Милицийы кусджытæй Стыр Фыдыбæстæйон хæсты Уæлахизыл 75 азы сæххæсты сæраппонд æфсæддон парады хайад чи райста, уыдон хорзæхджын æрцыдысты ведомствæйон юбилейон майдантæй. Цытджын уавæры сын зæрдиаг арфæтæ ракодтой Мидхъуыддæгты министр Наниты Игорь æмæ йæ хæдивджытæ Пухаты Мераб æмæ Дзабиты Æхсар. Наниты Игорь йæ раныхасы банысан кодта, зæгъгæ, парады хайадисджытæ иттæг хорз сарæхстысты æмæ милицийы кад дæлæмæ не ‘руагътой.
«Иннæ хæттытау та ацы аз дæр равдыстат уæ цæттæдзинад, уæ арæхстдзинад æмæ уæ сæрыстыр дæн. Сымах хъуамæ хъуыды кæнат, ахæм мадзалы хайадистæй кæй лæггад кæнут уæ фыдæлтæн, мах тыххæй йæ цард чи радта æмæ фашисттимæ тохы чи фæуæлахиз, уыцы хъайтартæн», – загъта ведомствæйы сæргълæууæг.
Пухаты Мераб дæр хорзыл банымадта, ахæм юбилейон майдан кæй рауагъдæуыд, уыцы хъуыддаг.
![](http://new.xurzarin.ru/wp-content/uploads/2020/07/91_003.jpg)
«Абоны бон мах æвдисæн стæм, бирæ бæстæты сæргълæуджытæ куыд чъизи кæнынц, уыцы хæсты хъайтарты нæмттæ æмæ фашисттæн æххуысгæнджытæй та кæй райдыдтой аразын геройтæ. Мах нæ кæстæрты хъуамæ зонгæ кæнæм историимæ æмæ сæ бафтауæм раст фæндагыл. Уый у нæ хæс, уымæн æмæ нæ истори куы ферох кæнæм, уæд нын нæ уыдзæн фидæн», – банысан кодта Пухаты Мераб.
Майдан «75 лет победы в Великой Отечественной войне»-йæ ныридæгæн хорзæхджын æрцыдысты ОМОН-ы кусджытæ, сылгоймæгты æмæ курсантты парадон расчеттæ. Æдæппæт 300 адæймаджы бæрц.
ДЖИОТЫ Александр
Comments are closed, but trackbacks and pingbacks are open.