Куыстуарзаг фӕллойгӕнӕгӕн иу уысм дӕр ӕрӕнцой нӕ вӕййы, афӕдзы алы афон дӕр ӕдзух куыстыл лӕуд у. Æнӕкъуылымпыйӕ æппæт куыстытæ дæр чи феххӕст кӕны, хӕдзарады ахӕм разамонӕг кӕддӕриддӕр фенхъӕлмӕ кӕсы зӕрдӕрухсгӕнӕн фӕстиуджытӕм. Ахӕм у раззагон фермерон хӕдзарады къухдариуӕггӕнӕг Къостайыхъæуккаг Хъабанты Хъазбег дӕр. Кæд хатт зындзинӕдтыл дӕр сæмбæлы, кӕм техникӕйы аххосӕй, кӕм та ӕндӕр исты аххосæй, уӕддӕр куыстуарзаг зӕхкусӕг ссары сӕ аиуварс кӕныны амӕлттӕ ӕмӕ йӕ хъуыддӕгтӕ ацӕуынц рӕвдз. Хъабаны фырт ныр дӕр йӕхи батыхсын кодта, цӕмӕй хуымгӕрдӕныл сӕмбӕла ӕххӕст цӕттӕйӕ ӕмӕ йын уыцы ахсджиаг ӕмӕ ӕнӕмӕнгхъӕуӕг куыстыты фылдӕр хай ахицӕн кӕнын ӕнтысгӕ дӕр бакодта. «Агропромсервис»-ы Знауыры районы Уелиты хӕдзарады механизатор Кокойты Валери йӕм фӕзынд амӕйразмӕ. Раззагон ӕмӕ фӕлтӕрд комбайнер цыбыр ӕмгъуыдмӕ карст фӕци 6 гектары фӕззыгӕнд мӕнӕу ӕмӕ 24 гектары та – хъӕбӕрхоры хуымтӕ, тыллӕг рӕстӕгыл ласт ӕрцыд ӕфтауцдонмӕ дӕр. Хъӕбӕрхор иу гектары тыллӕгӕй райста 43 тоннӕйы ӕмӕ мæнæуæй та 12 – тоннӕйы. Йӕ ныхӕстӕм гӕсгӕ уый у хорз фӕстиуӕг. Ахӕм зӕрдӕрухсгӕнӕн тыллӕгӕрзад райста уымӕн, ӕмӕ сӕ афоныл кӕй байтыдта, стӕй ма агротехникӕйы ӕндӕр домӕнтӕ дӕр рӕстӕгыл кӕй сӕххӕст кодта. Холладжы тыхтӕттӕ та рауадысты 1800 иуӕджы, уыдонӕй ауӕй кодта 1400 тыхтоны. Хӕдзарадӕн ма бафснаинаг ис 3 гектары сысджыйы культурӕ дӕр ӕмӕ уымӕ дӕр ӕнхъӕлмӕ кӕсы хъӕздыг тыллӕгмӕ.
Хӕдзарад канд зӕххы куыст нӕ кӕны, фӕлӕ ма стыр хъусдард здахы фосдарды къабазмӕ дӕр ӕмӕ сын уый ӕнтысгӕ дӕр кӕны, сӕ къухты ӕфты раппӕлинаг фӕстиуджытӕ. Абоны бонмӕ уал хӕдзарады нымадӕуы 65 фысы, уӕрыччытӕ схъомыл кодта ӕмӕ дзы фӕлхасгӕнджытӕн ауӕй кодта 47. Хъазбег куыд загъта, афтӕмӕй фыстӕ ногӕй райдыдтой цот кӕнын ӕмӕ уал ӕм ноггуырд уӕрыччытӕ ис 10. Стуртӕ дары цыппар ӕмӕ йӕм родтӕ дӕр ис уал. Зындгонд у, хуыдарды къабаз райтынг кӕнын фылдæр хъарутæ кӕй домы. Фӕлӕ Хъабанты бинонтӕ уæддæр дарынц 8 хуыйы, уыдонӕй дзӕргъытӕ сты 7. Æввахс рӕстӕджы уал дзы ныззайдзӕн 5 ӕмӕ уӕд сӕ нымӕц ноджы фӕфылдӕр уыдзӕн. Кӕй зӕгъын ӕй хъӕуы, хӕдзарад раззагдӕрты рӕнхъытӕм ракӕнын иу адӕймагӕн зын у, уымӕ гӕсгӕ фыдӕн кӕддӕриддӕр йӕ уӕлхъус сты йе ‘ртӕ фырты ӕмӕ йын ӕххуыс кӕнынц ӕрвылбонон куысты.
Хуыбиаты Никъала
Comments are closed, but trackbacks and pingbacks are open.