, but trackbacks and pingbacks are open.