Инвестпрограммæйы фæлгæтты нæ горæты цы ахсджиаг объекттæ арæзт æрцыдысты, уыдонмæ та ноджыдæр бафтдзæнис иу – нæ иунæг уæлдæр ахуыргæнæндон, нæ паддзахадон университеты комплекс. Ацы университет йæ сырæзтæй фæстæмæ нæ адæмæн у, нæ республикæйы кадрты куырдадз. Уымæн æмæ ацы ахуыргæнæн уагдон фесты, абон мах кæмæй бабуц вæййæм, уыцы зындгонд ахуыргæнджытæй бирæтæ, фысджытæ, филологтæ, историктæ æмæ æндæр алыгъуызон специалисттæ. Мах ма сæрбæрзонд стæм университет кæй ном хæссы, уыцы Тыбылты Алыксандры хуызæн номдзыд, йæ адæмы æцæг уарзтæй чи уарзта, ахæм зындгонд адæймæгтæ дзы кæй куыстой, уымæй дæр. Раст у, рагон уыд ацы ахуыргæнæндоны бæстыхай, фæдæрдджын, фæлæ зынаргъ уыд нæ адæмæй алкæмæн дæр, уымæн æмæ нæ республикæйы нæ разындзæнис ахæм хæдзар, йæ къæсæрæй бинонтæй иу адæймаг уæддæр кæмæй нæ бакастис. Уымæ гæсгæ 2008 азы куы басыгъд, уæд зын уыд пырхытæй, хъæдхъиутæй йæм кæсын алы раст хъуыдыгæнæг адæймагæн дæр.
Университеты хъысмæт мыййаг иу æмæ дыууæ хатты скъуыддзаггонд нæ цыд. Бирæ дзырд цыдис, цæмæй сæйраг корпус ногæй арæзт æрцæуа йæ историон хуыз ын бахъахъхъæнгæйæ. Уымæ гæсгæ 2011 азы скъуыддзаг æрцыд, цæмæй уый арæзт æрцæуа горæтæн йæ цæгатварс. Уый хъуамæ дзуапп лæвæрдтаид нырыккон домæнтæ æмæ стандарттæн. Æгæрыстæмæй йын Инвестицион программæйы фæлгæтты ног университет саразыны тыххæй рахицæн æрцыд æхцайы фæрæзтæ дæр. Проектимæ базонгæ кодтой университеты ахуыргæнджыты-профессорон сконды. Ног комплексы проект, кæй зæгъын æй хъæуы, сæ зæрдæмæ фæцыд, фæлæ цæгатварс арæзт кæй æрцæудзæнис, ууыл не сразы сты, уымæн æмæ сын бирæ зæрдылдарæн цаутимæ баст уыд 80 азы дæргъы ацы ахуыргæнæн уагдон æмæ сæ нæ фæндыд йæ зæронд бынатæй фæиртæстаид, уый. Æмæ æрæвнæлдтой сыгъд агъуыст ногæй сфидæрдтæ æмæ сцалцæг кæнынмæ. Фæзынд «зæрдæрисгæ» специалисттæ, кæцытæ фидарæй уырнын кодтой, сыгъд æмæ æрдæгпырх агъуыст реконструкци кæй æрцæудзæнис. Сæрмагонд экспертизæ сахуыр кодта, зæгъгæ, систы фидардзинад, тас сын нæу. Æмæ æрæвнæлдтой систы фидар кæнынмæ, фæлæ, мах фæстæдæр æвдисæн уыдыстæм, æхцайы фæрæзтæ атоныны тыххæй арæзт кæй цыд æппæт дæр. Æцæгæй та арæзтадон куыстытæ чи æмбæрста, уыдон-иу ацы къултæм бакæсгæйæ, сагъæсты ацыдысты. Æмæ, æппынфæстаг, университеты хъысмæт скъуыддзаг æрцыд, хафт æмæ сыгъдæг æрцыдысты зæронд корпусы сыгъдæнтæ.
Æмæ ацы аз 4-æм майы ног университеты арæзтадæн бындур æвæрд куы ‘рцыд, уæд уый æхсызгон цау уыдис нæ адæмæн. Æхсызгон сын уыдис уымæн æмæ университеты ахуыргæнджытæ, студенттæ æмæ нæ республикæйы цæрджыты фæндон æппынфæстаг РХИ-йы Президент Тыбылты Леониды хъæппæрисон архайды руаджы хынцыд кæй æрцыд æмæ арæзт кæй цæуы йæ историон бынаты. Ног университеты комплекс уыдзæнис иууон, монолитон, цыппаруæладзыгон.
Раздæрау йæ бахизæн уыдзæнис Мæскуыйы уынджы ‘рдыгæй. Корпус арæзт æрцæудзæнис 680 студентæн. Проектон-сметон документацимæ гæсгæ ма ам арæзт æрцæудзæнис спортивон зал, хæрæндон, лаборатори, библиотекæ, актон зал, журналистикæйы факультеты студенттæн мини типограф.
Объект аразы арæзтадон компани «Мегаполис-Т». Сæйраджыдæр куыстыты стыр гуырахст æххæст цæуы университетæн культурон хайыл нымад чи уыдзæнис, уым, ома, музей, библиотекæ, актон зал кæм уы-дзысты, уыцы бынаты. Уагъд дзы ‘рцыдысты æфсæн, бетонон колоннæтæ, арæзт цæуы йæ каркас, хицæн цæуынц сæ астæрдтæ, уæладзыгæй уæладзыджы ‘хсæн. Уæладзгуытæ хицæн цæуынц административон æмæ ахуыргæнæн уæладзгуыты ‘хсæнты дæр, хæрæндоны нырма арæзт цæуынц бындурæвæрæн куыстытæ. Кусджытæ арæзтадон æрмæгæй сты æххæст, æцæг сæ къæвдатæ тынг къуылымпы кæнынц, фæлæ арæзтады мастер Æлборты Инал куыд зæгъы, афтæмæй куыстыты графикæй фæстейæ нæ зайынц. Æдæппæт дзы кусы 74 адæймаджы. Университеты арæзтад йæ проектмæ гæсгæ эксплуатацимæ лæвæрд æрцæудзæнис 2017 азы сентябры мæйы. Уæдмæ та уал студенттæ сæ ахуыры процесс дарддæр кæнынц университеты æмдзæрæндоны. Æмæ кæд тыхсынц къуындæг уавæрты, уæддæр сæ зæрдæ райы, уымæн æмæ æмбарынц, уый рæстæгмæ зындзинад кæй у æмæ сæм разæй æнхъæлмæ кæй кæсы нырыккон домæнтæн дзуапп чи дæтдзæнис æмæ сын ахуыр кæнынæн æппæт уавæртæ дæр арæзт кæм æрцæудзæнис, ахæм университетон комплекс.
Бестауты Валя
Comments are closed, but trackbacks and pingbacks are open.